¹ Wuji ta ŋuto logon a lomunyan i yupet nanyit, ama an ta ko rerenya ta ko lepeŋ i kulya ti yeyeesi dyadyalesi. ² Miret mana; lele ŋuto gwon ko yupet i nyesu na ŋo liŋ, ama ŋuto logon a lomunyan i yupet lo nyesu ’dötilön ka ’de. ³ Ti ŋuto logon nyesu ŋo liŋ lo gwe ti lauŋdya ŋuto logon ti nyesu kine ŋo liŋ lo; a ti nye logon ti nyesu ŋo liŋ lo gwe ti ’duŋökiŋdyö ŋuto kulya narok logon nyenyesu ŋo liŋ lo, kogwon Ŋun a wu lepeŋ. ⁴ Do a ŋa logon ’duŋgö kulya ti köliŋönit lo lele ŋuto? Kine a kulya ti matat lonyit logon a monye kita i ’duŋgö na kulya ti lepeŋ, kode nye gwo ’dan go kode nye a ’doro. Iŋkoi, lepeŋ ’diri mo gwo ’dan go kogwon Matat bubulö tiŋdu lepeŋ i gwo ’dan go. ⁵ Nene miret köti mana; lele ŋuto yeyeju adi lele lor a lo ’but lwölwöŋ kulye perok, a lele yeyeji adi perok liŋ gwon jojo. Ti ŋutu liŋ geleŋ geleŋ denuŋdye ’bura kase i yeyeesi ko se yeyeju nyo. ⁶ Nye lo ’debba lor lo, lepeŋ ’debba ŋilo lor anyen bu ’ya Matat; a nye logon nyesu ŋo liŋ lo köti nyesu anyen bu ’ya Matat, kogwon nye titiŋdu Ŋun tinate. Nye logon ti nyesu ŋo liŋ lo köti ti nyesu anyen bu ’ya Matat, kogwon nye titiŋdu Ŋun tinate. ⁷ Kogwon lele likaŋ ’bayin logon gwolor gwoso i ’dekesi kanyit, köti lele likaŋ ’bayin logon twatwan gwoso i ’dekesi kanyit. ⁸ Koyi gwon jörun yi gwon jörun a ti Matat, a koyi twatwa a yi twatwane a ti Matat. Nyenagon koyi gwon jörun kode twatwa yi gwon a ti Matat. ⁹ Ŋina a kwe nagon Kristo a twan a iŋge ŋien i twan, anyen nye böŋö gwon a Matat lo ŋutu lo twatwa ko lo gwon jörun kilo. ¹⁰ Ama do ŋilo ŋuto, ko nyo nagon do ’duŋgö kulya ti luŋösur lo yubbö lo arabat? Kode do ŋilo ŋuto, ko nyo nagon do lauŋdya luŋösur lo yubbö lo? Kogwon yi liŋ mo gwogwo ’dan ko Ŋun i komor i ’duŋöki na putesi kaŋ; ¹¹ kogwon kulya ti Ŋun na wuro kune tuggö adi, Nan Matat lo kulya adi, ’Diri ’diri gwoso na gwoŋdi nan na, ŋutu liŋ mo rurugwuŋö köyö i komor, iŋkoi, ŋutu liŋ mo ruruk adi nan a Ŋun. ¹² Nyenagon yi liŋ geleŋ geleŋ mo totoleurukin kulya kaŋ ko Ŋun i komor. ¹³ Nyenagon ti yi köti gwe ti to ’duŋökin kulya kaŋ a ’börik, kölumbö ti yi liliundye ta adi ti yi kwöŋ gwe ti kondya nene ŋo nagon tindu luŋaser lo yubbö lo i köpukö kode i ’doro. ¹⁴ Nan logon a lo Matat Yesu lo deden ’bura adi nene ŋo ’bayin ko mugun nanyit nagon jaki¬ndya ŋutu lut i kulya ti keri, ama tuŋ a naron i ŋuto logon yeyeju adi ŋina ŋo ’diri jakindya ŋuto lut i kulya ti keri. ¹⁵ Nyena ko kinyo logon do nyönyö lo köŋu yeyeesi ti luŋösur lo yubbö lo, kweja adi do ti wörö i nyaŋu kwöŋ. An do ko tikin kinyo logon do nyönyö lo i to ’doroju na ŋuto logon Kristo a twan kogwon kulya kanyit lo. ¹⁶ Nyena meddi ’bura an ŋo nagon do kökon ko töili lo ’but kune gwon ti jamaji arabat. ¹⁷ Kogwon tumatyan na Ŋun ’bayin a kulya ti nyesu kode möju, ama a kulya ti löti lo rigwo, ko taliŋ, se ko lyöŋön nagon Mulökötyo Loke lo tindu. ¹⁸ Ŋuto lo kitakindya Kristo sona lo tulyöŋgu Ŋun, a ŋutu pupurje lepeŋ. ¹⁹ Nyenagon ti yi kepoddi ta ŋo nagon tindu ŋutu i gwon taliŋ se ko ŋo nagon gweundya gwiliŋit lo ŋutu liŋ ki. ²⁰ An ta ko köŋu ta kita na Ŋun ko¬gwon kulya ti kinyo. Kinyojin liŋ bubu¬lö nyei, ama a naron ko lele ŋuto tindu leŋe i ’doro ko ŋo nagon nye nyönyö na. ²¹ Ködyö a na ’but ko do teŋgu mugun i nyesu na lokore, kode i möju na binyo, kode i koŋdya na nene ŋo nagon tiŋdu luŋösur lo yubbö lo i ’doro. ²² Ti yupet nagon do a yuŋ adi kine ŋo a na ’but i kona na, ti ŋina yupet gwe i kiden nasu ko Ŋun. Ŋuto logon koŋdya ŋo nagon nye a yuŋ adi a na ’but i kona lo gwe a kalyöŋi, ko ködyö töili lonyit a ko tuggö adi ŋina ŋo a naron ko Ŋun i komor. ²³ Ama ko lepeŋ dyadya ’yu i ŋo na nyö nye na, Ŋun ’diri a ’duŋökin lepeŋ kulya narok kogwon nye a ko nyesu ko yupet. Ŋo liŋ nagon a kona ’bak yupet kune a toron.