¹ Vano, Apwiya yaahomwiirela Moises: Orwee waFarao ni omwiirele: Apwiya Nluku aaheperi aniira tjo: Waahiye atthwaaka arwee wiira akikokhorele. ² Massi weehaatthunihe okhuma, okhanhenraka nanlelo, ³ vano ntata naaPwiya nin'hala okhala niinamatjaa nmamattani niikavalotjaa nimihuwotjaa tjooteene. ⁴ Apwiya tjin'halaaya opmaka enama tjowiisrael kahi tjin'halaaya opanka enama tjowiigiipitu. Enama tjowiisrael khin'hala okhwa hata emotja. ⁵ Apwiya an'noovahaka owakathi. Ayena ahiira: Meelo phun'halaaka ovara tjitthun'nha elapweela. ⁶ Apwiya yaahpanka tjitjon'mo orupa ossenliya: Enama tjooteene tjowiigiipitu tjaahokhwa. Massi enama tjowiisrael khatjaakhwale hata emotja. ⁷ Farao aahokohakoha, mwaha woohikhwa enama tjowiisrael. Massi nrimaawe nanlelo wakhala woolipa ni yen khaatthunihale atthu okhuma. ⁸ Vano, Apwiya yaahomwiirela Moises ni Arao: Nkhupatje ettuura nfonuni. We, Moises, ohaana omwaresselaka ettuura ntjulu Farao awehaka. ⁹ Ettuureeyo en'hala okhala nthaka wooyevatja elapo yooteene yowiigiipitu. Tjin'hala waarakalihatja atthu ooteene niinama tjolapo yowiigiipitu. ¹⁰ Vano Moises ni Arao yaahokussatja ettuura ni yaahemelatja ohoolo waFarao. Moises aahomwaressela ntjulu, ni tjaahaarakalihatja atthu niinama. ¹¹ Ananhanka khayaapitjapitjale waMoises mwaha womakhwatta, yaaphwanhale naatthu ooteene owiigiipitu. ¹² Apwiya yaaholipiha nrima waFarao, ni khaatthunale omwiiwenla Moises ni Arao. Phanka tjaamwiirelalyaaya Moises wiira Farao phin'halaawe opanka. ¹³ Vano, Apwiya yaahomwiirela Moises: Ovuwe owitjissu, wakhale ohoolo waFarao ni wamwiirele: Apwiya, Nluku aaheperi, aniira: Waahiye atthwaaka arwee wiira akikokhorele, ¹⁴ kinaahala waakurussa assinttuuttu owakathi yoola eriyari aanantekweenhu. Kin'hala opankela wiira otjuwele wiira khaavo ookilikan'na elapweela. ¹⁵ Nen'nava, kaarina woovara nimatataaka ni woohonona erutthwaa mwaha wokwerere ni onakhwale. ¹⁶ Massi mwaha wokurutjaka, kihoohiya wiira okhale, wowiira ntjinanaka nitjuwanye elapo yooteene. ¹⁷ Nanlelo tjitjon'mo, onawaakhottiiha atthwaaka wiira akhume. ¹⁸ Okiiwe! Meelo, owakathi yoola, kinaahala owaana epaluwa yuulupale, yeeyo ehinaaya wooniya yunpiyeru elapo yowiigiipitu. ¹⁹ Phimaana, waarume atthu akusse enamatjaa tjooteene nimihuwotjaa tjeessiye nipuro nikhwaawe. Epula en'hala orupa en'hala waaphwanha atthu niinama an'hala okhala nmamattani, ni yaale ahin'hal orwaa nmawan'nhaya anaahala okhwa. ²⁰ Vano, ananteko aFarao yaaminale moolumo aaPwiya yaahaakuvatja orweela epotthatjaya nimihuwotjaya arweehaka npaani. ²¹ Mssi yaale yahaaminale moolumo aaPwiya yaahohiya epotthatjaya nimihuwotjaya nmamattani. ²² Apwiya yaahomwiirela Moises: Otaphulele ntatanaa wiirimu, ni enaahala orupa epula elapo yooteene yowiigiipitu: ²³ Moises aahovussa nkopwaawe awehihaka wiirimu, ni Apwiya yaahokurussa etari, epula nooverunha nlaponi. Ayena yaahokurussa epula yuulupale elapo yooteene yowiigiipitu. ²⁴ Tjaahaavo etari niipula yuulupale elapo yooteene yowiigiipitu nen'ne yaari ehinakhumenla. ²⁵ Elapo yooteene yowiigiipitu, epula yuulupale yaarupale yaahotankulatja tjitthu tjooteene tjon'mattani, atthu niinama. Yaahhotankulatja miri tjon'mattani tjooteene. ²⁶ Elapo yoGosen, waakhalaaya atthu owiisrael, khayaarivo epula yuulupale. ²⁷ Farao aahaaruma atthu wiihaniya Moises ni Arao. Yena aahowiirelatja: Kihokossa emaareela. Pwiya ntthu ossariya ni mi naatthwaaka khaniniiwenla. ²⁸ Mwaavekele Apwiya, kontha epuleeyo yuulupale tjinene. Kinawoohiyatjani nrwaatjeke ni n'hikhalatjetho va. ²⁹ Moises aahomwiirela: Kahiyaka epoomeela, kinaahala otaphulela ntatanaka waaPwiya. Etaritjinaahala omaala ni epula khináhala orupatho. Weenan'na yeela, n'naahala otjuwela wiira elapweela yaPwiya. ³⁰ Vano, nhu nanantekweenhu kinaatjuwela wiira khan'nonttittimiha Pwiya Nluku. ³¹ Etjoolya tjonama nitjitthu tjikhwaawe tjaahokwanhulatjiya, ni etjoolya tjonama tjaahottokottha. ³² Massi miri tjikhwaawe khatjiiriye etthu, konth tjaari etjoolya tjootjuwanya. ³³ Moises wakhumalyaawe ohoolo waFarao ni opooma, yena ahotaphula matataawe waaPwiya ni etari niioula yaahomaala. ³⁴ Farao woonalyaawe wiira epuula yaahomaala, aahokossatho ni aaholipiha nrimaawe wamotja naanantekwaawe. ³⁵ Nrima waFarao waaholipihiya. Vano, yena khaatthunihale atthu owiisrael wiira akhume. Moises phaahimeeriyaawe naaPwiya wiiraFarao phin'halaawe opanka.