2
1
2
1 14 iantelhcapa niecai'ac ma'a, ca nenmeiacjo mocjom Bernabe m'a Jerusalen, nentaicamoc amaica'a m'a. Asiantemacjo lhta njan Tito asquetlhelhma'ac ma'a.
3
4
5
2-6 Engiapom neten jepecjesaicamaja cacpota aniacjac mocjom ma'a, ncanec apqueluacje lhta Jesucristo apquennemolhema, apquelietnocjascama ania'a apqueleniem'o Jerusalen, cacpota jengellanamaja neltacja netlhengquescama necsa nelieplauquescama ania'a actacmanma aniem'o Cristo, jengelliennawe lhta njan ma'a jengellan'o apquelleltemo angelieplauquesec jenganemacja judios apanco'oc. Coca ma lhta angellasecjac ncanec nengelleltawe lhta quetlhengcap Galatas, etlhenquesec mocjom nema atlhecmoscama lhta apquetlhewai'a, ca m'a nema atlhecmoscama lhta quetlhengcap
coca acto jawe ngiapac anquec ma'a.
Neluacje lhta m'a Jerusalen, nellanquesacje lhta apquelanma apmaniaie' cacpota alpeiwescasecjac actemacja mota asquetlhecmoscama metno judios, ncanec man jata ngquec ngcollecoc apualho'oc asquetlhecmoscama nac, acjemo ntac asquetlhecmoscama lhta.
Mamma apquelemjama apmaniaie apto neten apanque napaqtec Engiapom neten, nennawec ennenco'o enmo'oc.
Coca m'a apquelanma apmaniaie nac mangjelleltennascamac aiaqmoncasecja mo'oc actemacja asquetlhecmoscama, ngquellecawe lhtoca apualho'oc ma'a. Ma lhta njan elleltoc Tito metno judio niecje eiaqtemenec quetsec necja atcoc apcammelhacja
.
6
7
7 Apqueluetai'ac apquelemjama apmaniaie nac apto Engiapom Neten jeiapascama cacpota alhenec ania'a actacmanma apiesecsec metno judios, coca Pedro apcapasammap ma'a elhenec apiesecsec judios apancawe'.
8
Engiapom neten apto apcapascama Pedro cacpota etlhecmocsec judios apancawe', jeiapascamo njan co'o atlhecmocsec metno judios.
9
Apquetlhenque mota Jesucristo apquennemolhem'a m'a, apquellelto neten apancawec Santiago, Pedro cacpota njan Juan, nquetlheianguacjawe lhta njan apualho'oc asto Engiapom neten jeiapascama, jengenme lhta njan tacja, jengelpaiwesangco enmeio'oc
, lhta ptac jengellano co'o cacpota njan Bernabe angetlhecmosancoc metno judios, coca m'a etlhecmosancoc apiesecsec judios apancawe.
10
Wanlha apquelleltawec mota angelpasmoc apquelto nac metca apquelletsecama, nellienlhanacme mota angellanac acto nac ma'a.
11
Necsa apuaiam Pedro ma'a iocjalhma Antioquia, ascammelhque lhta co'o m'a, ncanec aptemacja jawe aniem'o Jescucristo apquennemolhema.
12
Aptawocje lhta Pedro lheme Jesucristo apquennemolhema metno judios ma'a, netamen apqueluo'o judios apancawe' apquelapascama lhta Santiago, ca apqueliengiacjo lhta aptaweicocja lhemec metno judios ma'a, ncanec apcac alhta judios Jesucristo apquennemolhema m'a, aptengiaicamoc na mota apquelleltemo ngcoiaqtemennalhca atquetse aquieto apcammelhacja.
13
Apqueluetai'ac nac na napocja judios Jesucristo apquennemolhema' m'a, ngcolatsecama aptacja Pedro m'a, apqueliengiecjo njan Jesucristo apquennemolhema metno judios ma'a. Nnawec na Bernabe, ma lhta ngcolatsema njan aptacja m'a.
14
Asuet'ac co'o melieplauquescama actemacja jengetlhecmoscama Cristo, lhta stac ascano Pedro napaqtawec aplhamacjo enenlhet apquennemolhema Jesus:
—Lheiap Judio apanque', apiengiacje secje jenganemacja Judios, aptaweicocjo lhemec metno judios, ca songque apquetlhecmo Judios lheme', ca apqueliengiacjo aptaweicocjo lheme metno judios lhquec. Malha apqueliengecamoc lheiap apquelto Jesucristo apquennemolhema metno judios cacpota elieplauquesec jenganemacja apancoc judios, ca ctonac apqueliaqtemanma nac necja atcoc apquellammelhacja.
15
Lheiap Pedro judio apanque', co'o njan, jawe acto nac mo'oc apquellawacja nac enenlhet apqueltemenwecjo na lhma',
16
coca nelliawec ennenco'o mangjengeluongquesep tep jenganemacja engancoc anac, jawe ngiapac anque astacja nac, wanlha ngcaimelhquec mongeliascamec Jesucristo cacpota antancocjac nelpeiwomo napaqtec Engiapom Neten, cacpota jengenmecjac tacja Engiapom Neten ma'a, ca ncanec mongeliascamec ennenco'o m'a Jesucristo.
17
Apnec quelha enenlhet jengetlheianma la nengelto mangeliamolhma ncanec nengelleltawec jengeltemesquesec nengelpeiwomo aniem'o Cristo, coca mangcolietoc actacja apquetlheianma m'a, jawe aniem'o Cristo jengeltemesquescama mongeliamolha.
18
Nengellieplauqueso la mocjom jenganemacja judios, mangcoietoc ma'a.
19
Squelienlhaneiacme lhta aieplauquesec jenganemacja judios, asqueluatescamawec coca m'a, colhua coca asqueliajacjawe' Engiapom Neten. Malha niecje asquetsepma lheme Cristo neten iamet actennescama,
20
colhua coca asiepetcacjec Cristo, jemaicama njan, lhamacjo caselha asquelanai'a aniem'o moiasqueiam ma'a. Asiawe co'o awanje jeiamelaiam, apcaiancawe apmatnamo jeiacmonquescama co'o asquetsepma niecje.
21
Moltoc co'o aiengiecja lhamacjo actacmanma Engiapom Neten jelanei'o, wanlha apanquec ma'a aniem'o Jesucristo, jawe aniem'o jenganemcja apanco'oc judios. Mangcaimelhca angeliejecjo mocjom jenganemacja apanco'oc judios cacpota jengenmoc tacja Engiapom Neten.
Aimelhco la angelieplauquesec jenganemacja apancoc Judios, acjemo lhta ngcotnec apquetsepma Cristo—