¹ ताहा तिमाई बारा शिष्याला हादीन होग्गान होग्गा पुतडाल आने रोगे हारे केराआ सामर्थ अधिकार देदो ² आने तियाई तियान देवा राजु संदेश आखा खातुर आने रोग हारे केअेरा मोकले. ³ तियाई तियान आख्यो वाटाम जा खातोर काई बी मा ल्या नाहा लाकडी आने पिशवी आने माडो आने पौयसा ल्या नाहा आने बेन-बेन पोतडा जोड ल्या नाहा. ⁴ आने केलाबी कोओमे तुमाहा जा, तिईज ऱ्या आने तिहीने निगी जा. ⁵ जितेहे तुम्हाण अंगिकार नाहा केअते तोताहा विरुध्द तुमादा साक्षी वेअेरा जोजे तियाल तुमाहा नगरामने निगतीवेले तुमाहा पागा उदलो झोटककीन निगा ⁶ ताहा ते निगे बाद्दी ठिकाणे देवा गोठ्या आने रोग हारा केबते गावा गावाम फिरी गिया. ⁷ ज्या गोठ्या वेअतुल्या त्या उनाईन हेरोद राजो खुप घोटालाम पोडी गियो, काहाका “योहान मोअलाअमने उठ्यो” अेहकी खुप लोक आखतुला; ⁸ आने खुप लोक आाखतले “ ऐलीयो प्रागोट विईयो” आने बिहरे आखतुलो “जुना संदेष्टामाने अेडोएक उठ्याे” ⁹ ताहा हेरोदाई आख्यो, योहाना मुणको आय वाडी टोकेहे पेन जिईया गोठ्या आय उनाय रिईयो हाय ओ केअेडो हाय”? आने तो तिईयान तिला वेअेयतलो ¹⁰ फाछी प्रेषिताई फाछी आविन ज्या गोठ्या वेअेल्या त्या पुऱ्या आख्या ताहा तियाई तियान आरी लिईन बेथसेवा नावा गावाय एकवेले ली गोईओ. ¹¹ पेन त्यागोठील उनाईन ते विईयापाछला गिये. ताहा तिईया तो स्वागत लिईन तो तिईयान देवा राज्या गोठ्या आखा लाग्यो आने जिईया हारो वेअनु गरज आथी तियान तियाई हारे केअेये ¹² दिही बुडा आलो. ताहा बारा प्रषित आविन तियाल आखा लागे, लोकान वाटे लागवा दे, काहाका ते आहीपाही गावाम जाईन रिई दाने खावनू सोय केअेरी, काहाका आचु खेताम हाय. ¹³ पेन तिईयाई तियान तियान आख्यो “तुमाहा तियान खावनु दया. तियाई आख्यो आमाही जाईन ई लोका वाटो खावुन कायबी नाहा ली आला, पेन आमाहा पाही पाच माडा आने बेन मासल्या हाम बिहरो कायबी नाहा” ¹⁴ काहाका ते पाच हजार पुरूष आथा. ताहा तिईयाई चेलाला आख्यो, पाचास पाचास लोका पंक्ती तियान बाहाका”. ¹⁵ फाछे तिईयाई जेहकी होग्गान बोहावे. ¹⁶ तिईयाई पाच माडी बेन मासल्या लिईन उचे होरगा होवे विईन आर्शिवाद देदो. आने तिईया तुकडा किईन लोका टोलान दा खातुर चेलाल आख्यो. ¹⁷ ताहा हाेग्गा लोक माडो की ताराईन आने तिईयाई रिई गिईला माडा तुकडाकी बारा सिबल्या पोराई गिईया. ¹⁸ आने अेहकी विईओ तो अेखलो प्रार्थना केअतलो जाहा तिईया वेलो तिईया आरी आथा ताहा तिईयाई तियान पुछीन आख्यो, टोलामने लोक माल केडो हाय आखताहा? ¹⁹ पाछे तिईयाई उत्तर दिन आख्यो, बास्तिस्मा केअेनारो योहान पेन कोताक लोक आखता ‘ऐलियो’, आने कोताक आखता जुणा संदेष्टामने केडोएक पाछी उठ्यो. ²⁰ तियाई तियान आख्यो पेन पुन तुमाहा मान केअेडो आखताहा? ताहा पेत्राई तिईयाल उत्तर दिईन आक्ष्यो “देवाहा ख्रिस्त”. ²¹ पेन ई गोठ केअेडाल आखा नाहा अहेकी तिईयाई तियान आज्ञा देदो. ²² आने आख्यो “माआहा पाेयराई खुपच दु:ख वेठी आपु उचे लिईन मोडालोक आने मुख्य याजक लोक नियमशास्त्रा मास्तुऱ्या ईयाईने मायटाकाम आवी. आने तिसरे दिही पाछे उठावाम आवी ई विईनु हाय? ²³ आने तिईयाई होग्गान आख्यो “केडाल माआपाछाला आवनु इच्छा वेअेरी तिईयाई आपु बधंस्तभ (उचलीन) माआ पाछला चाला ²⁴ पेन जो केडो आपो जिव वाचावा होदेहे तो तियाल गोमावी दि पेन जो केडो मा केअेता आपो जीव गोमावी तो तियाल वाचाकी ²⁵ काहाका माआहाई होग्गो जुग मिलबीन आपो जिव गोमाव्यो आने आपो नाशा कई लेदो ते काय हारो विई? ²⁶ कोडोबी माआ आने माआ वोचना लाज तेरी, तिईयाकेअता लाज जाहा माआहा पोयरो तिईया बाहका आरी आने पोवित्र दुताआहा गौरवाकी आवी ताहा तेरी. ²⁷ आने आय तुमाल खेऱ्यो आखु, ईयामने ईही उभे रेअनारे अेहडी बी हाय, ते देवा राज वेअरा शिवाय तियान मोअनु नाय आवी? ²⁸ आने ई गोठ्या आखा फासला आठ दिहाकी अेहकी वेयो, पेत्र आने योहान याकोब ईयान लिईन तो प्रार्थना केअेरा डोगाप गीयो. ²⁹ तो प्रार्थना केअतलो ताहा तिईया मुया रूप बोदली गियो आने तिया पोतडे पाढे चोमकुनारे वी गिये. ³⁰ आने ताहा, बेन माआहे तिईयाआरी गोठया केअतले ते मोरो आने एलीया आथे. ³¹ ते तेजस्वी देखातला आने ज्या गोठ्या तो युरूशलोमा देशाम केअनाणो आथो त्या गोठ्या ते गोगतला. ³² ताहा पेत्रो आने तिईयाआरी आथे ते गोगतला. ताहा पेत्रो आने तिईयाआरी आथे ते निदीकी पोराय गिईला पेन दे पुरा उठी गिईया ताहा तिईयाई तिईय तेज आने बेन माआहे तिईयाआरी उभे आथे तियान वेअेये. ³³ ताहा अेहकी वेअेयो की तिईमाईने दुर वेअतला ताहा पेत्रााल ईशुही आख्यो. “ मास्तुऱ्या इही रेअवनु ओेतोल हारो हाय ताहा आमा तीन माडवा पाडु ताओखातोर एक आने मोशेखातोर एक आने एलीया खातोर एक” आपो काय गोगीरिईया तियान होमजुतलो ताय. ³⁴ तो ई गोठ्या केअतलो ताहा एक बादलो अविन तिईयाउचे सावाडीकेरा लाग्यो आने ताहा ते वादलाम तिही गिईया ताहा ते बी गिईया. ³⁵ आने वाआदलामने आवाज आलो तियाईआख्यो “ओ माआ निवडलो पोयराे हाय ईया तुमाआ उनाया” ³⁶ आने अेहकी विईयो तियामने केडालच त्या दिहाम आख्याे नाहा. ³⁷ आने केहकी विईयो बिहरा दिही ते डोगापने अेया उत्या ताहा माडो टोलो तियान मिला आलो. ³⁸ ताहा वेरा टोलामने एका माआहाई मोडाकी बाेबलीन आखा लाग्यो मास्तुऱ्या माआयु तुल पागे पाेडु माआ पायराल बे काहाका तो मा एकुच पोयरो हाय. ³⁹ आने वेअरा, केडो पुतडो तियाल तिईलेहे आने ओ बोबलेहे ताहा ईयाल तो अेहकी मोअडी देहे तिया मुयामने फेवदयो आवी जाय तो ईयाल खुप त्रारास देखाडे आने खुप टाईमाई ताहासोडीन लिगी जाय. ⁴⁰ आने तियामने तो काढाम आवा जोजे तियाल आय तो चेलाल विनंती केअई पेने तियाईकी नाहा निग्यो. ⁴¹ ताहा ईशुही उत्तर दिईन आख्यो, अे अविश्‍वास्य आने विपरीत पिढी, माई तुमाहा आरी कोअतेलुगू रेवु आने कोतोक तुमाल आखु ? तु तो पाेयराल इही ली आव. ⁴² ताहा तो पाही आवा लाग्यो तोतामुज पुतडाही तियाल अेठा पाडटाके आने खुब मोअडी टाक्यो, पेन ईशुही त्या अशुध्द आत्माला धोमकाव्यो आने त्या पोयराल हारो किईन तिईया बाहकापाही मोकल्यो. ⁴³ ताहा देवाही ई माहान सामर्थ्य विईन होग्गा लोक चकीत बी गिईया आने तो जी कामे केअेतलो त्या होग्गया गोठीप होग्गेलोक नोवाय केअेतलो ताहा तिईयाई आपो शिष्याण आख्यो. ⁴⁴ ई गोठ्या तुमरहर हाऱ्या इतकी थोवा काहाका माआहा पोयराल माआहा हाताम देवाम आवी. ⁴⁵ पेन ही गोगणु तिईयान होमजुयो नाह आने तिईयान होमजाया नाय जोजे तियाल तिईयाईने गुत्प थोवाम आल्या. आने तेई गोठील पुचा बीतला. ⁴⁶ पाछी आपोमेने केअेडो मोडो हाय इयाललिन तियाम वादविवाद आलो. ⁴⁷ ताहा इेशुही तिईया मोनामेने गोठ्या जाईन एका हानापोयराल पाही हादीन पाही उभे केअेयो. ⁴⁸ आने तियाई आख्यो, जो केअेडो माआ नावा की ई बालकाल स्विकारी तो माल मानिली, आने जो केअेडो माआला मानिलीई तो तिईयाई माल मोकल्यो तिईयाल मानिलीई; काहाका तुमाहा होग्गामने जो होग्गाईने हानाे हाय तोज माडो हाय. ⁴⁹ ताहा योहानाही आख्यो हे मास्तुऱ्या, आमाही केअेडो ऐकाल तो नावाकी पुतडे काजाडता देख्यो, आने आमाही तिईयाल तेहकी केअेरा नाहा आख्यो काहाका तो आमाआरी तो पाछला नाहा चालतो. ⁵⁰ ताहा ईशुही तियान आख्यो तिईयाल मना नाहा केअेरा काहाका जो तुमाला अनुकूलहाय . ⁵¹ आने अेहकी वेअयो तियाल उचे लिई जावनु टाईम पाही आलो ताहा यरुशलेम गावाम जा खातोर तिईयाई आपो जावणु मान किईन आपो मुय वोलण्यो. ⁵² ताहा तिईयाई आपो आगला निरोप कमळलाण्यो, ताहा ते गिघीन तिईया खातोर तियारी केरा खातुर शोमरोना गावाम गिईया. ⁵³ पेन तिईयान तिईयान माने नाहा, काहाका यरुशलोम गावाही जावणु तियान बंदी आथी. ⁵⁴ ताहा तिईया चेला याकोब आने योहान ई वेईन तियाल आखा लाग्या, हे मास्तुऱ्या ऐलीयाई केअेयो तेहकी बादलामने आग पाडीन इया नाश केयेरा तु आम्हाल आज्ञा केअे, अेहकी तो मोन हायका? ⁵⁵ पेन तिईयाई वोलीन तियान धोमकावीन आख्यो, तुमाहा केल्ला आत्मा हातुमान मालुम नाहा का ⁵⁶ काहाका माआहा पोयरो माहाआ जिवनु नाश केअेरा नाहा, ते तियाला ताआरा आलो हाय” पाछी ते बिहरा गावम गिये. ⁵⁷ आने ते वाटीपने चालतले ताहा एक केडो तियाल आख्या लाग्यो, “तिही बी तु जाहो तिही तो पाचला आय आवेहे” ⁵⁸ ताहा ईशुही तिईयाल आख्यो “आने वादलामेले विडाल कोरू हाय, पेन ताआहा पोयराल मुनको थवा केअता जागो नाहा” ⁵⁹ ताहा तिईयाई बिहरा एकाल आख्यो, “माआ पाचला आव, “पेन तियाई आख्यो, “हे मास्तुऱ्या पेहेले माल जादे आने माआ बाहकाल बुजा दे,” ⁶⁰ ताहा ईशुई तियाल आख्यो, मोअलाल आपो मोअलान बुजा दे, पेन जाईन देवा राजुखातोर घोषणा केअे ⁶¹ ताहा आजी एक आथालाग्यो, हे मास्तुऱ्या, माआयु तोपाछला आवेहे पेन पेहेलो माल माआ कोमेऱ्यान मिलीन आवा दे ⁶² पेन ईशुही तियान आख्यो जो केअेडो आवेताल हाथ लागविन पाछली गोठीही वेअतो रेहे अेहडो केअेडोच देवा राजु केअता उपयोगी नाहा.