4 ¹ Engiapom Neten apto apiamolhma jengellanei'o ennenco'o jengellaianco njan nenmacmecama nenlheianma ania'a actacmanma, mamma njan manjengeliaquaiam la angelpaiacsec ania'a actacmanma. ² Man na angellanencoc caselha la nelielhasquescamo jenmancascama nac, man na ntengiancoc na neliennenquescama la'a, mangeliaqmoncasecjac na mo'oc actemacja ania'a actacmanma nac netlheianma jengellaicamo lhta njan Engiapom Neten ma'a. Apiawec coca njan Engiapom Neten acto netlheianma iocjalhmec, apquelliawec na enenlhet'awoc ca ncanec na manjeliascamec ma'a. ³ Coca apquellelto nac menmaicamoc tacja ania'a actacmanma nelleltennascama, jata enmancoc ma'a aquieto nemmasquenwaianlha, ⁴ apqueliascacmec ma'a aniem'o awesque jenque'e nalhepop anac nqueltemescasquec malha ienaqtesalhma apaqto'oc, manconmac'ac eluetac aponmatema acto neten ancoie aniem'o m'a ania'a actacmanma nac aplhenammap Cristo apto acnema apmopuana, apnemo njan Engiapom Neten ma'a. ⁵ Mongetlhenalhcoc enganco'oc engancawec ennenco'o, netlhenquec coca apuesai'a Jesucristo apto apuesque aniemo njan nengellamelaiam ma'a, ca ncanec nentaianco njan jengellasennaicama quetlhencap. ⁶ Aptepquescanque lhnac nanec Engiapom Neten aponmatema necsa ienactesacja lhma, aptepquescanquec na aponmatema engellualho'oc anac cacpota ncoltetquesec enenlhet'awoc netlheno la'a ania'a actemacja aplhenammap Cristo, netamen ncotlhenec jata apualho'oc Engiapom Neten apto aquietnema aquiawai'a apmopuana m'a. ⁷ Ca ania'a actacmanma nac malha acto nac caselha acmennawe nque, Engiapom neten coca aplhatme panquec conne neliocja nac acmowana nac ncomasquenwomoc, acmowana nac ania'a actamanma nqueniemai'ac ma'a Engiapom Neten, jawe aniem'o ennenco'o. ⁸ Niecje aquietnema nquescama aquientalhnema, nietne coca njan aleljalhnecama engellualho'oc cacpota angenmasquecsec jata m'a, niecje njan aquietnema altaicama engellualho'oc, man coca jengellastengac ma'a. ⁹ Jengelmenlhenama njan cacpota jennactewacsec ma'a, nelliawe coca nnec jengeltacmelcaso, niecje malha nelpelapeiam aniem'o enenlhet jengelliengama, man coca jennactewascamac ma'a. ^{10 11} 10–11 Lhamacjo iocjalhma nenmancolha la'a jengeluetascasquec aquientalhnema enenlhet, ca actemo lhta njan Jesús apquellengasquesaianco aquientalhnema acuacmo apquellaqjo, ennenco'o njan ncaicama mota antequio'oc aniem'o nelpaiescama ania'a actacmanma, nelliawec coca nengiocja nac acmowana ncomasquewomoc ncolhatecjanwomoc jata necsa netsepma m'a, jawe ngiapac anquec ma'a. ¹² Quelha niecje antequio'oc ma'a nenmeiacjo la apiesecsec anac quetlhencap angelpaiescacjac ania'a actacmanma, ncacjoc coca angenmeianta cacpota etlhewancoc quetlhencap aquiennactema ennengiec mancotnenwaianlha nnelha. ¹³ Nellan'ac ma'a actemacja lhnac nanec aclheianma Engiapom Neten apaioma: «Moi'ascacmoc co'o ania'a, ca alheianmo njan» ¹ lhnac nane ntemac. Ennenco'o njan mongeliasqueiacmoc Engiapom Neten, ca netlheianmo nac na apuesai'a m'a. ¹⁴ Nelliawec na ennenco'o m'a apto aplhatecjasqueiam necsa apquetsepma Jesús, jata nja ncotnec ennenco'o m'a annaclhatecjawomoc jata m'a, quetlhencap najan, netamen angeluacjac jata njan napaqtec ma'a. ¹⁵ Lhamacjo nellengaianco nac aquientalhnema neluetai'a aniem'o nellienlhanmecamoc cacpota ncoltacmelquesquesc apquellaniemjaicama quelthencap ma'a, etlhewancoc jata njan jengamelaiam anac Engiapom Neten, ca aplhamenco la enenlhet ma'a, netamen elhamancoc jata njan aptaicamoc gracias Engiapom neten ma'a, ncotlheianwacjoc jata njan apualho'oc Engiapom Neten apto aquietnema aquiawai'a apmopuana. ¹⁶ Niecje acmasquema neliennactema neliocja nac, coca mancolhnancoc anmaiosac'ac engellualho'oc ncanec nelliawec engellualho'oc anac ncanantanquec na lhamacjo acnem aliennactema. ¹⁷ Nellengaianco nac aquientalhnema jenque'e nalhepop anac ncomasquenwomoc jata m'a, ca nenwascapo la m'a necsa nellengaianco nac aquientalhnema, nempenesquec cacpota ncoitec aquiennactema ennengiec aquiau'acja nquec caselha altacmanma m'a mancotnenwaianlha nnelha. ¹⁸ Ntasec mongeliawencasec alquetamecama engellualho'oc necsa nellengaianco aquientalhnema nalhepop anac ncanec ncomasquenwoc jata m'a, ntasec coca aniawencasoc atlhenaicama engellualho'oc caselha altacmelo m'a mongeluet'o mocjom, coca nelliawec jawe ngiapac anquec ncowac jata m'a, mancomasquenwomec jata njan m'a.