¹ Dolor-dolorke, jengon ado neman de antarome menjedi guru ulenyo kowe tahu bahwa kite nyo mengajor nak dehakemi ngan okoron nyo lobeh berat. ² Kite segelo besaloh delom neman hal. Munye ado urang nyo hopi perenah besaloh delom perkataonnye, ye adolah urang nyo sempurna, nyo jugo mampu mengendaliko segeloh badan. ³ Kite memasong kekang podo molot kudo empoknyo mike menang kite, ngan kite jugo mengendaliko segelo badan kudo. ⁴ Kelek jugo kapal-kapal, meskipon mike sajo godong ngan degoroko uleh angen nyo kuat, kapal iye dekendaliko uleh kemudi nyo sajo kecil, ngan nak lari ke mone pun juru mudi menghendokinnye. ⁵ Demikian jugo, lidah adolah bageon nyo kecik deri badan, cuma lidah depot menyombongko hal-hal godong. Kolelah alangko luasnyo hutan nyo sajo kecik. ⁶ Lidah iye upa api, sebuah dunia kejahaton, nyo detempatko de antaro bageon-bageon badan ngan nyo depot menajesko segelo badan. Ye menunu segelo arah hidop kite sementaro ye dewek detunu uleh api nderako. ⁷ Sabab, segelo jenis benatong liar ngan borong, reptil ngan benatong nyo hidop de lout iye jinok ngan lah dejinakkoh uleh mendesio, ⁸ cuma hopi seurang pon depot menjinakkoh lidah. Lidah adolah nyo jahat nyo hopi depot tenang, ponoh ngan racon nyo mematikoh. ⁹ Ngan lidah kite memberkati Tuhan ngan Bepa kite, cuma ngan iye jugo kite mengotok urang, nyo deciptko serupa ngan Allah. ¹⁰ Deri molot nyo samo keluor pujion ngan kutukon. Dolor-dolorke, seharosnye hopilah upa iye. ¹¹ Apokah sikok mato aek depot mengeluorko aek manes ngan aek pahet pado saat nyo besamoon? ¹² Dolor- dolorke, depotkah kayu ara mehaselko buah zaitun; apo kayu anggor mehaselko buah ara? Demikian jugo, mato aek masen hopi depot mehaselko aek nyo segar. ¹³ Siapekah de antaro kowe nyo behikmat ngan bepengertion? Biarlah ngan sikapnye nyo beik, ye menunjokko perbuaton-perbuatonnye delom kelomboton ngan hikmat. ¹⁴ Hambok, munye kowe memeleki iri hati nyo ponoh kepaheton ngan ambisi nyo egois de delom hatime, jengonlah bangga ngan jengon bedusta melawon kebonoron. ¹⁵ Hikmat upa iye hopi toron deri pucok, cuma deri dunia, hopi rohani, ngan jahat. ¹⁶ Munye ado iri hati ngan ambisi nyo egois, de sane ado kekacauon ngan segelo macam perbuaton jahat. ¹⁷ Hikmat nyo jongo deri pocok, pertamo-tamo adolah murni, kemudion suka damai, lamah lombot, terbuka, ponoh belas kasehahan ngan buah-buah nyo beik, hopi membeda-mbedako, ngan hopi munafik. ¹⁸ Buah kebonoron detaburko delom damai uleh para pendamai.