Chaandano 19
Kumwendelezi wanyimbo. Lwimbo lwa Devidi.
1
Majulu wambilizya bulemu bwa Leza, alimwi mulenga lenga uzibisya mulimo wamaanza akwe!
2
Buzuba abuzuba zilambuula; busiku abusiku zitondezya luzibo.
3
Taakwe nikuba mulumbe naa majwi awambuulwa; jwi lyazyo talimvwigwi pe.
4
Pesi majwi anzizyo amvwigwa munyika yoonse, alimwi mulumbe wanzizyo ulamwayika kusikila kumamanino aanyika. Wasimpa tente lyazuba akati kazyo.
5
Izuba lilimbuli sibwiinga uzwa mung'anda mwaalede alimwi mbuli mwalumi singuzu ubalika elyo nachijana ntamo yakwe.
6
Izuba lilabbuda kuzwa kumagolelo amwi alimwi kalyenda mumulenga lenga kuyosika kumagolelo aamwi; takwe nikuba chisitika kupya kwalyo.
7
Mulawu wa Jehova uliluleme, ulabukulusya nguzu, bukamboni bwa Jehova bulasyomeka, bulabasungwazya batakubwene.
8
Malayilile a Jehova aliluleme, apa kuti moyo usungwate; mulawo wa Jehova ulasalala, upa kuti menso ajulike.
9
Kuyoowa Jehova kulasalala, kunoliwo lyonse mane kukabe kutamani; imbeta zya Jehova nzyamasimpe alimwi kubikka amwi zyoonse zililuleme!
10
Zilayandikana kapati wkinda ngolide, alubo kwinda ngolide mbotu; zilanona akwinda buchi alimwi sanzya buchi buzwa muchinkuli.
11
Iyii, mubelesi wako wakasigwa anzizyo; mukuzisyoma muli mpindu mpati loko.
12
Ngwani unga ulakonzya kubona kulubizya kwakwe mwini? Kondilekelela zibi nzindichita chakutaziba.
13
Komulesya mubelesi wako kuzibi zyakulisumpula; utayilekeli kuti indendelezye. Aboobo ndiyolulama, alimwi ndiyolulama kumilandu myiingi.
14
Nzendaamba amulomo wangu alimwi amiyeezyo yamoyo wangu azikatambulike kunembo lyako Jehova, bbwelyangu alimwi omuvuni wangu.