¹ " Kenempat malaikat jemaat de Efesus tuleskolah: Nielah pembuikon Enye nyo memogong tujuh bintang de tangon kanon-Nye ngan bejelon de antaro tujuh kaki dian emas iye : ² Ake tahuko segelo pekerjaanme ngan jerih lelahme ngan ketekunonme, upamone kowe hopi tahan terhadop nyo jahat, ngan kowe menguji urang-urang nyo menyobut badannye rosul* hambuk sebonornyo mike bukonlah rosul, ngan mendepoti mike pelesu. ³ Kowe memilikih ketekunon ngan betahan demi namo-Ke ngan hopi menganal lelah. ⁴ Cuma hambuk, Ake menegurm ulenyo kowe lah meninggalko kasehme nyo semula. ⁵ Ulenyo iye, ingotlah deri mone kowe titek ngan betobat sereta lakuko ap nyo sodah kowe kerjako semula. Munye hopi, Ake bakal njongok kenempatm ngan mengambik kaki dianme deri tempatnye, mengka kowe betobat. ⁶ Cuma hambuk, nie nyo kowe milikih: Kowe keenluat perbuaton-perbuaton padong pengikut Nikolaus, nyo jugo Ke luat. ⁷ Enye nyo memilikih telingo biarlah mendongor ap nyo de kehatoko Roh* kenempat jemaat-jemaat. Kenempat enye nyo menang, Ake bakal memboriko makon deri betong kehidupon nyo ado de Taman Allah." ⁸ " Ngan, kenempat malaikat jemaat de Smirna tuleskolah : ⁹ Ake tahuko kesusahon ngan kemeskinon, hambuk sebonornyo kowe sugih ! Ake tahuko fitnah nyo de tunjukko kenempatme ule mike nyo menyobut diri urang Yahudi, hambuk sebonornyo bukon, meloinko sinagoge beles. ¹⁰ Jengon takut terhadop ape nyo bakal kowe derita. Kolehlah, beles bakal melemparko beberape deri kowe ke penjaro enggakkonyo kowe de uji, ngan kowe bakal mengalami penganiayaon selamo 10 ari. Setialah sampoi te'elek, ngan Ake bakal memboriko kenempatme mahkota kehidupon. ¹¹ Enye nyo memilikih telingo biarlah mendongor ape nyo de kehatoko Roh kenempat jemaat-jemaat. Urang nyo menang hopi bakal mendeita ule te'elek nyo kedua." ¹² " Ngan, kenempat malaikat jemaat de Pergamus tuleskolah : Nielah pembuikon Enye nyo mempunyoi pedang tajom bemato dua: ¹³ Ake tahuko de mone kowe tinggal, de tempat tahta beles berado; hambuk kowe bepogong podo namo-Ke ngan hopi menyangkal iman-Ke bahkan podo zaman Antipas, saksi-Ke nyo setia nyo de bunoh de antarome, tempat beles tinggal. ¹⁴ Cuma, Ake menogurme ulenyo ado beberap de antarome nyo mehilui ajoron Bileam, nyo mengajor Balak untok memotekko sandungon de depan anak-anak Israel*, untok makon makonon nyo de persembahko kenempat berhala* ngan melakuko doso-doso seksual. ¹⁵ Upanio jugo, ado beberape de antarome nyo bepogong podo ajoron Nikolaus. ¹⁶ Ulenyo iye, betobatlah! Munye hopi, Ake bakal enggakkonyo njongok kenempatm ngan memerangi mike dengan pedang deri mulut-Ke. ¹⁷ Enye nyo memilikih telingo biarlah mendongor ape nyo de kehatoko Roh kenempat jemaat-jemaat. ¹⁸ " Ngan, kenempat malaikat jemaat de Tiatira tuleskolah: Nielah Pemboekkon Anak Allah, nyo mato-Nye upa nyala api ngan kaki-Nye menyala upa tembaga delom perapian: ¹⁹ Ake tahuko perbuaton-perbuatonme, kaseh ngan imanme, pelayononme ngan kesabaronme, ngan bewo pekerjaan-pekerjaanme nyo teaher melampoi nyo pertamo. ²⁰ Cuma, Ake menegurme ulenyo kowe membiarko betina Izebel iye, nyo mengaku sebage seurang nabiah, mengajor ngan menyosotko pelayon-pelayon-Ke enggakkonyo berzina ngan makon makonon nyo lah de persembahko kenempat berhala. ²¹ Ake lah memborinye waktu untok betobat, hambuk eny hopi endok betobat deri zinanye. ²² Kolehlah, Ake bakal melemparko enye ke pucuk tempat tidur penderitaon ngan mike nyo bezina * dengannye bakal kelemparko ke delom kesusahon godong, mengka mike betobat deri perbuaton-perbuaton betina iye. ²³ Ngan, Ake bakal membunoh anak-anaknye dengan kemation; ngan segelo jemaat bakal mengetahui bewo Akelah nyo menguji pekeron ngan hati urang, ngan Ake bakal memboriko kenempatme maseng-maseng menurut perbuatonme. ²⁴ Cuma, kenempat kowe nyo loin de Tiatira, nyo hopi mehilui ajoron nie, nyo bolum mengetahui resio-resio beles, Ake ngehatoko: Ake hopi bakal memotekko bobon loin ke pucukme. ²⁵ Cuma hambuk, bepogonglah terus podo ape nyo lah kowe milikih sampoi Ake njongok. ²⁶ Ngan, kenempat urang nyo menang ngan melakuko pekerjaon-pekerjaon-Ke sampoi aher, Ake bakal memboriko kuaso pucuk bengeso-bengeso, ²⁷ Ngan mike bakal memerentah bengeso-bengeso iye dengan tungkat besi; de hancurko bekepeng-kepeng upa tembikar tukang periuk, ulenyo Ake jugo lah menerimo kuaso deri Bepa-Ke. ²⁸ Ngan, Ake bakal memboriko kenempatnye bintang timur. ²⁹ Enye nyo memilikih telingo biarlah mendongor ape nyo de kehatoko Roh kenempat jemaat-jemaat."