¹ Payo matchibese iyadaswika, wense wakuluwakulu nawadikoni wambumba wadazonda Djeso, kuti Wamuulaiye. ² Ese Wadamusunga Wadamutola ese Wadamupereka kuna Pilato, mukulu mukulu. ³ Napenepo Djuda, kuti Adamupereka, adawona kuti Djeso atongerha kufa, adadzalirha, adahirinza machereni makumi matatu iyamukufu kuna wakulu wakulu nawadikoni ⁴ ese adati: "Ine ndanyangaza kugulisa gazi lakutchena". Apo iwo wadalanga: "Tingantsinkwenyi nazvo? Nswako izvi". ⁵ Napenepo iye adathusa machereni iyamukufu muthemberi, adabuda ese adaenda kazviuulaya. ⁶ Wakulu wakulu wadatola machereni iyamukufu ese wadalanga: "Hazviribe kutenderha kuiga pabodzi nazvakupereka, thangwe ndimutengo wagazi". ⁷ Iwo wadalanga pabodzi makaniyo, wadagula munda wamuumbi kuti waite masiye iyanyakuuya. ⁸ Nalazau iyi, kuswikira ntsiku iyanyamuntsi, mundayo ukudaidziwa "Munda Wagazi". ⁹ Napenpo, zvidatewezeka zvilangiwa na muprofiti Jeremia: "Iwo wadatola machereni makumi matatu iyamukufu, mutengo kuti Iye adapimirha na mbumba iyaIziraeli. ¹⁰ ese wadapereka izvi munda wamuumbi, ninga Tchangamire adanditumira". ¹¹ Napenepo Djeso, pamberi pa mukulu mukulu, uyu Adamubvunzisa: "Iwe ndiwe Mukulu waMadjuda?" Djeso adamudaira: "Iwe ndiwe ukumubvunza". ¹² Apo, patche Iye adapomherha na wakulu wakulu na wadikoni, halibe kudaira. ¹³ Napenepo Pilato Adamubvunza: "Hausikubva kwense kupomherha kulisoso na Iwe?" ¹⁴ Apo Iye alibe kudaira nasoko libodziro, ese nadyali mukulu mukulu adagala wakuchamisika. ¹⁵ Pakati paphwando, ukali musambo mukulu mukulu kulekerera nyaperezo mubodzi wakusankuliwa nambumba: ¹⁶ Panguwa eneyo, iwo wakananyaperezo mubodzi wakudziwika maningi, anadaidziwa Barabasi. ¹⁷ Napenepo, pawo iwo wakadaungana wense, Pilato adawabvunza: "Mulikuda kuti ine ndikurekerereni wani? Barabasi kana Djeso, anadaidziwa Kristu?" ¹⁸ Thangwe akadziwa kuti Wakadamupereka nabibvu. ¹⁹ Patche iye akadagala pambuto iyautongi, mukadzi watche adamutumira masoko atchilanga: "Hamusapindiri watendeka uyu; thangwe nyamuntsi, pakulota ndabonera pamusana patche". ²⁰ Wakulu wakulu nawadikoni wadafulira mbumba wakumbire Barabasi, ese Djeso aulaiwe. ²¹ Mukulu mukulu adawabvunzisa: "Pawairiwa mulukuda kuti ine ndikurekerereni wani?" Iwo wadalanga: "Barabasi". ²² Pilato adawabvunza: "Zvinadikana kuti ine ndiitetani na Djeso, anadaidziwa Kristu?" Ese wense wadadaira: "Mukokomerereni". ²³ Ese iye adati: "Zvipi zvakunyanga zvatcheIye aita?" Apo iwo wadakhuwazve nantsimba: "Ngakokomererhe". ²⁴ Napenepo, patche pilato adawona kuti angadakwanisalini kuita tchinhu ese nyonganyonga ikatangisa, iye adatola madzi, adasamba manja pamberi pambumba ese adalanga: "Ine ndine wakutchena pagazi la mwamuna uyu; izvi nswanu wenekatchiro". ²⁵ Ense mbumba idalanga: "Gazi Latche ngaliuye kuna ife na wana wathu". ²⁶ Napenepo iye adalekerera Barabasi, apo adanera Djeso futi adamupereka kuti akokomererhe. ²⁷ Napenepo masodja iya mukulu mukulu wadamutola Djeso wadamuendesa mukati mwanyumba, ese wadaungana wamutiti wamasodjo. ²⁸ Iwo Wadamudura ese wadauiga nguwo zichawa Kunaiye. ²⁹ Napenepo wadaita nkata iyaluwa ese wadaiga pamusolo Patche, na munhu mubodzi kuboko Latche lamarjo, ese iwo wadagodama pamberi Patche ese wadatuka Kunaiye, watchilanga: "Zviponese Mukulu wamadjuda!" ³⁰ Futi, watchipfira Kunaiye, wadabata munhu unangoyo ese wadamunera musolo Watche. ³¹ Uku watchituka Nunaiye, Wadamubudisa nguwo zichawa, Wadamutsimiza nguwo zawo tchaizo, ese wadamutora kwenda kamukokomerera. ³² Pakubuda, iwo wadawona mwamuna mubodzi waku Cirene anadaidziwa Simawu, wawo wadamanikidza kudzusa mutchinjikwa Watche. ³³ Iwo wadaswika mbuto inadaidziwa Golokota, kuti zvinalanga "Mbuto iya Caveri". ³⁴ Wadamupasa vinyu idasanganiziwa nandulu; apo patche adairaira, halibe kuimwa. ³⁵ Pawo wadapeza Kumukokomerera, wadagawana pakati pawo nguwo Zatche, wadathusa soloti; ³⁶ ese, wadagala penepo watchimulindira. ³⁷ Futi wadaiga padzaulu pamusolo Patche kupomherha kwakuti kukada nembiwa: "UYU NDIYE DJESO MUKULU WAMADJUDA". ³⁸ Mbava ziwiri zidakokomererha pabodzi naIye, mubodzi kumarjo Kwatche ese unango kuzvere Kwatche. ³⁹ Wenewale kuti wakapinda, wakachola Kunaiye, watchitekenyesa musolo ⁴⁰ ese watchilanga: "Iwe, kuti ungadafudza thembere ese utchirilonza npantsiku zitatu, Zviponese Wega mubodzibodzi. Ungati Iwe ndiwe Mwana Wamulungu, tchitha Pamutchinjikwa". ⁴¹ Zvibodzibodzizvo, wakulu wakulu wakalipo watchichola Kunaiye pabodzipo nawanembi nawadioni, ese watchilanga: ⁴² "Iye adaponesa wenango, apo azvikwanisi Kuzviponesa Kunaiye mubodzibodzi. Iye ndiye Mukulu waIziraeli! Kuti Iye ngatchithe tchintchino pamutchinjikwa, ese ife tinatenda Kunaiye. ⁴³ Iye adathemba Mulungu; kuti Mulungu Ngamutole tchintchino, angati Anamuda muche, thangwe Iye adati: 'Ine ndine Mwana wa Mulungu'". ⁴⁴ Ese mbavazo kuti zikada kokomererha na Iye basi Wakamulanga kutuka kubodzibodziko. ⁴⁵ Kubudira nguwa iya tchitanhatu kuswikira nguwa iyatchi pfemba, Mudima udauya pantsi pense. ⁴⁶ Paduze nanguwa iyatchipfemba, Djeso adakuwa napfala likulu ese adati: "Eli, Eli, lama sabakatani?", kuti zvinalanga: "Mulungu wangu, Mulungu wangu, thangweranyi Mandisia?" ⁴⁷ Pawo wenango wakalipenepo wadaema wadabva izvi, wadalanga: "Iye alikudaidza Elia". ⁴⁸ Tchiriporipotcho mubodzi watche adathamanga, adabata tchinsakala, wadatchidzaza vinagri, wadaiga pantsonga iyamhasa, ese Wadamupasa amwe. ⁴⁹ Wenango wadalanga: "Musiyeni ega, mbatiwoneni kuti elia atchauya Kamuponesa". ⁵⁰ Napenepo Djeso adakuwa paswa napfala likulu ese adapereka muzimu Watche. ⁵¹ Ese wonani kuti nguwo iya muthembere maphisi mairi kudzaulu kwenda kunyansi; pantsi padatekenyeka, ese mitumba idakwecheka. ⁵² Nhutu zidavulika, ese mwiwiri iyawakutchena wazinji, kuti ikadagona, idamusiwa. ⁵³ Iwo wadabuda munhutu pawo wadapeza kumusiwa Kwawo, wadapinda muluwani lakutchena ese wadawoneka kuna wazinji. ⁵⁴ Patche mukulu wamasodja na wenewale kuti wakalindira Djeso wadawona kutekenyeka nazvinhu kuti zvikadaitika, wadagala naurtchimaningi ese wadalanga: "Tchadiko uyuakali Mwana Wamulungu". ⁵⁵ Wakadzi wazinji, kuti wakatewera Djeso kubudira kuGalilea kuti Wamutsidzire, wakalipo penepo, watchilingisa nakutali. ⁵⁶ Pakati paiwo, Maria Madalena; Maria, mai waTiago na Zuze; na ai wawana waZebedia. ⁵⁷ Tchakumaulo, adauya mwamuna mubodzi mupfumi waku Arimatea, anadaidziwa Zuze, kuti akalimubodzi watche wawapfunzi wa Djeso. ⁵⁸ Iye adafedzera kuna Pilato ese adakumbira mwuwiri wa Djeso. Napenepo Pilato adatendera kuti aupasiwe. ⁵⁹ Zuze adatola mwuwiri, adaufumbukidza ibodzi iyakutchena iyamuche ese ⁶⁰ adaiga munhutu iyatche iswa, kuti ikadatcheriwa pabuwe. Kumasure iye adagulumundisa buwe likulu pamberi pamusuwo wanhutu ese adaenda zvatche. ⁶¹ Maria Madalena na unango Maria akalipo penepo, wakadagala pamberi panhutu. ⁶² Mangwana iyatche, kuti ikalintsiku iyakumasure kwakulongedzera, wakulu wakulu na wafalisi wadaungana na Pilato. ⁶³ Iwo wadalanga: "Tchangamire, mulikutitsalakana kuti patche Weneule munyengezi akadapenya, Iye adati: 'Pakupera ntsiku zitatu, ine ndinadzamuka'. ⁶⁴ Nazvinezvi tenderani kuti nhutu ilindirhe kuswikira ntsiku zitatu, kana napenepo wapfunzi Watche wangawauye, kaba mwuwiri ese watchibvunza mbumba: 'Iye amuka pawanyakufa'; ese uku kunyengeza kwakupezesera kudanyanya kupinda kwutanga". ⁶⁵ Pilato adawabvunza: "Tolani walindi, endani ese lindirani nhutu ninga zvamuche zvidakuthemerani. ⁶⁶ Watchienda iwo, wadaiga walindi panhutu, wadava buwe ese watchisia penepo walindi.