14
1
Quetlhencap elialheng'a, elienlhanmamoc jata apquellamelaiam po'oc, elienlhanmamoc jata njan nenmopuanca'a nac aniem'o Engiapom Neten, coca acto njan neten anquec aquiaspommalhca
m'a nenlheianma ania'a aniem'o Engiapom Neten.
2
Enenlhet apto la apmopuana eliatama apquelpaqmeiasma maniojo nac mocjom aplhenquec caselha aquielhammalhca m'a aniem'o apualhoc, apiawe coca njan Engiapom Neten aptacja apqueliatecama m'a, enenlhet coca meliojoc ma'a.
3
Coca enenlhet apto nac aplheianma ania'a aniem'o Engiapom Neten nempaioma apqueliojo nac enenlhet, apqueltacmelquescasquec apquellaniemjaicama m'a, apqueliatecjawec najan, apquelpaiesquescacmec
na apualho'oc Jesucristo apquennemolhema.
4
Apto la apmopuana eliatama mo'oc apquelpaqmeiasma maniojo nac, ntacmelquescasquec apcaniemjaicama apancoc apanque', coca apto la njan aplheianma ania'a aniem'o Engiapom Neten nempaioma apqueliojo nac enenlhet , apqueltacmelquesquescasquec apquellaniemjaicama Jesucristo apquennemolhema m'a.
5
Ntasec aplhamacjo apuanca'ac elpaqmetec apquelpaqmeiasma melijo nac mocjom, coca apcaimecpec apmopuana la elpeiwesecjac cacpota eliojoc, ncoltacmelquesquesec na apquellaniemjaicama Jesucristo apquennemolhema m'a, coca metco la apmopuana elpeiwesecja, ntasec na elpaqmetec nempaioma nque nac.
6
Ca ctonac ma'a, asmeianto la jam apiesecsec anac asto la amaica'a, acjemo ta ncotnec aliatama mo'oc nempaioma meliojo quetlhencap, meliejec jata njan ania'a aquielhammalhca aliatamaja, metlhoquiec jata njan apquelianweiacmo, meliejec jata njan ania'a aniem'o Engiapom Neten, meliejec na actemacja asquetlhecmoscama.
7
Nnawec na nenmaicama nac nennecmascama anco'oc iompa'at nlho ca la njan arpa, nenpaiwaso la nennecmasquescama nennecmascama meliojo nac mocjom, meliejec jata enenlhet'awoc.
8
Ca ctonac trompeta la'a, ncolhec acpaiwaso mo'oc actema acpaiwoma, jawe acpaiwoma aleltennascama quempocjacme la aplheiam, mancollapuanquec jata njan elpenesoc apquenmaicama quempocjacme la cacpota ennapacpoc ma'a.
9
Nnawec na quetlhencap jam apiesecsec anac, apquelpatmetenca la moc actemacja apquelpaqmeiasma meliojo nac mocjom, acjemo ta ncotnec ma'a, meliejec jata enenlhet ma'a.
10
Mantec apquelpaqmeiasma lhamacjo actemacja enenlhet'awoc lhmanquec jam, apquelliawec actacja apquelpaqmeiasma apquennemolhema apancawec apiesecsec ma'a,
11
coca apuacmo la m'a lhema po'oc enenlhet mo'oc apcawacja, meijec jata actemacja apquelpaqmeiasma m'a apuanlha la'a, apquellawacja apancawe nac ma'a meliejec jata njan aptacja apaioma po'oc enenlhet lhec.
12
Awanjec apquelleltemo ncolhnancoc quetlhencap apquenmopuanca'a aniem'o Engiapom Neten, coca ntasec elienlhanmancoc ma'a apquenmopuanca nac eltacmelquesquesec apquellaniemjaicama Jesucristo apquennemolhema.
13
Enenlhet apcapuanco la eliatama apaioma meliojo mocjom, ntasec coca m'a enmalhnama Engiapom Neten cacpota engiapuanac elpeiwescasocja apanquec enenlhet'awoc ma'a.
14
Ca ctonac co'o asqueliatenca la nempaioma meliojo nac mocjom, ewalhoc ejenque acpaioma, moijec na co'o m'a.
15
Ntasec nconmalhnanquec ewalhoc ejenque, ncaimelhquec coca njan aijoc ma'a, coca ntasec na aniojoc ma'a, ntasec na nconnecmacsec ewalhoc ejenque nac, ncaimelhquec coca njan aijoc ma'a.
16
Lheiap aptacnescasenco la Engiapom Neten mo'oc nempaioma meliojo mocjom aniem'o apualho apanque, mancollapuanquec na enenlhet elpasmecjac ellatemmoncoc actacja la apaioma m'a ncanec meliojoc ma'a, metnanquec jata njan lhemec gracias Engiapom Neten ma'a.
17
Ntasec quelha niecje njan ncotnec apquenmalhnoncoma lheiap, coca mancoltacmelquesquesec jata njan apquellaniemjaicama po'oc ma'a.
18
Gracias co stac Engiapom Neten ncanec aquietnema aquiawai'a asmopuana aliatamaja nempaioma moniojo, neten ajenquec co'o, aselhtec quetlhencap,
19
coca asuacjo la nempaioma alhancoc anac, ntasec aliequiacsec aliatamaja aquiaquatema nempaioma nque nac, jawe acto nac ma'a acuenactema mo'oc nempaioma nac maniojo.
20
Elialheng'a, metnamonquec malha acto nac nematcac mancoliamo nac, etnamoc coca malha apqueliawo nac apquenmopuanca'a nac ncolquetamama apualho'oc, etnamoc jata njan malha acto nac nematcac mancoltengiaicamoc anac ncolatsecama.
21
Ca actemo nac actalhesammalhca waccajac Engiapom Neten apaioma:
«Allapacsec jata po'oc enenlhet moc actema apqueliatecama cacpota etsauquesec ania'a actacmanma ejencoc apiesecsec anac ma'a asquennemolhema ejenque', ncacjoc jatoca manconmajec jata ellailhoc ma'a, lhna aptemac Apuesque»
22
Caselha acpelapquescama aniem'o neten nenmopuana nac angeliatama mo'oc actemacja apquelpaqmeiasma cacpota metnanco nac Jesucristo apquennemolhema eluetac Engiapom Neten apmopuana, mancaimelhcac eluetac Jesucristo apquennemolhema apancawe nac ncanec apquelliawec ma'a. Moc actema m'a nenmopuana nac angeltennama ania'a aniem'o Engiapom Neten, cacpota Jesucristo apquennemolhema eluetac Engiapom Neten apmopuana, jawe coca m'a metnanco nac Jesucristo apquennemolhema.
23
24
23–24 Quelha ncotnec na apcaqnacjo la quetlhencap nempaioma alhancoc anac jam, elpaqmetec quelha nempaioma meliojo nac, netamen ewac quelha amaica'a la'a meijo mocjom actemacja nenmopuana nac, nlho ca la lhema enenlhet metno Jesucristo apnemolhema, ncolhenec quelha apualhoc malha allanema quetlhencap ma'a. Coca apquelpaqmeto la quetlhencap nempaioma nque nac etlhenec actemacja ania'a aniem'o Engiapom Neten, eijoc jata njan aptancolha amaica'a m'a, elanjoc jata njan actacja apualhoc apanquec ma'a,
25
conne canquec jata njan etac apualhoc ncolatsecama m'a, cacpota elquenec na aptapno'oc ma'a, etacnescasancoc jata njan Engiapom Neten ma'a, eijanwomjoc jata njan jawe ngiapac anquec apnema apiesecsec quetlhencap ma'a.
Metca aquiennoma lhma necsa nemacnecjelha
26
Elialheng'a, jata apcacnacjo ta nempaioma alhancoc quetlhencap, ntasec ma'a napocja ennecmasancoc salmos, napocja ta njan etlhecmosancoc, napocja ta njan etlhenec Engiapom Neten apaioma, napocja njan elpaqmetama mo'oc nempaioma meliojo nac, napocja njan apquelpeiwesecja m'a. Elienlhanmamoc jata apqueltacmelquesquescama la apquellaniemjaicama po'oc.
27
Apquellelto la apquenmopuanca'a apqueliatecama mo'oc nempaioma meliojo, ntasec etnancoc wanlha apqanet nlho ca la apqanet'o lhema, nema apquelanmacja coca etnamoc, lhema ta njan etnec apquelpeiwesecja m'a.
28
Coca metco la apcapuanco elpeiwesecja, melpaqmetanquec napaqtawec Jesucristo apquennemolhema ma'a, ntasec epacmetquesacpo panque, wanlha toca njan Engiapom Neten ennac ma'a.
29
Apquellelto la njan apquenmopuanca'a nac etlhenec ania'a aniem'o Engiapom Neten, ntasec na etnancoc wanlha apqanet nlho ca la apqanet'o lhema, nema apquelanmacja coca etnamoc ma'a cacpota aplhamacjo ellailhoc, eliecpelcoc najan actacja apquelpaqmetecama m'a.
30
Lhema apjapac apqueltennanca la'a, apno la njan po'oc ma'a apmo la tacja ania'a Engiapom Neten, ntasec etnemecjac neten eiaqmonquesec ma'a elhenec ania'a actacja aplhewai'a.
31
Ntase ncotnec ma'a apcacnecja acnem anac apquelanmacja apquetlheno la ania'a aniem'o Engiapom Neten cacpota elianwomjoc, eluascapoc najan aplhamacjo apquellelto apquellailhemo m'a.
32
Apquellelto nac apquenmopuanca'a nac etlhenec ania'a aniem'o Engiapom Neten, ntasec secjec ellanjoc apualho'oc apquenmac'acja la eltejec cacpota mengiapsonquesec necsa apqueliatecama po'oc,
33
ncanec mancolcoc apualhoc Engiapom Neten necsa aquiennoma lhma la'a, coca acleclemo apualhoc ma'a metca aquiennoma lhma nac.
Ntasec elieplauquesec nentaiancolha na mota nengellelto nac Jesucristo apquennemolhema,
34
nqueluana'ac ncaimelhquec ncoluanmac necsa nemacnecja la'a, jawe alleltammalhquelha ncotnancoc ncolpaqmetama m'a, jenganemacja Moises anac aclheianma ntasec ncolleliejecjo mota anacteianca'a.
35
Coca mancoijo la nqueluana actacja nema altennaicama necsa nemacnecja m'a, ntasec ncolmalhnenwacjac atawa' aquieto acnemacja ncanec caselha jenmancascama m'a aliato la nqueluana necsa nemacnecja.
36
Enmamoc jata tacja jengetlhecmoscama nac, cotlheng jata njan apualho'oc jawe acteiapmacja Engiapom Neten apaioma apiesecsec anac queltlhencap, aplhaniec na apquetlhewaicamoc alpalhcammalhca aptaiancolha ania'a nac.
37
Aptec jata nquec lhema apjapac la aplhenammacpo panquec apto apsecama ania'a, apto njan apqueliejecjo Engiapom Neten Apualhoc, ntasec eiecpelcoc actemacja asquetlhecmoscama nac aniem'o apuesque engancoc jenganemacja apancoc,
38
coca manco mac'o la eiecpelcoc, etne ta apanque apmac'acja la etnec.
39
Quetlhengcap elialheng'a, elienlhanmamoc jata apquenmopuanca nac etlhenec ania'a aniem'o Engiapom Neten, ellanco ta njan eliatama mo'oc actemacja nempaioma meliojoc nac,
40
coca ntasec etnancoc actacmanma nac, nema apquelanmacja njan necsa nemacnecjelha la'a.