¹ Nan ŋilo jambu kulya ’dirigwoso ŋuto lo Kristo, nan ’bayin ’bu ’burönö; töili liŋ denet logon tiyu ko Mukölötyo Loke lo tuggö adi ² nan gwon ko delya a duma köyö i töili se ko mien nagon ti ’duddyö kwöŋ. Kogwon nan gwon ko pusök i kulya ti luŋasirik kwe logon a ŋutu kwe ti jur. Kogwon ko ködyö se bubulö lwökö, a bia ti Ŋun lömi löm ko ti korara nan kaŋo ko Kristo i mugun. ³ Kogwon nan ködyö ’de ’dekan adi ti Ŋun lömi löm nan ko ti korara nan kaŋo ko Kristo i mugun, anyen ködyö luŋasirik kwe logon a ŋutu kwe ti jur lwölwökö. ⁴ Lepeŋat a kötumit na Yisaraele; Ŋun a koŋdya lepeŋat a ŋwajik kanyit, a tiŋdi se minyo lonyit, ko tomoresi nagon nye a teten ko se i pirit na geleŋ kune, a tiŋdi se Saresi todinesi, se ko saresi kwakwasesi, ko a milyekin tiŋdu se ŋo na popo. ⁵ Lepeŋat a nyakwariat ti merenyejin temejik ti kokwe, a Masia köju gwe a lo gweyari lose, gwoso na gwoŋdi lepeŋ a ŋuto nu. Ti Ŋun logon a duma lo ŋo liŋ lo purani pura ŋupi ŋupi. Amen. ⁶ Ama ti gwon adi ŋo na milyeji Ŋun kune a jaran; kogwon ’bayin a nyakwariat liŋ ti Yisaraele logon a ŋutu ti Yisaraele gwak. ⁷ Köti ti gwon a nyakwariat liŋ ti Abarayama logon a ŋwajik kanyit gwak, kogwon a milyeki lepeŋ adi, Nyakwariat kulök mo pipiluŋdya ko Yisaka. ⁸ Ŋina kweja adi ti gwon a ŋwajik logon ŋutu lo yuŋ undyö kulo logon a ŋwajik ti Ŋun, ama ŋwajik logon yuŋwe i ŋilu milye kulo logon luŋu a nyakwariat ti Abarayama gwak. ⁹ Kogwon Ŋun a milyeju adi, Nan köti mo yiyitwe konut ni i diŋit na wulwe, a Sara mo yuŋuŋdye ŋuro lulalet. ¹⁰ Ama ’bayin a kine kulya ka ’de, kogwon ŋwajik murek ti Rebeka kulo ŋaŋu monye logon a Yisaka merenye likaŋ. ¹¹ Ama i ŋerot nagon kilo ŋwajik a ko nyuŋ yuŋwe, a gwe a ko koŋdya nene ŋo na ’but kode naron nu, ¹² a Ŋun takiŋdye ŋote adi, Kayu mo kitakiŋdya loponi. Kine kulya gwon sona anyen kwekiŋdya adi Ŋun ’de ’dekan wuluŋdyö ŋutu ti gwon i konesi kase, ama tuŋ gwoso nye a wakun luŋgu; ¹³ gwoso na tuŋge kulya ti Ŋun na wurö kune adi, Nan aje nyar Yakobo, ama a nan maŋdi Esau. ¹⁴ A kirut yi de kulyani ada? Yi kulya adi Ŋun ’bayin a lo rigwo le? ’Bayin sona kwöŋ. ¹⁵ Kogwon lepeŋ köju a takiŋdya Mose adi, Nan yayatakin ŋuto logon nan ’dek yatakiŋdya lo, a nan wone konyen ko ŋuto logon nan ’dek won konyen ko nye lo. ¹⁶ Nyena kine kulya ti gwon i ŋo nagon ŋuto ’de ’dekan kode ŋo nagon nye kökon, ama tuŋ gwon a kulya ti Ŋun i yatakiŋdya. ¹⁷ Kogwon a wurö adi Ŋun köju a kulya ko Paro adi, Ko ŋina kwe nan a ’bilikin do ki anyen nan kweja riŋit nio konut i mugun, anyen karin kwe böŋö kukuörö i kak ’bukuluŋ. ¹⁸ Nyena ko Ŋun a wakun i yatakiŋdya na ŋuto a nye yatakiŋdye yatakiŋdya, a ko lepeŋ ’de ’dekan togo ’yu töili lo ŋuto anyen gwon ti twöju a nye togo ’yi togo ’yu. ¹⁹ Ta köti ’dek pija nan adi, A ko sona ko nyo Ŋun gwon i yuyuggö na ŋutu? Ŋa logon ŋona bubulö renya ŋo nagon nye ’de ’dekan kune? ²⁰ Ama do ŋuto kana, do a ŋa anyen ŋetakiŋdya Ŋun kulya? Sape ŋona bubulö pija kagweyanit lonyit le adi, Ko nyo nagon do gweja nan sona? ²¹ Kagweyanit lo sapya ŋona ti konakiŋdya liŋo gwoso nagon nye a wakun le? Lepeŋ ŋona ti bulö gweyuŋdya sapya murek i liŋo geleŋ lo nutu, lele a minyotat se ko lele kitarikin abur le? ²² Ŋun ŋona a ko koŋdya ŋo gwoso kine le? Ma ’di ködyö nye ’de ’dekan kwekiŋdya woran nanyit i tiŋdu na riŋit nanyit i dena, lepeŋ a ŋoŋaddu diŋit a najo ko ŋutu logon towoŋa lepeŋ logon ködyö tutukara kulo. ²³ Lepeŋ koŋdya sona anyen kwekiŋdya tukworien na minyo lonyit i ŋutu logon nye ’dek won konyen ko se kulo, logon nye köju a tetenakin a ti minyo. ²⁴ Yi gwoso kilo sapya logon nye wowoji konyen kilo. Nye a ko lupuŋdya yi i kiden na Yudayaki ka ’de, ama nye köti a lupuŋdya yi i kiden na ŋutu ti jurön? ²⁵ gwoso na kulyari nye i buk na Osea nu adi, Ŋutu logon ’bayin a kwe kulo, nan mo luluŋ a ŋutu kwe, a nye nagon ti nyara na, a nan mo luŋgi a nyaratti nio. ²⁶ A i pirit na taki ’e se köju adi, Ta ’bayin a ŋutu kwe nu, i ŋinu pirit gwak a lepeŋat mo luŋuni a ŋwajik ti Ŋun lo gwon jörun. ²⁷ A Yisaya köju iŋge laŋa i kulya ti Yisaraele adi, Ma ’di ködyö ŋutu ti Yisaraele gwon jore gwoso sese na tör duma na ’balaŋ, tuŋ a pitönö ti lepeŋat ka ’de mo lo lwököni; ²⁸ kogwon Matat mo kokonakin ’de ’de i na kak ŋo nagon nye a jam adi nye kökon na, a mo tine karakin. Koti gwoso na kulyari Yisaya köju nu adi, ²⁹ Ko ködyö Matat lo kurumi a ko kölökin yi nyakwariat ku ’dik, a yi kodyö gwe gwoso Sodoma, a yi ködyo konani gwoso Gomora. ³⁰ A kirut yi de kulyani ada? Yi de kulya adi ŋutu ti jurön logon a ko ga ’yu tetenakiŋdya ’börik i gwon rigwo ko ŋun i komor kulo aje tetenaki a lo rigwo ko lepeŋ i komor kogwon yupet. ³¹ Ama kölumbö ŋutu ti Yisaraele logon ga ’yu i gwon rilo ko Ŋun i komor kogwon saresi kulo, kwöŋ gwe a ko ryö saresi logon tiŋdu se i gwon rigwo. ³² Ko nyo lepeŋat a ko ryö? Lepepat a ko ryö kogwon se a yinikin kitajin na ’but nagon se kökon kune, a gwe a ko ga ’yu tetenaki rigwo ko yupet. Lepeŋat a köpukö ko ŋurupit, ³³ logon kulya kanyit a jama i kulya ti Ŋun na wurö kune adi, Meddi, nan lo petakiŋdya ŋurupit Siona, logon a ŋurupit köpuket, ko a lurutat to ’dorowet; ama ŋuto logon a yubbö lepeŋ lo mo ti toyuö kwe.