3 ¹ Quetlhencap elialheng'a, colpaijecja apualho'oc aniem'o apquelpasmecja Apuesque. Smac'ac anwempasecjo mocjom astalhesquescama astacja lhta njan aptalhescama secje lhta, manjeliasalhma altacjenwescacja astalhescama nac aniem'o ncoltacmelquesquesec jata apualho'oc apquelleng'o ta. ² ¡Ellajo ta enenlhet malha nac semjeng! Enenlhet meliamolhma nac apquenmac'a mota eltemesquesec circuncisión quetlhencap, coca mancaimelhcac etnancoc ma'a, ³ ncanec ennenco'o nengellelto nac nengellasennaicama Engiapom Neten aniem'o njan Apualhoc apanque, malha circuncidado ntac napaqtec ma'a. Nquellaqjama ennenco'o engellualho'oc aniem'o mongeliasqueiam Cristo Jesús, mongelleltemo ennenco'o ncolhec jengelleltacmelquescaso aniem'o nelieplauquescama aptaiancolha nac judíos. ⁴ Ewanque panque niecje moiascamec Engiapom Neten cacpota jetacmelquesquesec ascaniemjaicama aniem'o njan asieplauquescama aptaiancolha apancawec judíos, ⁵ circuncidado lhna lhta co'o acuaiacmo quelha 8 acnem asteiam, asto njan co Israelita apanque' asqueniem'o njan apquennemolhema Benjamin, asto hebreo panque'. Asto lhta njan aspasmecja fariseos apquellelto nac apquelieplauquescama aquiennactema nquec jenganemacja Moisés, ⁶ co'o lhta njan asto neten ejenquec asieplauquescama jenganemacja nac, asmenlhenaicama lhta njan apquellelto nac Jesucristo apquennemolhema m'a, mamma lhta enenlhet jenawacsec elhenec moieplauquecama jenganemacja Moisés. ⁷ Coca lhamacjo caselha lhta m'a acto lhta neten anquec aquiaspommalhca m'a coca mmasquec colhuawe nac aniem'o Cristo. ⁸ Ca lhamacjo caselha lhta m'a colhua coca mancollienna'ac, jawe ctonac caselha altacmelo nac asiecpelcanweiacmo nac Cristo Jesus apuesque ejencoc, asquelhacjanquec lhamacjo caselha lhta malha basura ntemac ma'a aniem'o lhta asmama tacja Cristo, ⁹ aspasmecjo njan ma'a. Asiengiecjec astema moiasqueiam ascanemo lhta aspeiwomo aniem'o lhta asqueliejecjo jemganemacja Moisés, colhua coca asiawec asto aspeiwomo aniem'o moiasqueiam Cristo. Jai', jetnescasquec aspeiwomo Engiapom Neten aniem'o m'a mongiasqueiam anac. ¹⁰ Asmac'ac aiawencasancoc mocjom asianweiacmo Cristo, asmac'ac na annancojo nema acmowama aclhatecjasqueiacmo lhnac Cristo, ntasec na annancoc aquientalhnema acuacmo asquetsepo aptemo lhta njan apcaniemjaicama m'a Cristo, ¹¹ netamen jata njan alhatecjanwomoc mocjom co'o m'a. ¹² Jawe njan aspeiwomo mocjom co'o ncaimelhquec aiecpelcoc mocjom Cristo, asquelienlhanacmec coca lhamacjo acnem aiecpelcanwomoc ma'a, ncanec apto lhta jeliequiescama co'o ma'a. ¹³ Quetlhencap elialheng'a, malha niecje ntac nelpaiwasemmalhca nenganiemjaicama nac, mowac co'o mocjom actacja nnelha aquiensasemmalhca la'a, asiaqjapquec coca mocjom monwescama metca ascammelhecjo netamen ¹⁴ cacpota awomoc actacja la nnelha malha aquiensasemmalhca la'a cacpota alhcac asnaqsepma Engiapom Neten apmajai'a jeiancoc, jeiawema lhta m'a aniem'o njan Cristo Jesús. ¹⁵ Jai', nengellelto la aliennactema mongeliasqueiam ntasec jata ncotnancoc atlhenaicama engellualho'oc ma'a astacja lhquec alheianma, coca napocja enenlhet nquetlhenquec apualho'oc moc actemacja m'a, Engiapom Neten jatoca eluetasquesec lhema caselha alhnacjo nquec ma'a. ¹⁶ Ntasec angelloca mota actacja la aquietnema mongiasqueiam. ¹⁷ Quetlhencap elialheng'a, elieplauques jata astemacja nac co'o, ellanjoc na napocja aptaiancolha apquetlhenquescama nac actacmanma, apquellelto nac apquelieplauquescama nentaiancolha nac ennenco'o. ¹⁸ Asmac'ac altacjenwescacja mota astacja lhta asquelleltennascama, asqueleclhanwecama neten colhuawe nac aniem'o mantec enenlhet apquelamelhaicama ania'a actacmanma actemacja apquetsepma lhta Cristo neten iamet actennescama, ¹⁹ coca enenlhet'awoc anac enactewasacpoc jata ncanec wanlha mota anmajai'o nquec apualho'oc ellanancoc caselha ncolatsecama apanco'oc apancawec, apquellacpec apquellanenco la caselha jenmancascama nac, wanlha mota atlheianma apualho'oc caselha acnaianco nac jenque'e nalhepop anac. ²⁰ Ennenco'o coca malha nellawacja neten, angellailhec jata elhiemoc jata m'a apto jengelluonquescama ta tep, apto njan apuesque engancoc Jesucristo. ²¹ Eliaqmoncasecjac jata mo'oc actemacja engiempeioc anac acmowana ncomasquenwomoc, jengellancoc jata njan engiempeioc acnema anmowanca'a ncoie, ca actemo nac apiocja m'a, apuanquec na enmama lhamacjo caselha aniem'o aquietnema apmopuana m'a.