8 ¹ Nlhaniec anquec caselha asquetlhecmoscama, coca acto neten aquiaspommalhca m'a aptemacja apiau'acja nac sacerdote engancoc apto njan neten apanquec apiaspommap ma'a, ca nqueniemai'ac apnecjo' m'a neten aquieto Engiapom Neten aquiennacja apoctong aptanema. ² Aptemenwecjo njan sacerdote m'a apmacmeianca njan aquieto pa'at acpocquenammalhca apquelanai'a Apuesque, moc actema coca pa'at acpocquenammalhca nalhepop anac apquelanai'a nac enenlhet. ³ Lhamacjo apquellelto apqueliau'acja sacerdotes apqueliequiesammap cacpota ellancoc caselha nema acmescama, canjan aluanlhenmmalhca' nentoscama Engiapom Neten, ca nqueniemai'ac na Jesucristo ncaimommalhque lhta njan ellancoc lhema caselha Engiapom Neten. ⁴ Lhtema nac apnema colhuawe nac Jesus jenque'e nalhepop anac, metne lhta njan sacerdote ncanec apcacjanquec sacerdotes apquellaicamo mota Egiapom Neten caselha nema acmescama aniem'o njan aclheianma jenganemacja Moisés. ⁵ Coca sacerdotes nalhepop anac iama apquelietquesaicamoc alnemo m'a caselha acnaianco nac ma'a neten. Nnawec na m'a Moisés annenga necsa apmajai'a elana pa'at apocquenammalhca, lhnac nanec aptemac apcanemo Engiapom Neten: «Etacmelcaso ta apquelanai'a, eitquesamoc jata actacja lhta asuetasquescama m'a neten nalhma acjaiam» ¹ lhna aptema. ⁶ Neten anquec actacmanma m'a actemacja apmacmecama sacerdote Jesús, melhnoc ma'a sacerdote nenwanlha nac, ncanec apsoiacmo njan lhema alhnancoc apaioma nengellanemmalhquelha antancoc nellanei'o Engiapom Neten, ntasec anquec ma'a mancolhnoc lhennenga. Apsoiacmo njan alhnancoc apenescamo aplheianma Engiapom Neten, neten anquec actacmanma mancolhnoc na m'a lhennenga. ⁷ Lhta acto la acpeiwomo m'a nengellanemmalhquelha antancoc lhennenga nac, mancaimalhque lhta njan ma'a mo'oc alhnancoc nengellanemmalhquelha nac antancoc, ⁸ coca apuetai'ac nac nanec Engiapom Neten apqueltemacja enenlhet'awoc mancolpeiwomo, lhnac nanec aptemac ma'a: «Ncowomoc jatoca acnem asquelanai'a mocjom alhnancoc asqueltemacja etnancoc jellanei'o enenlhet'awoc co Israel cacpota njan Judá, ⁹ mo'oc actemacja m'a asquellanemacja lhta etnancoc jellanei'o lhennenga apquellelieijenca'a necsa asquelentepquesquecja lhta m'a Egipto, asqueliengiosquecjo asquenmentamo lhta njan apmeio'oc ma'a. Coca netamen asqueliengiecjo lhta ncanec ma lhta elleliejecjoc aspaioma m'a. ¹⁰ Coca netamen mocjom ma'a aclheianwecjo lhta ewalhoc alanac mocjom alhnancoc asquellanemacja etnancoc jellanei'o m'a, apecquenec jata jenganemacja ejencoc apqatco'oc, canjan malha astalhescama la apualho'oc, atnec jata njan co'o apquemjama apmanie apancoc canjan asquennemolhema ta atnejec. ¹¹ Mengiaimacpec jata enenlhet la apquetlhecmoscama apaioma lhema apanque nlho ca la njan apnemolhema apanque actemacja asuesai'a nac co'o, ncanec elianwomjoc jata asuesai'a aplhamacjo panquec, acuacjo apquetquietse panque canjan acuacjo metno apquetcoc. ¹² Alietnajoc jata napaqta'ac necsa meliamolhma, mancolheianwacjec jata njan ewalhoc aptaiancolha ncolatsecamana» ¹³ Jai, aplheianme lhta Engiapom Neten elanac alhnancoc nellanemmalhquelha antancoc nellanei'o m'a, acuaneiam coca ntemac ma'a lhennenga nac, acuaneiam anac quetsec ncaimelhcac ma'a acsepanenwaianlha.