¹ Perhatikolah behwa podo hari-hari teakher, maso-maso kesukaron akan njongo. ² Sabab, urang akan menjedi pencinta diri dewek, pecinta doet, pembual, sombong, penghujat, hopi taat kepodo indok bapak, hopi tahuko baterimoh kaseh, hopi suci, ³ hopi tahukoh mengasehi, hopi endok bedamai, endok memfitnah, hopi pacok mengendaliko diri, kejam, hopi mengendoko ape nyo beik, ⁴ penghianat, ceroboh, angkoh, lobeh mencintai hawo nafsu deri podo mencintai Allah ⁵ tekoleh saleh hambok menyangkali kuasonye. Jouhilah urang-urang upanie. ⁶ Sabab, de antaro mike ado urang-urang nyo menyusup ke delom jemaat ngan menawon betina-betina lamah nyo de boboni ngan lobot doso ngan nyeret mike ngan berbagai hawo nafsu. ⁷ Betina-betina upa iye recap belajor, hambok hopi perenah pacok sampoi kepodo pengenalon akan kebonoron. ⁸ Samo upa Yanes ngan Yambres nyo melawon Musa, upaiyoy jugo urang-urang nie nyo melawon kebonoron. Pekeron mike lah rosak ngan iman mike hopi tahan uji. ⁹ Cuma hambok, mike hopi pacok lobeh jouh lagi ulehnyo kebodohon mike akan nyato bage setiap urang, samo upa kedua orang iye. ¹⁰ Hambok, kowe lah mehilui ajoronke, caro hidopke, tujuon hidopke, imanke, kesabaronke, kasehke, ngan ketekononke, ¹¹ upa penganiayaon ngan penderitaon nyo kualami de Antiokhia, Ikonium, ngan Listra. Ake betahan delom penganiayaon, ngan Tuhan menyelamatkoh ake deri segelo iye. ¹² Sesonggohnye, segelo urang nyo endok hidop saleh delom Yesus Keristus akan deaniaya, ¹³ sedangkoh urang-urang jahat ngan para penipu akan menjedi lobeh borok lagi, mike menyosotkoh ngan desesotkoh. ¹⁴ Sedangko untok kowe, lanjotkolah ngan ape nyo lah kowe pelajori ngan lah kowe yakeni ulehnyo kowe tahu deri siape kowe mempelajorinye, ¹⁵ seupamone sjak kecik kowe sodah mengenal Kitab Suci nyo sanggop memborime hikmat kepodo keselamaton melalui iman delom Yesus Keristus. ¹⁶ Segelo Kitab Suci denapasi uleh Allah ngan bemanfaat untok mengajor, untok menyatakoh kesalohon, untok memperbeiki kelakuon, ngan untok mendedek delom kebenoron. ¹⁷ Ngan upanio, mendesio melek Allah akan cakap ngan deperlengkapi untok setiap perbuaton beik.