¹ Á tó Kristǝ e á bwìrhì. Rǝ̀myɛ́ ce, pyǎ-na kɔn dɛ̀bɛ́ rǝ̀ ŋwɛ́nɛ́ dɛ̃̌, ń gǝ́ jě Yi jǝ̀jĩ́ ni mǝ̀gã̌ mɔ́. ² Ce-nǝ tɛ̀bɛ́ rǝ̀ ŋwɛ́nɛ́ dɛ̃̌ mɔ́ pyǎ yò zù ába, s'á bǝ̀k'á yẽ̌ tɛ̀bɛ́ rǝ̀ ŋwɛ́nɛ́ cɛ yó mó pyǎ yò zù ába yé, ³ b'ǎ cùwǝ̀, sǝ á nyǔ mú tó Kristǝ mǝ shèè Yi wẽ́. ⁴ Wɔ́ Kristǝ ń wɔ́ á nyǔ mú. sǝ ń gǝ ká ń túwǝ́, rǝ̀myɛ́ yó, ámyɛ b'ǎ tó mo á zù ń zùwǝ́ y wẽ́. ⁵ Rǝ̀myɛ́ ce, vǔr-nǝ lũ w nyǝ̀ná nɛ́ á wẽ́: fwǝ̌l, ǹdǝ tùntùm-bǝywààlɛ, ǹdǝ́ búlǝ́ námmǝlwǎlsɛ, ǹdǝ́ shilǝ námmǝlwǎlsɛ, ǹdǝ́ nǝ̀cɛ̀ndɛ pyǎ kɔn lyɛ̃ cɛ ne, bǝ̀ nǝ̀cɛ̀ndɛ pyǎ kɔn lyɛ̃ cɛ nɛ mɔ́ n'ê twí è jǐrh ǹdǝ yi ta numbyíní yilǝ. ⁶ Wɔ́ rǝ̀myɛ́ rǝ̀ n'ê zɛ̃̀ Yi lyim ni ǹdǝ́ byɛ̀bɛ́ bǝ̀ t'â zwẽ rǝ̀ nyí ni mú. ⁷ Shãã ga, ámyɛ gǝ́ y'ǎ gwẽ̌ ŋwɛ́nɛ́ wẽ̀ ré rǝ̀myɛ́ wẽ́ yi ní, wɔ́ èta á y'ǎ n'á wɛ̀rhɛ́ nɛ́. ⁸ Sǝ èlǎsɛ̃́, yẽ̌-nǝ wẽ̀ ré tɛ̀bɛ́ èta mɔ́ nɛ: lyim, ǹdǝ́ jàn tumǝ, nèdǝ́ wu-bárhɛ́. Dwã tùùrhi ǹdǝ́ zɔ̀m-bǝywààlɛ bǝ mǝ̌ sǝ rǝ du á nyú w yé. ⁹ Á bǝ̀k'á gõ̀ kɔma á pǝ dwã nɛ yé, b'ǎ vùr á shãã ga tùntwǝ̃̀ǝ̃̀ né ǹdǝ kàmǝ̀-zù-dwã́ ta. ¹⁰ Sǝ èlǎsɛ̃́, kɔn nyɛ̌ ǹdǝ wɔ́ kàmǝ̀-zù-dwǝ̃̀ á k'á zù ta. Á jǐrh lyì-dùlǝ̀, byɛ̀bɛ́ bǝ̀ j'â wɔ́ nándùlǝ̀ twéé twéé, bǝ̀ nyɛrhɛ bǝ̀ nyɛrhɛ bǝ̀ vwǎrhna mɔ́, mùnì ga bǝ lwar ń pár náàcɛ̀nɛ́. ¹¹ Èta, Zhwifubá ǹdǝ́ byɛ̀bɛ́ bǝ̀ dǝ̀ Zhwifubá mó ga jǐrh kɔn rǝ̀dù; byɛ̀bɛ́ bǝ̀ gòm mó ǹdǝ́ byɛ̀bɛ́ bǝ̀ yǝ̀ gòm mó ga jǐrh kɔn rǝ̀dù; zhǝlǝ ǹdǝ́ gɔ-má ǹdǝ́ yómǝ́ ǹdǝ́ byɛ̀bɛ́ bǝ̀ cǐ bǝ̀ cìn mú ga jǐrh kɔn rǝ̀dù. Sǝ Kristǝ wɔ́ kɔn gakó, ń ŋwɛ́nɛ́ á gakó wẽ́. ¹² Yi só ába, rǝ̀ cír ába, mùnì ga á yǝ̀ rǝ̀myɛ́ lyì. Rǝ̀myɛ́ ce, ce-nǝ jàn nɛ́ á yǝ̀ nɔ̀nɔ̀-dǔr cìnǝ́, á swéné dwã. Yál-n cìn-lwǝl cìnǝ́ ǹdǝ́ lyì-nyɛ̀mɛ̀, ǹdǝ́ wu-bɔ̀nɔ̀ cìnǝ́, ǹdǝ́ cìn-pyɔ́nɔ́ cìnǝ́. ¹³ Zǝ-nǝ cìn-pyɔ́nɔ́ ǹdǝ́ dwã. Lò mǝ̀dù gǝ tú ń zhe zɔ̀mɛ̀ ǹdǝ́ ń dõ, s'á pǝ dwã suébri. Cǐnnǝ mó pɔ ába sǔbri. Áyɛ mǝ̌ s'á pǝ dwã sǔbri. ¹⁴ Sǝ kɔn du, swéné-nǝ dwã, bǝ̀ wɔ́ sónó ò n'ô ce nyì-dwìì námpúm yàl nɛ́. ¹⁵ Ce-nǝ yǝ̀-zùlǝ́ né nyɛ̀bɛ́ Kristǝ nǝ́ ń pɛ mɔ́ yǝ̀ á wẽ́. Wɔ́ yǝ̇-zùlǝ́ né nǝ̀myɛ́ yil Yi byẽ̀ ába rǝ ce á ŋwɛ́nɛ́ dwã yó, mùnì ga á jǐrh kɔn rǝ̀dù. Ce-nǝ rǝ̀ nǝ̀bán twéé twéé. ¹⁶ Yẽ̌-nǝ Kristǝ zɔ̀mɛ̀ rɛ́ jòm á wẽ́ námpúm. Byili-nǝ dwã nɛ, s'á cící dwã ǹdǝ́ surhǝ nyɛ̀bɛ́ nǝ̀ càn. Nú-nǝ núrh shɛ̀bɛ́ sǝ̀ n'ê shí Eshirhǝ náàcɛ̀nɛ́ sõ, ǹdǝ́ núrh dwi: gakó á m'á ce Yi nǝ̀bán ǹd'á wun gakó. ¹⁷ Kɔn dɛ̀bɛ́ gakó á n'á zɔ̀mà, ǹdǝ́ tɛ̀bɛ́ gakó á n'á wɛ̀rhɛ́, wɛ̀rhɛ́-na rǝ̀ gakó Cǐnnǝ Yezu yil ré yilǝ, á tó ńmyɛ̌ dɛnnɛ á ce nǝ́ Da Yi nǝ̀báná. ¹⁸ Ámyɛ̌ kana bɛ́, shɛ̀nɛ́-na á byinǝ bé nyí ni, bǝ̀ wɔ́ rǝ̀myɛ́ rǝ̀ wɔ́ Cǐnnǝ mó pùbùlǝ̀. ¹⁹ Ámyɛ̌ bala bɛ́, swéné-nǝ á kana bɛ́, s'á bǝ̀k'á gwirhi á yǝ́rh ǹdǝ́ bɛ yé. ²⁰ Ámyɛ̌ bǝ̀sɔ́ná bɛ́, cili-nǝ á dabá ǹdǝ́ á nábá zɔ̀mà kɔn gakó wẽ́, bǝ̀ wɔ́ rǝ̀myɛ́ Cǐnnǝ mó nǝ́ ń yàlá. ²¹ Ámyɛ̌ dabá bɛ́, á bǝ̀k'á kwè lyim twéé twéé ǹd'á bǝ̀sɔ́ná bɛ́ yé, mùnì ga bǝ̀ wun bǝ̀k'a gǝ yé. ²² Ámyɛ̌ tùntùnnǝ bé, shɛ̀nɛ́-na á yó-cìnǝ́ bé cɛ yó mó nyí ni kɔn gakó wẽ́. Shɛ̀nɛ́-na bǝ̀ nyí ni ǹd'á pùbùlǝ̀, á gǝ́ n'á nyàm Cǐnnǝ mú yilǝ. S'e bǝ̀k'a yǝ̀ bǝ̀ yírh dǔr dúdú yil á n'á shɛ̀nɛ́ bǝ̀ nyí ni, e jǐrh ǹdǝ wɔ́ numbyínsi nyí ni shɔ̀nɔ́ ta yé. ²³ Kɔn dɛ̀bɛ́ gakó á n'á wɛ̀rhɛ́ mɔ́, wɛ̀rhɛ́-na rɛ ǹd'á wun gakó. Á yě bǝ̀ wɔ́ Cǐnnǝ mó yil á n'á wɛ̀rhɛ́ rɛ, s'e dǝ̀ numbyínsi dúdú yil yé. ²⁴ Á yě b'ǎ m'ǎ nǝ cǝl kwǎndɛ nǝ̀cɛ̀ndɛ́ tɛ̀bɛ́ Yi cĩ́ rǝ̀ lyi bí ni mú wẽ́, bǝ̀ wɔ́ Kristǝ ń wɔ́ á yó-cǝ́bal mɔ́ cìcì mú; wɔ́ ńmyɛ̌ nyí ni á n'á shɛ̀nɛ́ nɛ́. ²⁵ Lò mɔ̀bɔ́ ǹ wɛ̀rhɛ́ lwɛlɛ, ǹ b'ǎ nǝ còrhò-tum rǝ̀ yilǝ; bǝ̀ lyì bí gakó kɔn rǝ̀dù Yi sono.