Kumupati wabasikwimba; wabika Jonati elemu Lekkhokkimu. Intem awuzyo ya Devidi. Lwimbo; elyo ma Filisitiya nibaka mujata ku Gati. ¹ Kondetelela, Leza, nkambo bantu balandivwima! Zuba lyoonse abo bandilwana balandipenzya. ² Basinkondoma balandivwima zuba lyoonse; nkambo mbiingi abo bandilwisya chakulisumpula andime. ³ Kuchiindi nenjowa, ndiyobikka lusyomo lwangu kulinduwe. ⁴ Muli Leza, mujwi lyako ndatembawula -- muli Leza ndabikka lusyomo lwangu; nsikoyoowa; balandichitaanzi bantu susu? ⁵ Buzuba boonse balasanduula majwi angu; miyeeyo yabo yonse balalwana andime nkambo kabubi. ⁶ Balalibungania beni antoomwe, balaliyubika beni, alimwi balatobela ntamo zyangu, mbubo balavwima buumi bwangu. ⁷ Kotabaleki kuti bachije mukuchita bubi. Baselusye bantu mubukali bwako, Leza. ⁸ Ulela kugamba kwangu akubikka misozi yangu mukantemba kako; tabali mubbuku lyako na? ⁹ Mpawo basinkondoma bayobweda mubuzuba obo mbwenjokwita; eechi ndichizi, kuti Leza nguwangu. ¹⁰ Muli Leza ijwi lyakwe ndyentembawula, muli Jehova -- Ijwi lyakwe ndyentembawula, ¹¹ muli Leza mwensyoma, Nsikoyoyoowa. Nchinyamanzi umwi nchanga ulandichita? ¹² Nchelelo changu chakuzuzikizya nzindakakonka kuli nduwe; Leza; Ndiyokupa chipo chakulumbya. ¹³ Nkambo wakavuna buumi bwangu kuzwa kulufu; wakajata mawulu aangu kukuwa, kuchitila kuti njende kunembo lya Leza mumumuuni wabuumi.