¹ Nan ŋilo nyönyökökiŋdyö ta kulya ti Poibe kiaser nikaŋ, nagon parakiŋdya i kanisa na gwon Kenkuria nu. ² Wuni ta lepeŋ ’bura i karin ti Matat, gwoso nagon ŋutu ti Ŋun ködyö kokoŋdi na, paraki ta lepeŋ i no liŋ nagon nye ’de ’deggi kune, kogwon lepeŋ a parakiŋdya ŋutu jore ju nan köti. ³ Rombi ta Pirisika se ko Akwila logon a kita ko nan i pirit na geleŋ ko Kristo Yesu i mugun kilo; ⁴ lepeŋat a pakiŋdya ru nase kogwon kulya kwe. Nan a lyöŋön ko se parik, ti gwon a nan ka ’de lo lyöŋön, ama kanisajin liŋ ti ŋutu ti jurön köti a lyöŋön ko se. ⁵ Köti rombi ta ŋutu logon momora kase kadi i kwakwaddu a kanisa kilo. Rombi ta Epaineto ju liŋ lo nyanyara logon a lo kokwe i yubbö na Kristo i Asia yu lo. ⁶ Rombi ta Maria nagon a kitakiŋdya ta parik ŋina. ⁷ Rombi ta Aŋöaroniko se ko Yunia logon a ŋutu kwe ti jur, logon yi köju a gwon ko se i kadi rereket kulo, lepeŋat a kwön i kiden na luyökie, a iŋge wuju Kristo köyö ŋerot. ⁸ Rombi ta Ampuliato ju liŋ lo nyanyara ko Matat i mugun ŋilo. ⁹ Rombi ta Urbano lo kita koyi i pirit na geleŋ ko Kristo i mugun, se ko Seta-kusa ju liŋ lo nyanyara lo. ¹⁰ Rombi ta Apele logon a kurwe a lo ’but i kitakiŋdya na Kristo. Rombi ta ŋutu lo gwon ko Aristobulo midi kilo. ¹¹ Rombi ta Erodiona ŋuto likaŋ lo jur ŋilo. Rombi ta ŋutu ti Matat lo gwon ko Narkiso midi kilo. ¹² Rombi ta Turupaina se ko Turuposa nagon kitakiŋdya Matat kine. Rombi ta Persi ju nio na nyanyara nagon a kitakiŋdya Matat parik ŋina. ¹³ Rombi ta Rupo ŋuto lo ’but bia parik lo Matat, se ko ŋöte nagon nan köti luŋ a yaŋgo ŋina. ¹⁴ Rombi ta Asunkrito, ko Peleŋon, ko Erme, ko Patroba, ko Erma, se ko luŋasirik kayupök lo gwon ko se kilo. ¹⁵ Rombi ta Pilolŋgo, ko Yulia, ko Nereo se ko kiaser nanyit, ko Olumpa se ko ŋutu liŋ ti Ŋun lo gwon ko se kilo. ¹⁶ Rome ta ko ’börik ko ’bi ’biyet nake. Ŋutu liŋ ti Kristo logon a momora a kanisajin kulo roman ko ta. ¹⁷ Nan mo ’yu ta luŋasirik, meddi ta ’bura i kulya ti ŋutu logon tiŋdu ŋutu i kökoroja, a tulyaŋgi ŋutu, a todiŋdye todinesi na gwon ka ’de ti gwon gwoso nagon ta a wu kine. Gwe ta pajo ko lepeŋat, ¹⁸ kogwon ŋutu gwoso kilo ’bayin kitakiŋdya Kristo Matat likaŋ, ama lepeŋat kita pelela kase. A lepeŋat mumuluŋge töilyet ti ŋutu logon ’bak kulya kulo ko jamesi lo paleleŋ se ko kulyaesi ’bu ’busesi. ¹⁹ Twöju nasu na Kristo aje kuörö i ŋutu liŋ, nyena ko ŋina kwe nan a lyöŋön ko ta. Ama nan ködyö ’de ’dekan adi ti ta gwe gwoso ŋutu lokoŋ i deŋdya na ŋo na ’but, ama ti ta gwe gwoso lupudiet logon ti den kulya narok kilo. ²⁰ A i diŋit a na ’dit a Ŋun logon taliŋ gwon ko lepeŋ lo mo tiŋdi ta i ryokakiŋdya na Satani kak. Ti ’busan na Yesu Kristo Matat likaŋ gwe ko ta. ²¹ Timoteo logon yi kita i pirit na geleŋ lo roman ko ta. Köti ŋutu kwe ti jur logon a ko Lukio, ko Yasona se ko Sosipater roman ko ta. ²² Nan Tertio lo wuŋö ŋina leta lo roman ko ta ko Matat i mugun. ²³ Gayo logon a wuju nan a kömutöt, ko köti a wuju ŋutu liŋ lo momora a kanisa kulo lepeŋ a roman ko ta. Erasito ka ’delanit lo gurut ti köji se ko luŋaser likaŋ Kwarto roman ko ta. ²⁴ Ti ’busan na Yesu Kristo Matat likaŋ gwe ko ta liŋ. Amen. ²⁵ Nyena ti bulet gwe ko Ŋun logon bubulö tiŋdu ta i gwo ’dan go i Loŋe Lo ’but logon nan a jakin ta lo, iŋkoi, anyen gwo ’dan go i todinesi nagon nan a tokukin ta i kulya ti Yesu Kristo kine. Ŋilo Loŋe Lo ’but a ŋo nagon a lwön logon köju a ’beron ’dela adi mit, ²⁶ ama soŋinana aje kweye köke, ko a tiki i dena ko jurön liŋ, anyen tiŋdu ŋutu liŋ i yubbö ko i twöju. Kine kulya Ŋun lo yeŋ nyin lo sarakiŋdya, a nebijin köti iŋge wuŋö se. ²⁷ Ŋun geleŋ logon a lokoŋ lo, ti bulet gwe ko lepeŋ kogwon Yesu Kristo ŋupi ŋupi! Amen.