4
Aptemescasenta coneng Jesús awesque queliacjameioc
1
Apecjesaianca lhnac Engiapom Neten Apualhoc
Jesus ma'a cacpota emjancoc aquieto m'a metquelha temma cacpota ncoiepconec na awesque queliacjameio m'a.
2
Apnaiacmec nac ma'a 40 acnem metca ptoma aptoma, mec anque nac ncaqjemac ma'a.
3
Ca acuai'o lhnac queliacjameio m'a,
acmajai'a ncoiepconec, lhna ntemac anemo:
— Jawe ta nque ngiapac lheiap apto Engiapom Neten apquetca, ¡nwa', etnescasecja no pan metaimong anac! — lhna ntemac anemo m'a.
4
Ca apcatemmoianca lhnac Jesus ma'a, lhna aptemac:
—«Jawe wanlha aptecamoc alliennactescama enenlhet'awoc cacpota ellocaja, lhamacjo apaioma njan Engiapom Neten aliennactescama enenlhet'awoc»
—
5
Netamen aquiantemecjo lhnac awesque queliacjameio' Jesus Engiapom Neten apnemacja m'a aquieto Jerusalen, ca anetquescaiacmo lhnac netne canquec ma'a,
6
lhna ntemac:
— Jawe ta nque ngiapac lheiap apto Engiapom Neten apquetca, ¡nwa', enelhtenta no coneng anac! Nietnec actalhesammalhca waccajac Engiapom Neten apaioma:
«Engiapom Neten jata ellapacsec Enenlhet Neten apanco'oc cacpota eltaqmelquesec enmoc tacja lheiap, cacpota mancotlaponquesec jata metaimong anac»
—lhna ntemac ma'a.
7
Ca apcatemmoianca lhnac mocjom Jesus ma'a, lhna aptemac:
—Ca ntac na waccajac Engiapom Neten apaioma jenque'e:
«Meiepcon Engiapom Neten apuesque apancoc lheiap»
8
Ca anetquescaiacmo lhnac mocjom awesque queliacjameio' Jesus lhema metaimong acuenactema netnec anque', nwetasquescanquec nac ma'a acnema nac apquelletsecama apquellawacja lhma nquec jam cacpota njan nema nac apquenmopuanca'a,
9
lhna ntemac anemo queliacjameio' Jesus:
—Elanjonojo, lhamacjo nac apquellawacja nac jeng allancoc jata lheiap apquelteclhei'o la aptapno'oc secjec ascammelhacja cacpota jetacnescasancoc aquietemo nquec — lhna ntemac.
10
Ca apcatemmoianca lhnac mocjom Jesus ma'a:
—Mma, congie ncotno emo'oc
«wanlha ntase etacnescasancoc cacpota njan elleliejecjoc Engiapom Neten apto apuesque» ca ntac lhennenga ania'a jenganemacja—
11
Netamen aquiengiecjo lhnac queliacjameio' m'a, ca apqueluai'o lhnac na Enenlhet Neten ma'a cacpota eltacmelquesec Jesus ma'a.
Apquempai'acjasecja Jesus apquetlhecmoscama ania'a actacmanma
12
Aplengai'ac nac Jesus Juan apquellauquescama iemmen angiapom apcaclhencasemmap ma'a, ca aptaqjemo lhnac iocjalhma Galilea.
13
Apmeiecjec nac secjec amanie na temma Nazaret, ca apiecanwecjo m'a apmeiecjo na temma Cafernaum, aquieto necja sanga Galilea, ca apnecjo njan ma'a. Apquellawacja coca m'a apancawec ma'a Zabulon annenga cacpota njan Neftali nnenga.
14
Nwai'ac nac acnem aptemacja aplheianma lhnac nanec secama ania'a nnenga Isaias:
15
«¡Cailhonojo lhepop co Zabulon aquieto necja aluata! ¡Cailhonojo lhepop co Neftali aquieto tep aluata jordan! ¡Cailhonojo lhepop Galilea apcacjaianquelha apquellelto metnanco judíos.
16
Apcacjaianquec enenlhet anco'oc aisecsec ienactescama lhma', coca eluetac jata aponmatma cacpota ncotsasolhma', aquiawai'a aponmatma alienmoma apquelloma nac coneng pesquesca ncoc nengetsepma»
lhnac nane ptemac ma'a.
17
Ca apquempai'o lhnac Jesus apqueltennaicama m'a, lhna aptemac:
—Elietasquesecjoc napaqta'a Engiapom Neten, ellanecja ta apualho'oc, ncanquetuac'ac acnem etnecjac apuesque Engiapom Neten —lhna aptemac ma'a.
Apquellawecama Jesús 4 enenlhet aptengiaicamoc quelasma
18
Apiaijecama lhnac Jesus necja sanga Galilea, ca apuetai'o lhnac Simon Pedro ca njan apialheng Andres ma'a, necsa aptengiaicamoc quelasma, ieplomo iama tetecco apancoc, wanlha lhna mota apquenmacmecama m'a.
19
Lhna aptemac Jesus apquellanemo:
—Jelieplomaja, aluatescasancoc jata aptengiaicamoc quelasma, etengiancoc jata colhua enenlhet jelieplecama la'a co'o—lhna aptemac apquellanemo.
20
Colhuawec anque nac apnenquenaicocjac iama tetecco apanco'oc ma'a, ca apquelieplecjo lhnac Jesus ma'a.
21
Aplhengecjec nac mocjom Jesus necja sanga m'a, ca apqueluetanweiacmo lhnac Santiago ca njan apialheng Juan, apquellaneicocjo iama tetecco apanco'oc conne loma nemmen, apiapma'ac nac na apquetlhelhma'ac Zebedeo. Ca apquellaweianca lhnac Jesus ma'a,
22
colhuawec anque nac apquelenteiapmac conne loma nemmen, apqueliengiecjo lhnac apqueliapom ma'a, ca apquelieplecjo Jesus.
Apquetlhecmoscama Jesús apentalhnema enenlhet
23
Apiaijecama lhnac Jesus lhamacjo iocjalhma Galilea, apquetlhecmoscanquec nac moclhema la apcacnecjelha judios m'a, aplheianmo lhnac ania'a actemacja apuesque Engiapom Neten, apqueltacmelquescaiacmec nac na lhamacjo actemacja anmasca apiempeioc ma'a.
24
Nlengammalhquec nac apuesai'a Jesus apnema apmopuana lhamacjo iocjalhma Siria, ca apqueliantemacjo lhnac lhamacjo anmasca apiempeioc napaqtec ma'a, nemmasquema, apquelletsentanie mota queliacjameio' acnactewascama, cacpota njan apqueletsepaicama, metca aptapno'oc, coca Jesus apqueltacmelquescaiacmec ma'a.
25
Man na ntec enenlhet apquelieplecama Jesús ma'a, apquelleniem'o co iocjalhma Galilea, Decapolis,
Jerusalen, Judea cacpota njan apcacjaianco tep aluata Jordan.