¹ Patche Djeso na wapfunzi Watche wakafedzera ku Djerusalema ese wadaswika ku Betifadji, ku Bango la Miolivi. Penepo Djeso adatuma wapfunzi wairi, ² atchiwabvunza: "Pindani pa luwani liri paduze ese tchiripo ripotcho munawona donki na kamhulu katche. Phudzumulani ese uyisani kuna Ine. ³ Munhu anakubvunzani zvinhu pamusaa paizvi, langani: 'Tchangamire alikulida futi tchintchino titchalihirinza". ⁴ Izvi zvidaitika kuitira kuti zvitewezeke zvire zvidalangiwa na maprofiti, kuti adati: ⁵ "Bvunzani mwana wa Zioni: 'Wona Mukulu Wako alikuuya kuna iwe, zvakuzvitcheswa ese alipadzaulu pa donki, na kamhuru, mwana watchifuyo tchamutolo'". ⁶ Napenepo wapfunzi wadaenda ese wadaita ninga zviwapfunzisa Djeso. ⁷ Iwo wadauyisa donki na kamhulu, ese wadaiga nguwo zatche pazvifuyo futi Djeso adakwira. ⁸ Mbumba izinji idamwaza nguwa zawo munira, ese wenango wadagwanda mithayi iyamiti futi watchimwaza na njira. ⁹ Mbumba kuti idapinda kumberi kwa Djeso na wenewale kuti Wakamutewera, wakakuwa, watchiti: "Hosana kuna mwana wa Davidi! Tchidakombolerha nditcho tchinauya na dzina la Tchangamire! Hosana kudzaulu!" ¹⁰ Patche Djeso adapinda mu Djerusalema, yense luwani ikadatekenyeka, itchilanga: "Mbani wenei?" ¹¹ Mbumba idadaira: "Wenei ndiye Djeso, muprofiti waku Nazereta wa Galilea". ¹² Napenepo Djeso adapinda muthemberi ese adazinga wense wenewale kuti wakagula na kugulisa mwenemo. Adafudza tchigaziko tchamale iyawatchinjanisi futi namipando iya wenewale kuti wakagulisa njiwa. ¹³ Iye adawati: "Zvidanembiwa: ' Nyumba iyangu inadzadaidziwa nyumba iyakunamata,' apo imwe mulikuita buli lazimbava". ¹⁴ Ese mapofu na zvilema wadauya kuna Iye Muthemberi, futi iye adawawomesa. ¹⁵ Apo, pawo wakulu wakulu na wanembi wadawona midzaidzai kuti Iye adaita ese pawo iwo wadawona wana watchikuwa muthemberi futi watchilanga: "Hosana mwana wa Davidi", iwo wadagala wakugumbuka ¹⁶ ese wadalanga kuna Iye: "Iwe ulikubva zvirikulanga wanhu awa?" Djeso adawadaira: "Ande! Apo imwe tchipo mudaerenga: 'Pamiromo iya wadoko na wana kuti wanamama panabuda kukuza kwamuche?"' ¹⁷ Napenepo Djeso adawasiya ese adabuda muluwani kwenda ku Betania ese adapinda usiku kweneko. ¹⁸ Na tchakumatchibese, patche Iye adahirira kuluwani, akananzala. ¹⁹ Adawona wonde mumherera mwanjira; adaenda kuna iwo, apo halibe kuwona zvinhu mwenemo, kunza kwa masamba. Iye adati kuna muti: "Tchipo utchadza balaazve misapho kuna iwe". Futi tchiripo ripotcho muwonde udawoma. ²⁰ Pawo wapfunzi wadaona izvi, wadachamisika: "Thangwe muwonde udaawoma tchiripo ripocho?" ²¹ Djeso adadaira ese adawabvunza: "Tchadiko ine ndirikubvunzani: Mungatenda nkabe nhukwala, handidzaiti izvi basi zvaitika nawonde, apo munadzabvunza kuna bango iri: 'Buda ese dzithuse mukati mwa bala', ese izvi zvinadzaitika. ²² Zvense zvinhu kuti munakumbira pamunamato, mutchitenda, munadzatambira". ²³ Patche Djeso adapinda Muthemberi, wakulu wakulu na wadikoni wambumba wadauya kuna Iye, akati uku alikupfunzisa, ese wadalanga: "Nantsimba ipi unaita zvinhu izvi?" Futi mbani adakupasa ntsimba inei?" ²⁴ Djeso adadaira ese adawati: "Ine nditchakupasani mubvunzo ubodzi. Mungadidaira, ninga zvibodzibodzi Ine ndinadzakubvunzani nantsimba ipi ndina ita izvi. ²⁵ Kunyika kwa Juwau kudabuda kupi? Kudzaulu kana kuna wanhu?" Iwo wakagwengezana wogawoga wabodzibodzi, watchiti: "Ife tingalanga: 'Kudzaulu', Iye anadzatibvunza: 'Thangweranyi hamulibe kutenda kuna iye?' ²⁶ Apo, tingalanga kuna wanhu', ife tirikurtcha mbumba, thangwe wense iwo wanawona Juwau ninga muprofiti". ²⁷ Napenepo iwo wadadaira kuna Djeso ese wadalanga: "Ife hatidziwi". Iye adati kuna iwo: "Kana Ine handikubvunzini nantsimba ipi Ine ndina ita zvinhu izvi. ²⁸ Napenepo mulikufungani? Mwamuna mubodzi akana wana wairi. Iye adaenda kuna wakutanga ese adati: 'Mwana, enda nyamuntsi kasenza kumunda wangu'. ²⁹ Mwana adadaira ese adati: 'Ine handiendi'. Apo iye adadzatchinja nzeru iyatche ese adaenda. ³⁰ Futi mwamunayo adaenda kuna mwana watchiwiri ese adamubvunza zvinhu zvibodzibodzi. Mwana uyu adadaira ese adati: 'Ine ndinaenda, tchangamire', nazvinezvi iye halibe kwenda. ³¹ Pawana wairiwa ndie upi aita kuda kwa baba watche?" Iwo adadaira: "Wakutanga". Djeso adati kuna iwo: Tchadiko Ine ndirikukubvunzani: Walongosi wamisonko na zvikwachula zvinadzapinda mu Ukulu wa Mulungu kunza kwa imwe. ³² Thangwe Juwau adauya kuna imwe munjira iyatchadiko, apo imwe hamulibe kutenda kuna iye; uku walongosi wamisonko na zvikwachula wadatenda. Imwe, napenepo, wabodzibodzi mutchiwona izvi, hamulibe kuzvitsumba futi amulibe kutenda kuna iye. ³³ Ibvani mutsazaniso unango: Kukana mwamuna, mwenetchiro munda kuti adasima mivinyu, adaita tsose mumherera, adalonza mbuto iyatswinyira uva, adalonza thawale lawawonereri ese adapereka kuna walimi wamuvinhyu. Adapeza nkwenda kuzdiko linango. ³⁴ Payo idaswika nguwa iyakukonka uva, iye adatumira wenango wanyamubasa kuna waemereri wamuvinyu kuti atambire mauva iyatche. ³⁵ Apo walimi wamivinyu wadabata wanyamubasa wamwenekatchire, wadanera mubodzi, wadaulaya unango, ese wadaphaya unango. ³⁶ Katchiwiri, mwenekatchiro adatumira wenango wanyamubasa, kupinda pakutanga. Napenepo wanyamubasa wamivinyu wadawaita zvibodzi bodzizvo. ³⁷ Padapeza iwo izvi, mwenekatchiro adawatumira mwana watche tchaye, atchilanga: 'Iwo wanadzakhodza mwana wangu'. ³⁸ Apo, pawo walimi wamivinyu wadawona mwana, wadalanga pakati pawo iwo: "Uyu ndiye nyanhaka. Uyani, mbati muulaye ese titole nhaka". ³⁹ Napenepo iwo wadamubata, wadamuthusa kunza kwamivinyu, ese wadamuulaya. ⁴⁰ Tchintchino, patche mwenekatchiro mivinyu adahirira, adadzaitatani kuna wenewale walimi wamivinyu?" ⁴¹ Wanhu wadalanga kuna iye: "Iye adadzafudza wamuna wenewale futi anadzapasa wenango walimi, kuti wanadzamupasa zvatche panguwa iyakukonka". ⁴² Djeso adawabvunza: "Imwe tchipo mudaerenga zvinembwa: 'Buwe kuti walonzi wadalilamba lidadzagala buwe lapakona. Izvi zvidabuda kuna Tchangamire ese ndizvo zvidachamisa mumatso mwathu?' ⁴³ Napenepo Ine ndirikukubvunzani: Ukulu wa Mulungu unadzabudisiwa kuna imwe ese unadzapasiwa dziko kuti linabala misapho. ⁴⁴ Futi weneule kuti anada kugwa pamusana pabuwe iri anadzaphwanyiwa maphisa. Apo pamusana paweneule kuti iye anadzaligwira, wenei anadzatsokodoliwa". ⁴⁵ Pawo wakulu wakulu na wafalisi wadabva mutsazaniso Watche, wadateteka kuti Iye akalanga pamusana paiwo. ⁴⁶ Watchiswaga Kumusunga, wakarcha mbumba thangwe wanhu Wakamukodza ninga muprofiti mubodzi.