Chaandano 118
1
Pa kulumba kuli Jehova, nkambo mubotu, chizuminano chakwe chakusyomeka mpuchili akutamani.
2
Izilayeli ambe kuti, ''Chizuminano chakusyomeka mpuchili akutamani.''
3
Muleke ng'anda ya Aloni yambe kuti, ''Chizuminano chakwe chakwe chakusyomeka mpuchili akutamana.''
4
Muleke batobela chakuyowa Jehova baambe kuti, ''Kusyomeka kwachizuminano chakwe takweeli.''
5
Mukupenga kwangu ndakakwilila Jehova; Jehova wakandisandula alimwi wakandangununa.
6
Jehova ulambebo; nsikoyoyowa pe; ninzi chinga chilandi chita muntu?
7
Jehova ulikubbazu lyangu mbuli mugwasyi wangu; njolanga chakuzunda kuli basinkondoma.
8
Nkubotu kujana chiyubilo muli Jehova kwinda kusyoma muntu.
9
Nkubotu kujana mayubilo muli Jehova kwinda kusyoma kumwana mulombe wabami.
10
Nyika zyoonse zilindizyungulukide; muzina lya Jehova ndiyobazunda.
11
Bakandizyunguluka; iyii, bakandizyunguluka; muzinz lya Jehova ndiyobazunda.
12
Bakandizyungulukila mbuli nzuki; balazima kufwambana mbuli mulilo mumamvwa; Muzina lya Jehova ndazizunda.
13
Bakandilwisya kuti bandiwisizye aansi, pesi Jehova wakandigwasya.
14
Jehova ninguzu zyangu alimwi ndukondo lwangu, alimwi nguwe undifutula.
15
Kwamvwigwa ijwi lyakusekelela kuzunda muzilawo zyabaluleme; ijanza lyalulyo lyaJehova lyazunda.
16
Ijanza lyalulyo lya Jehova lyasumpulwa; ijanza lyalulyo lyaJehova lyazunda.
17
Nsikoyofwa, pesi kupona alimwi akwambila milimu mibotu ya Jehova.
18
Jehova wandisubula buyumuyumu, pesi takwe nandipedekezya kulufu.
19
Ndijulila milyango yabululami; ndiyoyinjila alimwi ndiyopa kulumba kuli Jehova.
20
Oyu mulyango wa Jehova; baluleme banjila alinguwo.
21
Ndiyopa kulumba kulinduwe, nkaambo wakanditaba, alimwi wakaba lufutuko lwangu.
22
Ibbwe ndibakasowa bayaki ndilyo lyakaba mutwe wachooko.
23
Oku nkuchita kwaJehova; zilakondayizya kumenso esu.
24
Eeli ndimwi lyamazuba Jehova wakachita; tuyosekela akukondwa mulindilyo.
25
Ikaka, Jehova, tupe kuzunda! Ikaka, Jehova, tupe kuzwidilila!
26
Uli achoolwe oyo usika muzina lya Jehova; tulakulongezya kuzwa mung'anda yaJehova.
27
Jehova ngu Leza, alimwi watupa mumuni; amwange tukole kumeja achipayililo.
28
Nduwe Leza wangu, alimwi ndiyopa kulumba kulinduwe; nduwe Leza wangu; ndiyokusumpula.
29
Oh, alumbwe Jehova, nkaambo mubotu, chizuminano chakwe chalusyomo chilakkalila kutamani.