Chaandano 48
Lwiimbo; intembawuzyo yabana balombe baKkola.
1
Jehova mupati alimwi uleelede kutembawulwa loko, mudolopo lyaLeza wesu aachilundu chakwe chisalala.
2
Cheebeka mubulamfu, lukondo lwanyika yoonse, nchiLundu chaZayoni, kumabazu aakunyika, munzi waMwami mupati.
3
Leza walichita kuti azibwe lwakwe mumaanda abami kuti nchiyubilo.
4
Nkaambo, bona, bami balibungania beni; bakayinka antoomwe.
5
Bakabona, mpawo bakagamba; bakayoosegwa, alimwi bakachija.
6
Bakakankama mpawaawo, machise mbuli mwanakazi uulikutumbuka.
7
Aluuwo lwakujwe ulatyoloola maato aakuTasyisyi.
8
Mbuli mbutwakamvwa, aboobo mbubo mbutwakabona mumunzi waJehova wamakamu, mumunzi waLeza wesu; Leza uyochiimika lyoonse. Sela
9
Twakayeeya aatala abusyomesi bwachizuminano chako, Leza, aakati kang'anda yako yakukombela.
10
Mbuli zina lyako mbulibede, Leza, aboobo mbiibede ntembawuzyo yako kusika kumagolelo aanyika; luboko lwako lwalulyo luzwide busalali.
11
Leka Chilundu Zayoni abotelwe, bana basimbi baJuda ngabakondwe akaambo kambeta zyako zyabululami.
12
Amweende muzyunguluke Chilundu Zayoni, muzyunguluke; amukabale maanda akwe malamfu,
13
mukalangisisye kabotu bulambo bwakwe, alimiwi mukalange kumaanda akwe aabwami kuchitila kuti muzolwiide izyalane litobela.
14
Nkaambo ooyu Leza nguLeza wesu lyoonse alyoonse; nguyotweenzya kusikila kulufu.