Intembawuzyo, lwiimbo lwabuzuba butegwa Sabata. ¹ Nchintu chibotu kulumba kuli Jehova akwimba chakulumbayizya kuzina lyako, Lisumpukide Loko, ² kwambilizya chizuminano chako chisyomekede muchifumo amubusyomesi mansiku woonse, ³ akantimbwa kamitenta ilikkumi achakwiimbya chinonezya. ⁴ Nkabo lwako, Jehova, wandichita kuti ndibotelwe mukwindila mumilimo yako. Ndiyoyimba chakukondwa nkambo kamilimo yamanza aako. ⁵ Mipati biyeni milimo yako, Jehova! miyeeyo yako ilinikide loko. ⁶ Sichinguni tazi, naba mufubafuba kuchimvwisya echi: ⁷ Muchindi basizibi nibasyuuka mbuli bwizu, anikuba basimuchita zibi boonse nibazwidilila, nikuba boobo balabetekelwa lunyonyooko lutamani. ⁸ Pesi webo, Jehova, uyoyendelezya kwalyoonse. ⁹ Chanchoonzyo, langa kuli basinkondonyokwe, Jehova! Nkasimpe, Langa kuli basinkondonyokwe. Bayofwa! Boonse abo bachita bubi bayomwasigwa. ¹⁰ Wasumpula lwija lwangu mbuli lwija lwamunyati; ndananikwa amafuta mapya. ¹¹ Menso angu abona kuzundwa kwabasinkondoma; matwi angu amvwa lubeta lwabasinkondoma. ¹² Balulai balakkuta mbuli munsamu wakakunka; Bayomena mbuli musida mu Lebbanoni. ¹³ Balibyedwe mung'anda ya Jehova; balakula mumbuwa zya Leza wesu. ¹⁴ Balazyala michelo nikuba bachembaala, banoli kabafwefwema akuba kamwemvwe, ¹⁵ kukuluula kuti Jehova uli luleme. Nindomba lyangu, alimwi takukwe bubi mulinguwe.