¹ Apwiya yaahomwiirela Moises: Orwee waFarao, kotha kiholipiha nrimaawe naanantekwaawe. Kipankenle wiira kinthoonhere, eriyari womithoonherotjaka. ² Kipankenle wiira mwaahimeerye assaneenhu naassitjulenhu tjooteene tjinvaraaka; tjihukhumwalyaaka elapo yowiigiipitu nimithoonhero tjintji. Weenan'nayeeyo n'naahala otjuwela wiira mikiPwiya. ³ Vano, Moises ni Arao yaahorwaatja npaka waFarao ni yaahomwiirelatja: Apwiya, Nluku aaheperi, yiiraletjo: On'hala okitanhifu npaka eyaakhani? Waahiye atthwaaka arwee ni akikokhorele. ⁴ Massi waakhottiha okhuma, okiiwe, meelo kinaahala okurussela etjoroope elapweela. ⁵ Tjinaahala okhuneela elapo yooteene ni khaavo n'hala onhakela etthaya. Tjin'hala okhuura tjooteene tjihanle owakathi waarunpe epula yuulupale. Tjin'hala okwanhulatja miri tjooteene tjuunuwale mwiini. ⁶ Tjin'hala otjara nmapaani mwaatthu ooteene owiigiipitu, etthu yaari ehiniiranyaa nen'ne. Ni Moises aahokhuma ohoolo waFarao. ⁷ Anamalakalaka yaahomwiirela Farao: Nlopwanoola n'hala onoopopiha npaka eyaakhani? Mwaahiye atthu owiisrael arwee wiira yankokhorela Pwiya, Nlukwaaya. Khan'notjuwela wiira elapo yowiigiipitu ehokwanhuwa? ⁸ Moises ni Arao, yaahorwaatjatho waFarao, ni aahowiirelatja: Nrwaatjeke mwankokhoreleke Pwiya, Nlukweenhu. Tupanitho n'hala orwaa? ⁹ Moises aahiira: Nin'hala orwaa naamwaavano ni oolupale, naasaaneehu alopwana naassithiyana. Ninaakussa enamatjihu, kontha nihaana otthapa wowaattittimiha aPwiya. ¹⁰ Farao aahowiirelatja: Apwiya akhale ninhuuvaatja, koohiyatjani nrwaatjaka. Nkawehatjani n'haanatja nrima woohiloka. ¹¹ Nrwaatje alopwanaru, wiira mwaakokhorele Apwiya, kontha phinpheeleenhu. Vano Moises ni Arao yaahorweehatjiya ohoolo waFarao. ¹² Apwiya yaahomwiirela Moises: Otaphule ntatanaa wowiira etjoroope tjikhuruwele elapo yowiigiipitu ni tjihonone tjitthu tjooteene, tjitthu tjooteene tjihiirihiye etthu niipula yuulupale. ¹³ Moises aahotaphula ntatanawe elapo yowiigiipitu, ni Apwiya yaahokurussa ephyoo yuulupale elapo yowiigiipitu, ekhumaka nphantte onkhuma ntjuwa, nihuku ntero ni ohiyu wooteene. Wassalyaaya, ephyoo yaahowaana etjoroope. ¹⁴ Etjoroope tjaahomwareela elapo yooteene yowiigiipitu. Etthu yaari ehinakhumenla nen'ne nen'ne. ¹⁵ Tjaahokhuneela elapo yooteene yovathi, yaahoripela; ni tjaahokwanhulatja miri tjooteene nimihokorokho tjahaakwanhuliye niipula yuulupale yaawaale. Elapo yooteene yowiigiipitu, khuuvi nri waahalale nmattani. ¹⁶ Vano, wowaakuvyaatja Farao aahowiihanihatja Moises ni Arao ni aahowiirelatja: Kihaakossera Apwiya, Nlukweenhu, ninhuuvaatja. ¹⁷ Vano, n'nava nkilevenlatje ni mwaalepelatje Apwiya wiira okhwa okikhale ottayi. ¹⁸ Moises aahkhuma ohoolo waFarao ni aahaalepela Apwiya. ¹⁹ Apwiya yaahokurussatho ephyoo yuulupale ekhumaka nphantte onkhuma ntjuwa, akurussaka etjoroope epahari yoosseerya. Khiivi etjoroope emotja yaahanle wiigiipitu. ²⁰ Massi Apwiya nanlelo yaaholipiha nrima waFarao, ni khaatthunihale atthu owiisrael okhuma. ²¹ Vano, Apwiya yaahomwiirelatho Moises: Otaphulele ntatanaa wiirimu wowiira oripele elapo yooteene yowiigiipitu, oripela atthu on'halaaya wooneeha. ²² Moises aahotaphulela ntatanawe wiirimu, ni yaahokhuruwa epiphi elapo yowiigiipitu mahuku mararu. ²³ Khaavo amoona nkhwaawe. Ni khaavo aakhuma owanuwawe womahuku oomararu. Massi wiisrael tjaahaavi mithuko etthoko tjooteene. ²⁴ Farao aahomwiihaniha Moises ni aahomwiirela: Orwee ni waalepele Apwiya. Hata naassimutjeenhu n'naahala waakussatja, massi miuwotjinhu tjinaahala. ²⁵ Massi Moises aahiira: Niwe ohaana onivaha enama wiira naavahe okuttho Apwiya, Nlukweehu. ²⁶ Nimihuwotjihu ninaahala okussa, ni khiivo en'haleehu ohiya ottuli, nihaana naavahaka Apwiya. Kontha khanintjuwela hata niphiyaka en'haleehu waavaha Apwiya. ²⁷ Massi Apwiya yaaholipiha nrima waFarao, ni khaatthunihale atthu owiisrael wiira akhume. ²⁸ Farao aahomwiirela Moises: Okhume ohoolowaka! Okiviriyane etthu emotja: Khunkoonatho, kontha nihuku nookoona ekhovyaaka onaakhwa. ²⁹ Moises aahiira: Khweeli phanka tjitjon'mo tjiiralyaa: akin'hala woonatho ekhovyaa.