13 ¹ Anianta ta mocjom astaienta la amaica'a jam janet'olhema ta ncotnec asuecta jam, lhamacjo actemacja aquientalhnema ta alanecja co'o, wanlha coca apquellaimecpec apcanet, nlhco ca la apcanet'olhema enenlhet apqueluetaianco la caselha ncolatsecama acuetammalhca m'a. ² Asqueleltennasque lhta secje lhta astaiento lhta amaica'a jam, atnec jata aquiennactema aspaioma asquellanei'o apquellelto apquellanecamoc anac meliamolhma, alhenecjoc jata mocjom colhuawe nac, atnec jata asqueliennai'o asquellanei'o ³ Atnec jata aliatama malha Cristo, metca apqueliatecama lhta ncoiennactema necsa apiaqmoncasquesecja aptemacja la enenlhet, aquiennactema lhta apaioma m'a. ⁴ Malha lhta niecje meiennactema la necsa nema aliaqlhaclhema apmeio'oc apmanco'oc neten iamet actennescama m'a, colhua coca aploca mocjom aniem'o Engiapom Neten apmopuana. Ennenco'o njan malha mongeliennactema la'a ca actemo lhta njan Cristo, coca nelpasmecjac Cristo nqueniemai'ac neliennactema nac, jata angenmama nenmopuanca'a nac cacpota angeliennacteso nelpaqmeiasma angellanjoc quetlhencap jam. ⁵ Ellanjoc coca apualho'oc apancawe nac quetlhencap cacpota eliojoc aliennactema nquec quelha meliasqueiam Cristo, ncotlheianwacjoc jatelha njan apualho'oc ncolatsecama apquellanecamoc. ⁶ Ennenco'o coca ntasec lhta nellanecamoc caselha apiesecsec anac quetlhencap. ⁷ Colhua coca ennenco'o nengellelmalhnescasquec Engiapom Neten elpasmoc quetlhencap mellananquec jata mocjom caselha ncolatsecama, jawe ncollacjama engellualho'oc engancawec aniem'o netlhecmosecamoc ennenco'o, ncacjoc ncotlhenec apualho'oc enenlhet acjemo nenmacmecamaja apiesecsec anac quetlhencap, wanlha coca nengelleltawec ellanancoc caselha altacmelo quetlhencap. ⁸ Mancomajai'ac nac angellanancoc mancoietemo nac, nenmajai'ac coca mota angellanancoc aquietemo ncoie. ⁹ Jai, niecje mongeliennactema, ncacjoc coca nquelpaijacjec engellualho'oc ncanec melleija sonquec quetlhencap, nengelmalhnescasquec na lhamacjo acnem cacpota ncanantancoc aptaicamoc apquelpeiwomo. ¹⁰ Asnactalhescasquec waccajac anac astalhescama aquiennactema aspaioma amanie acuaiam jata ncotnec jam, cacpota moliennajec asquellanei'o asuactamo ta jam, ncanec jeianquec Engiapom Neten asientalhnemo cacpota ncoltacmelquesec apquellaniemjaicama quetlhencap, jawe asmajai'a anactewacsec najan. ¹¹ Jai, ntase, asqueltawec co'o ncolpaijecja mota apualho'oc quetlhencap jam, elienlhanmamoc jata mota eliawencasancoc apquelpeiwomo, eliatamo ta mota po'oc, elloca ta lhemec acnemo mo'oc apualho'oc, metca altaicama apualho'oc apiesecsec anac quetlhencap jam. Engiapom Neten apto ngiapon metca actaicama enwalho'oc, nengamelaiam angiapom najan etnancoc apquetlhelhma'ac amota. ¹² Elpaiwesacpo ta mota apancawec apiesecsec anac quetlhencap aquieplomo apquelpetsesammap apmalhempenec po'oc malha apquelialheng'a apancawe nac, canjan apquellapasac atlheianma apualho'oc engelialheng'a nac jenque'e. ^{13 14} Asqueltawec co'o apuesque Jesucristo ewaiwesenta mota nengiamolhma apancoc tacjaplhet'oc quetlhencap, jengamelaiam anac apancoc Engiapom Neten ncoltacmelquesquesec apquellaniemjaicama quetlhencap canjan Apualhoc apanquec ncotnanco mota atlhelhma'ac.