¹ Apwiya yaahomwiirelatho Moises ni Arao elapo yowiigiipitu, yiiraka: ² Ola mweeryuula onkookhala mweeri owantjera,mweeriinhu wowantjera womwaakhoola. ³ Waahimeerye atthu owiisael: Nihuku nonakhuumi womweeri yoola, khula ntthu wanhu haana akussaka epuri emotja; khula nloko phin'halaaya opanka. ⁴ Wakhala wiira nlokon'no nankaani woopheela okumiha epuri emotja, nlopwana nimwaattaman'nwaawe an'hala okhuura enama en'hala okhumenla, phanka tjin'halaaya okhala atthwaayo. Enaahala waatossa atthu ooteene an'hala olya; tjitjon'mo ayenatja anaahala okussa enama en'hala wootossatjani. ⁵ Enameenhu en'hala okhala yoohirakala, yoolopwana yomwaakha n'motja. ⁶ N'nohala ossunka npaka nihuku nonakhuumi natjesse womweeri yooyo. Vano, atthu ooteene an'hala wiiva khula enama otjootjilo. ⁷ N'naahala okussa ephome wiittela nmamikhorani wonupa, mon'mo n'nohala orwaa enaman'nho. ⁸ Ohiyu yoole, n'naahala okhuura enama, yowaaneeliya. N'nohala okhuura niiphaawu tjoohimiropo, nimihokorokho tjowaawa. ⁹ Khan'nohala okhuura ekithi wala yowaapeiya nimaatji. Wahikhanle waaneele, nimuru, metto nitjitthu tjooteene tjon'hina. ¹⁰ Khan'nohala ohiyeethu mwiiraka nisseelele meelo. Yahalavale n'nohala opaha npaka owitjissu. ¹¹ Phin'haleenhu okhuura tjitjon'mo: Niissuntu n'niitthukale, niitjapatthotjinhu ninkopweenhu nmatatani. N'naahala olyaatja wowaakuvyaatja. Ela essukuhuulu yaapwiya. ¹² Apwiya yaahiira: Knaahala ovira ohiyu elapo yowiigiipitu, ni kinaahala waahonona owantjera oyariya atthu niinama. Kinaahala waattarussa anluku ooteene owiigiipitu. MikiPwiya. ¹³ Ephome en'hala okhala nthoonhero ookitjuweliha nmawan'nhinhu. Kawavale, kin'hala ovira watjuluwinhu, kakwanhula elapo yowiigiipitu. Assinttuuttwaayo khaanooweelani phinhu ni khan'hala wookwanhulatjani. ¹⁴ N'no nihukun'no nin'hala okhala muupuwelelweenhu, n'nohala okhaliha phanka essukuwuulweenhu yaaPwiya. En'hala okhala ekettelweenhu, mwaha womakhoto ooteene, n'nohala oweheeha n'no nihukun'no. ¹⁵ N'nohala okhuura ephaawu yoohimiropo womahuku saapa. Nihuku nowantjera, n'nohala okumiha miropo nmawan'nhinhu. Wayoole n'hala okhuura ephaawu yomiropo okhuma nihuku nowantjera npaka nihuku nonasaapa naahala othikiliya wiisrael. ¹⁶ Nihuku nowantjera, anaahal wuulumiya moolumo mwantjinanaka ni nihuku nikhwaawe onaahala okhalatho nthukumano woolikana. Khuuvo nteko n'hala ovariya yaala mahukwaala, nteko on'hala okhala wowaapyaatjiya, wiira nlyatje ooteene. ¹⁷ Mwaweheehatje yooyo nthukumano wophaawu woohimiropo, kontha nen'no nihukun'no kinaahala waawaana anakhottweenhu oota wolapo yowiigiipitu. Tjitjon'mo mwaweheehe n'no nihukun'no womakhoto ooteene. En'hala okhala ekettelweenhu, yoohimala. ¹⁸ N'nohala okhuura ephaawu yoohimoropo okhuma otjootjilo wonihuku nonaakhuumi womweeri wowantjera womwaakha yooyo npaka nihuku nonassiriini namotja womweeri yooyo. ¹⁹ Mahuku saapayaala, tjihikhale miropo tjin'hala ophwanhiya nmawan'nhinhu. Wayoole n'hala okhuura ephaawu yomiropo naahala ohukhumwiya wiisrael, ntthuuyo akhale nan'mwa wala onlaponi mon'mo. ²⁰ Khiivo en'hala opankiya nimiropo en'hala oliya. On'haleenhu okhala mooteene, n'nohala okhuura ephaawu yoohimiropo. ²¹ Vano, Moises aahaalattula mahumu ooteene owiisrael ni aahowiirelatja: Nrwee mwathanle enama tjin'la waaphiyera assimutjiinhu, nintthonkomanihe enama yossukuhuulu. ²² Ni nkusse nritta wonri nruwyee nphomeni eri npassiyani. N'nohala omwaressela ephomeeyo nmamikhorani. Khaavo wanhu n'hala okhuma owanuwawe npaka ossa. ²³ Kontha Apwiya anaahala ovira wiira yaakhwanhule atthu owiigiipitu. Ayena yawavale awehaka ephome yanmikhorani, an'hala ovira watjulu nkhoreenhu ni khan'hala ontthuniha ntakhali ovira nmawan'nhinhu wiira akwanhule. ²⁴ Nweheehe woohimala, phanka ekettelweenhu naassimutjiinhu. ²⁵ Mwaphiyatja elapo en'haleenhu ovahiya naaPwiya, phanka tjikhuluvelihalyaaya opanka, n'naahala woona yooreera. ²⁶ Mwakohiya naassaaneenhu: Ohakalalan'no on'himyani? ²⁷ N'nohala waakhula: Ola okuttho wossukuhuulu yaaPwiya, kontha Apwiya avirale watjulu tjonupa tjaatthu owiisrael elapo yowiigiipitu, waakwanhulatjaaya atthu owiigiipitu. Ayena ahaataphulatja assimutjiihu. Vano, atthu yaahokokhora ni yaahaavekela Apwiya. ²⁸ Atthu owiisrael yaahorwaa ni yaahopanka phanka Apwiya tjaamwiirelalyaaya Moises ni Arao. ²⁹ Ohiyu eriyari, Apwiya yaahowiivakatja owantjera oyariya ooteene elapo yowiigiipitu, okhuma owantjera oyariya aFarao, yooyo ookoma weehitjeniwawe, ni owantjera oyariya aanantthukeliya niinama tjowantjera oyariya. ³⁰ Farao aahovuwa ohiyu, naanantekwaawe ooteene. Waahaavo wunla ventji, kontha khayaarivo enupa yahaaryaawe ntthu ookhwa. ³¹ Ohiyu Farao aahomwiihana Moises ni Arao, ni aahiira: Nkhumatje eriyari yaatthwaaka, nhu naatthu owiisrael phanka tjilepelaleenhu. ³² Nkussatje mihuwotjinhu, phanka tjihimyaleenhu, nrwaatje ni nkireerihatje. ³³ Atthu owiigiipitu yawoona opitja okhumakhuma elapweele, kontha yiira: Ninaakhwa ooteene. ³⁴ Vano atthwaale yaahokussa otthwaaya woohimiropo. Myaaputjaya tjaanhattaaya tjaahotthukatjiya niikuwotjaya nmakhatani. ³⁵ Atthu owiisrael yaahopanka phanka Moises tjaahimyalyaawe. Yaaholepelatjiya naatthu owiigiipitu tjitthu tjoparatha ni tjowooru, niikuwo. ³⁶ Apwiya yaahopanka wiira atthu owiigiipitu yaatteelihe atthu owiisrael. Vano, atthu owiigiipitu yaahovaa khuula etthu yaalepeliyaaya naayenatja. Weenan'na yeeyo, atthu owiisrael yaahaahukhatjera atthu owiigiipitu. ³⁷ Atthu owiisrael yaahokahla niikwaha Oramesses arwaaka Sucote. Yaahaavo atthu wookhalaka ekonto sita mwentta vathi, waahiya anamwane. ³⁸ Yaahotakaneela naanan'mwa, nimihuwotjaya, atthu yaari entji. ³⁹ Yaahoossatja ephaawu tjoohimiropo niiphepa yawaanalyaaya wiigiipitu. Ephaawu tjaari tjoohimiropo kontha yaakhumale elapo yowiigiipitu ni kawaaphwanela opitjapitja yanriihaka eyoolya. ⁴⁰ Atthu owiisrael yaari wiigiipitu eyaakha emiya tjesse wotalaathiini. ⁴¹ Woomaleloni womyaakha emiya tjesse, nen'ne nihukun'ne, anakhotto ooteene aaPwiya yaahokhuma elapo yowiigiipitu. ⁴² Waari ohiyu woopheela wunwa, kontha Apwiya yaahaakumiha elapo yowiigiipitu. Waari ohiyu waaPwiya, woopheela wooniya naatthu owiisrael ooteene mwaha womakhoto ooteene. ⁴³ Apwiya yaahomwiirela Moises ni Arao: N'na phinlamulo nopaskowa: Khaavo nan'mwa n'hala olya. ⁴⁴ Vano, khula epottha ethumiye ninsurukhu n'hala olya napatjale wuula. ⁴⁵ Anan'mwa naananteko yaapokhera khan'hala olya eyoolyeeyo. ⁴⁶ Khula ntthu n'hala olya owanuwawe. Khan'nohala okussa enama nrweehaka nipuro nikhwaawe, ni khan'nohala opwessa nikhuva. ⁴⁷ Atthu ooteene owiisrael an'hala oweheeha essukuhuulwiiyo. ⁴⁸ Nan'mwa akhala ninhu apheelaka opankela nphantte wossukuhuulu yaaPwiya, amutjiinhu ooteene alopwana ahaana wuula. Vano yena phin'halaawe okhalela nphantte. Yena n'hala okhala phanka omon'mo. Vano, oohuula ooteene khan'hala olya. ⁴⁹ Ekettelweeyo en'hala okhala nintthu ooyariya mon'mo ni nan'mwa khala ninhu. ⁵⁰ Tjitjon'mo, atthu ooteene owiisrael yaahopanka phanka Apwiya tjan'himeeryalyaaya Moises ni Arao. ⁵¹ Yiiranyaale nihuku Apwiya yankumihalyaaya Israel elapo yowiigiipitu, naanakhotthwaaya.