¹ Atthu woonalyaaya wiira Moises aahopitja okhuruwa omwaako, ayenatja yaahothukumana wonrukureerya Arao ni yaahomwiirelatja: Onipankele ntthu wiira arwee ohoolowihu. Moises nlopwana nikumihale elapo yowiigiipitu, khanintjuwela emwiiraneelale. ² Vano Arao aahowiirelatja: Nrulatje epirinkutjinhu tjowooru tjaassaarenhu ni tjaassaaneenhu, nkiwiiheratje. ³ Ni atthu ooteene yaahorula epirinu tjaari nmanharunmwaya ni yaahonvaha Arao. ⁴ Yena aahaakhenla ewooru tjaatthu, ni aahopanka enama. Vano atthu yaahiira: Israel, ola Nlukweenhu ookumihalni elapo yowiigiipitu. ⁵ Arao woonalyaawe eyo, yeena aahaateka altaare ohoolo wonameele ni aahokhuwela iiraka: Melo ehaavo essukuhuulu wonkokhorela Pwiya. ⁶ Orupa ossenliya, atthu yaahovuwa owitjissu ni yaahovaha tjoovaha tjoopahiya ni yaahowaana tjoovaha tjooreerela. Vano yaahookomatja wiira alye ni ovurya, ni yaahovuwatja wiira ahakalalatje. ⁷ Vano Apwiya yaahomwiirela Moises: Orwee wowaakuvyaatja, maana atthu, yaayo yaakumihalyaaka wiigiipitu, ari oweemela. ⁸ Ayenatja ahohiya nttala waahimeeryatjalyaaka. Ayenatja aheemessatja enama wiira akokhorelatje ni ahopankelatja okuttho. Ayenatja aniiratja: Ola Nluku ookumihaleni elapo yowiigiipitu. ⁹ Ni Apwiya yaahomwiirel Moises: Kinawawehaka atthwaala. Atthu oohiiwa. ¹⁰ Vano, n'nava ohikaateelihe. Orussiyawaka onawaapaha ooteene, kinaahala waakwanhulatja. Yavireeyo kinaahala opanka nloko nuulupale eriyaryaa. ¹¹ Kontha Moises homananiha waamaaliha Apwiya Nlukwaawe. Yena aahiira: Apwiya kontha essiyani orussiyawinhu okhalaka naatthweenhu, yaayo yaakumihaleenhu elapo yowiigiipitu nooweryawinhu? ¹² Kontha essiyani atthu owiigiipitu waahalaaya wiira: Ayena yaakumihale moohuvani wiira awiive nmamyaakoni niwaakwanhulatja elapo yovathi? N'hokolosse orussiyawinhu ni nkumihe ehukhumu eriyari waatthweenhu. ¹³ N'muupuwele Abraao, Isaque ni Israel, anantekweenhu, yaayo yaaluphelaleenhu, mwiirelatjaka: Kinaahala owintjivihatjani phanka etthontto tjowiirimu, ni kinaahalawoovahani elapweela yooteene yeeyo enuulumenlaaka. Ayenatja anaahala okhala woohimala. ¹⁴ Vano Apwiya yaahohiya ehukhumu tjiiralyaaya wiira anaahala waawiihera atthwaaya. ¹⁵ Vano Moises aahorukunuwa ni aahokhuruwa omwaako, nakussale ethaapwa tjoopiili tjokettelo tjowaataana n'matataniwawe. Ethaapwan'nho tjantikhiye nphantte ninphantte. ¹⁶ Ethaapwan'nho ni tjowantikhiyan'nho tjaari tjaNluku. ¹⁷ Josue wiiwalyaawe okhuwela waatthu, yena aahomwiirela Moises: Ohaavo nkhitto wowaattakan'niya onthukumanoni. ¹⁸ Massi Moises aahomwiirela: Khunakhala okhuweliya waanamatthema, ni khunakhala okhuweliya waatthu ootthemiya, tjiniiwaaka ntju naatthu aniipa. ¹⁹ Moises waphiyalyaawe waathukumaniye, yena aahoona enameele naatthu yiinaka. Wowaakuvyaatja aahorussiya. Yena aahoriha ethaapwa tjaari nmatataniwawe ni aahopwessakatjera wamwaako. ²⁰ Yena aahokussa enama atthu yaapankalyaayeele , aahopaha, npaka okhala ntthupinene, ni aahiittela nmaatjini. Ni aahaawuriha atthu owiisrael. ²¹ Vano Moises aahomwiirela Arao: Atthwaala awiirihale essiyani, wiira waawiihere tjoottheka? ²² Arao aahiira: Apwiya ohikhuruwe orussiyawinhu. Nhu n'nawaatjuwela atthwaala, ni n'nawaatjuwela tjinpankaaya yootakhala. ²³ Aynatja ahokiirelatja: Onipankele Nluku oonihoolela. Moises, nlopwana nikumihale elapo yowiigiipitu khanintjuwela emwiiraneelale. ²⁴ Vano kaahowiirelatja: Arina ewooru, akumihe. Ayenatja yaahokivahatja, nimi kaahoihela vamooroni, phaakhumaaya enameela. ²⁵ Moises aahoona wiira atthwaale yuupuwela enan'na yoohikhala, kontha Arao aahaahiya arimeelaka, aahiyaka naawananyaaya. ²⁶ Vano Moises aaheemela, ohoolo wohipuro naathukumaniye, ni aahiira: Yoole rinphantte waaPwiya aew waryaaka. Alevita oteene yaahonrukureerya. ²⁷ Yena aahowiirelatja: Apwiya, Nluku owiisrael, aniira tjo: Khula nlopwana atthonkomanihe ekatanaawe, nkhora ninkhora, nipuro nithukumaniye nooteene, ni awiive assihimaawe, anonttharenla nanwaattaman'nuaawe. ²⁸ Alevita yaahopanka phanka Moises tjaahimeeryalyaaya. Nen'ne nihukun'ne yaahokhwa atthu wookhalaka ekonto tthaaru. ²⁹ Moises aahowiirela alevita: Olelo n'heessatjiya wantekoni waaPwiya, kontha khula ntthu wanhu honrukunuwela mwaamun'nawe, phimaana Apwiya ahoreeriha nihuku nolelo. ³⁰ Orupossenliya, Moises aahowiirela atthu: N'hopanka makoossi moolupale. Kinaarwaa waaPwiya. Wan'nokhala wiira kilaphululaka tjootthekatjinhu. ³¹ Moises aahorwaa waaPwiya ni aahiira: Atthwaale ahopanka makoossi moolupale anonpankatja ttontto owooru. ³² Massi n'navaa, mwaalevenle tjootthekatjaya; mweehaalevenle, nkifutje eliivuru ekantikhaleenhu. ³³ Apwiya yaahomwiirela Moises: Yoole n'hala okikossera kinanfutja nliivuruniwaka. ³⁴ Vano orweeke ni waweettihere atthwaayo nipuro noohimeeryalyaaka. Nlaikhanaka ninaahala woohoolela. Nihuku nin'halaaka waahukhumu, kin'hala waahukhumu niitanpyaaya. ³⁵ Vano Apwiya yaahaakurussela assinttuuttu atthwaale, mwaha wonpanka ttontto, yoole anpankalyaawe Arao.