¹ Waviralyaaya tjitthun'nho, Nluku aahontteha Abraao ni aahomwiirela: Abraao! Yena aahaakhula: Mikiri vaa. ² Ni Nluku aahiira: Onkusse mwaamwanaa, yooyo nonfentaa, Isaque, ni orwee elapo yoMoria; wanvahe okuttho mwaako on'halaaka woothoonhera. ³ Ni Abraao aahovuwa owitjissu, aahopakhira tjitthutjawe, naassilopwanaawe eeli, nimwaamwananwe Isaque, ni aahothikila nri owuukutthoni. Vano, aahokhuma arwaaka nipuro Nluku naahimyalyaawe. ⁴ Nihuku noneeraru, Abraao aahotthukula meethwaawe aahoona nipuron'no nttayinttayi. ⁵ Abraao aahowiirela assilopwana yaarinaawe: N'halatjekeva niinameela, mikinaarwaa nimwaanoola. Ninkoovekela ninaahokolyaa. ⁶ Vano, Abraao aahokussa nri wowuukutthoni ni aahomweesenra Isaque, mwaamwanawe. AAhokussa mooro nimwaalo nmatataniwawe ni yaahorwaatja nkhayi. ⁷ Ni Isaque aahowiirela athumwaane: Paapa! Ayena yaahaakhula: Mi mwaamwanaka. Ni yena aahaakoha: Kinoona mooro ninri, vano enama yoopheela opaha okutthweeyo erivayi? ⁸ Abraao aahaakhula: Nluku phin'hala okumiha enama yowuukutthoni, mwaamwanaka. Ni yaahorwaatja nkhayi. ⁹ Waphiyatjalyaaya nipuro Nluku naahimyalyaawe, Abraao aahaateka altaare ni aahomweesenra nryuule mwaamwanawe; aahontthuka Isaque mwaamwanawe, ni aahomweesa waltaare, vatjulu wonryuule. ¹⁰ Ni, ataphulaka ntata, aahokussa mwaalo wiira anvahatjere okuttho mwaamwanawe. ¹¹ Vano, nlaikha naaPwiya naahomwiihana wiirimu ni naahiira: Abraao, Abraao! Ni yena aahaakhula: Kirivaa. ¹² Ni nlaikha naahiira: Ohintaphulele ntata mwaanooyo, wala ohipanke yootakhala, kontha kinaatjuwela wiira onamoova Nluku, ni khukikhottiihale mwaamwanaa, n'motja yooyo paasi. ¹³ Abraao aahoweha otjulu ni aahoona ottuliwawe enama yaavarihiye enhaka wamaphunpuluni. Abraao aahovara, ni aahopaha okuttho opuro wamwaamwanawe. ¹⁴ Abraao aahiihana nipuron'ne: Apwiya anaahala ovaha, phintjina niniihaneliya npaka nihuku nolelo. ¹⁵ Nlaikha naaPwiya naahomwiihana Abraao emaara yonapiili, wiirimu, ¹⁶ ni naahiira: Kiholuphela, Apwiya phaneera, kontha khukaateelihale mwaamwanaa, n'motja yooyo paasi, ¹⁷ weekhweeli kinaahala waareeriha ni wintjiviha nokonaa phanka etthontto tjowiirimu ni phanka npuusu woopahari; ni assimutjaayo anaahala okussa epooma tjaawananyaa. ¹⁸ Nlokonaa, ninaahala oreeriya niwaakhenliya elapo tjooteene, kontha ohiiwelela ntjuunaka. ¹⁹ Vano, Abraao aahohokoleela waassilopwanaawe, ni yaahorwaatja nkhayi oBerseba. Ni yena aahokhala oBerseba. ²⁰ Waviralyaaya tjitthun'nha, aahohimeeriya Abraao: Milca haayarana asaana ni mwaamun'naa Naor: ²¹ Uz, owantjeriya; Buz, mwaamun'nawe; Quemuel, athumwaane Arao; ²² Quesede; Hazo; Pildas; Jidlafe ni Betuel. ²³ Betuel aayon'yara Rebeca. Milca aahaayara asaana naane ni Naor, mwaamun'nawe Abraao. ²⁴ Amweettyaawe Naor, ntjinanaya yiihaniya Reuma, ni yaahon'yara Teba, Gaao, Taas ni Maaca.