¹ A yi kirut mo kulyani ada? Ti yi yeŋe gwon i toron anyen ’busan na nyaŋu na Ŋun boŋo babaraŋdu le? ² ’Bayin sona kwöŋ! Yi aje twatwa yi gwe ’bayin i kulya ti toron, a yi kirut yeŋe gwolor i toron kata ada? ³ Ta ŋona ti den adi yi liŋ lo batisa ko Kristo Yesu i mugun kulo a batisa anyen morakiŋdya i twan nanyit le? ⁴ Kweja adi ŋina batisimo nikao a tomorakiŋdya yi i twan nanyit, a yi iŋge nuka ko lepeŋ i pirit na geleŋ, nyena gwoso nagon minyo lo Ŋun Monye a toŋiju Kristo i twan na, a yi koti mo wöröni ko gwiliŋit ludukötyo. ⁵ Kogwon koyi a mora ko lepeŋ i twatwa gwoso na twaji lepeŋ nu, a yi mo köti mori ko lepeŋ i toŋiyu i twan gwoso na toŋiuri lepeŋ nu. ⁶ Kogwon yi deden adi yi ko töilyet kaŋ ti ’beron kulo a ’bikiki i ködini na göro ko lepeŋ i pirit na geleŋ, anyen töilyet lo toroŋdya kulo böŋö kakaŋu an yi koti yeŋon a ’dupi ti toron; ⁷ kogwon ko ŋuto aje twan a lepeŋ tine ’duŋöki putet lo toron. ⁸ Ama koyi a twatwa ko Kristo i pirit na geleŋ, a yi yubbe adi yi mo köti ruru ko lepeŋ i pirit na geleŋ. ⁹ Kogwon yi a den adi Kristo a toŋiyu i twan, a lepeŋ mo köti tine twan kwöŋ; a twan köti gwe ’bak riŋit ko lepeŋ i mugun. ¹⁰ Kogwon twan nagon nye a twaji na, lepeŋ twakin i kulya ti toron daŋ geleŋ, ama gwiliŋit logon nye gwigwiliŋgi lo, lepeŋ gwilipara alo Ŋun. ¹¹ Nyena köti dene ta den ’börik adi ta aje twatwa a gwe ’bayin i kulya ti toron, ama ta gwilipara jörun a ti Ŋun ko Kristo Yesu i mugun. ¹² Nyenagon ti toron gwe ti tumatyan kasu i mugunya na ’bu ’burön kine, anyen tiŋdu ta i twöju na ’dekesi ti kine mugunya. ¹³ An ta ko tikin ta toron kulye swötön ti mugunya kasu gwoso tito kitaesi ti kulya narok, ama tiŋdi ta Ŋun ’börik kasu gwoso ŋutu lo toŋiyu i twan, tiŋdi ta Ŋun swötön ti mugunya kasu gwoso tito kitaesi ti löti lo rigwo. ¹⁴ Kogwon toron agu ködyö ti tumatyan ko ta, kogwon ta ’bayin gwolor i twöju na saresi, ta gwolor i twöju na ’busan na nyaŋu na Ŋun. ¹⁵ A kirut gwe ada? Yi ŋona tentoroŋdya kogwon yi ’bayin gwon i twöju na kilo saresi ama yi gwon i twöju na ’busan na nyaŋu na Ŋun le? ’Bayin sona kwöŋ! ¹⁶ Ta ’diri deden adi ko ta a tiŋdu ’börik gwoso ’dupi i kitakiŋdya ko i twöju na lele ŋuto, a ta ’diri gwe a ’dupi ti lepeŋ logon ta twötwö lo. Ko ta kitakiŋdya toron, a ’dutet nanyit gwe a twan, ama ko ta a katwöyök ti Ŋun, a ’dutet nanyit tiŋdi ta i gwon rigwo kanyit i komor. ¹⁷ Ta köju a ’dupi ti toron, ama tinate lo Ŋun kogwon ta soŋinana aje twöju ko töilyet kasu liŋ gweyari lo todinet nagon aje todiniki ta na; ¹⁸ a ta iŋge yukwe kaŋo i toron, a iŋge wora a ’dupi ti löti lo rigwo. ¹⁹ (Nan ŋilo jajambu gwoso ŋuto kogwon tomunyan na mugunya kasu.) Kogwon ta köju a tiŋdu ’börik gwoso ’dupi ti tolutan koi renya na saresi, kine ŋo liŋ tiŋdu ta i koŋdya na kulya narok. Nyenagon köti tiŋdi ta ’börik gwoso ’dupi ti löti lo rigwo logon joŋga ŋuto i kelan. ²⁰ Na gwoŋdi ta koju a ’dupi ti toron nu, ta ’bayin a ’dupi ti löti lo rigwo kwöŋ. ²¹ Nyenagon ’bulit a nyo nagon ta a wu i koŋdya na ŋo nagon soŋinana toyujö kusik kasu kine? Kogwon ’dutet na kine ŋo gwon a twan. ²² Ama soŋinana ta aje yukwe kaŋo i toron a ta gwe a ’dupi ti Ŋun, nyena a ’bulit nagon ta wuwu na gwe a kelan, a ’dutet nanyit gwe a ru na yeŋ nyin. ²³ Kogwon toron robba ŋuto ko twan, ama Ŋun ’dogga ŋuto ’bak ropet ko ru na yeŋ nyin ko Matat likaŋ Yesu Kristo i mugun.