¹ Disiri ra an me ku na ka bi atê sê dingi wha tamali. ² Sy an ndji sê sa ku dolô, ngê ka poy anima un sy ê na sa nkênu ku fô ku leva ra an! ³ Sisika dy mora é ra ku, ma vizita, an na ka sa ku leva pe ka sa ne zi regozija. An kunfia ku gostô ô mé ku turu sê. ⁴ Sô sê sisika ny mémé aflison, ku leva koson, ku yô a wha whê. An na mesê pa sê sa ku dolô wha, sô kua é, an mesê konsê fundu amolê ku ntê ra sê. ⁵ Sy ngê zi sê sa ku dolô, na zi an wha, mazi ny whã ndira, turu sê, pa na sa mau. ⁶ Punison nkênu si é ra yô sa bua. ⁷ Whô, envêja dy punison, non ka poré pê sa buaru, pa ê na sa ku yô leva wha. ⁸ Anto ndji é whê dizu pê fa ku, fosa whê yô ngê ra amolê sê ra elê. ⁹ Ysié fô kua ma sisika, pa an kapoi pia kopendê ma sa ka ndé turu kua. ¹⁰ Sy nga pora nkênu é, sô nga pora ane nkênu. Peron, sê sa poraru whã kua, sa poraru punda, sê ny whê Kistu, ¹¹ Pa demono na ngana sê wha. Sô non na sa lifiron dy kua ô wha. ¹² Whã potô fô biriru ra Sun ma ba poson Troade pa plega Vangelhu Kistu. ¹³ Anda axé, na ta ku pazi Supitu wha, punda na bê ná amon un Titu wha. Anto an desa tô ba Masedônha. ¹⁴ Mazi, ngasa sa daru Dêssu, ku Kistu semple ka nda ku un turu ria. Ny katxi non. Ê ka whanga doxi aroma dy sebê rê ny turu nga. ¹⁵ Sô non sa dy Dêssu doxi pufimi Kistu, ma nkênu ku sa savaru mora nkênu ku sa muê. ¹⁶ Pa ku sa muê, sa whã aroma dy motxi pa motxi. Pa ku sa savaru, sa whã aroma dy vira pa vira. Ngê tê turu kuê é! ¹⁷ Sô non na sa mora ane nkênu ku ka bêndê lumba Dêssu ra luku whã. Turu kuê é, ku mora ma ka fa ny Kistu, mora ma ê manda Dêssu, a whê dy Dêssu.