¹ Ti ŋutu liŋ geleŋ geleŋ twöji kasarak logon saŋu se kulo, kogwon kido saret liŋ Po ko Ŋun, iŋkoi, kasarak logon kata kulo Ŋun lo tiŋdu lepeŋat. ² Nyenagon ko ŋuto logon a renya kido saret, lepeŋ renya ŋo nagon Ŋun a sarakin na, a se lo renya kulo mojakiŋdye ’börik riŋet. ³ Kogwon ŋutu lo koŋdya ’bura kulo kodyö ti kujönö kasarak, ama se lo koŋdya ŋo narok kulo kukujönö kasarak. Do ködyö nyanyar gwon ti kujönö kasaranit le? Nyena koŋdi ŋo na ’but a lepeŋ mo puŋe do, ⁴ kogwon lepeŋ a kakitanit lo Ŋun i kitakiŋdya na do ŋo nagon a na ’but konut. Ama ko do a koŋdya toron a do kujönöni kujönö lepeŋ, kogwon morga nanyit na baŋdu ’bayin a ŋö kana. Lepeŋ a kakitanit lo Ŋun i ’duŋökiŋdyö na woran na ŋuni ŋutu lo koŋdya arabat kilo. ⁵ Nyenagon ti ta agu twöji twöju, ’bayin kogwon ta kujönö woran na Ŋun ka ’de, ama köti kogwon töilyet kasu deden adi ta koŋdya ŋö na ’but. ⁶ Ŋina köti a kwe nagon ta robbi usur, kogwon kasarak a kakitak ti Ŋun a ŋina gwe a kita nase. ⁷ Nyenagon ropakiŋdye ta lepeŋat liŋ ŋö nagon ’de ’dekarikin kasu kine; ropaki ta usur i ŋutu lo pepeŋdya usur kulo, ropaki ta usur lo toro ’bo kasu i ŋutu logon pepeŋdya usur lo toro ’bo kulo, twöji ta ŋutu logon ta ködyö twötwö kulo, bu ’ye ta ŋutu logon ta ködyö bubu kulo. ⁸ An ta ko gwon ta ko möri i nene ŋo nagon ta ködyö kökon na, ama tuŋ möri nagon ta ködyö gwon ko lepeŋ na a tunyar ko ’börik, kogwon nye lo nyaŋu marate lonyit lo a temakiŋdya i Saresi liŋ. ⁹ Kogwon saresi logon tuggö adi, An do ko lubbö, An do ko tatuja ŋuto, An do ko koko ’ya, An do ko be ’ya, wat lele saret, se liŋ a tomoraki i ŋilo kulyaet adi, Do ködyö nyanyar marate ilot gwoso mugun inot. ¹⁰ Nyaŋu ti toroŋdya marate, nyena ko do a kanyaranit, do a ka ’depanit lo Saresi liŋ. ¹¹ Köti dene ta den adi saa aje jukin, diŋit aje po nagon ta ködyö pupurwe ’i i doto. Kogwon soŋinana yi gwe nyona ko lwökö lwölwöŋ na yubbe yi a kokwe nu. ¹² Tukwaje aje ’baka, kak gwe nyona ko waran. Nyena ti yi rusuŋdye ta kaŋo konesi ti mudwe, ko ti yi jupukiŋdye ta tito möriesi logon a ti parara. ¹³ Ti yi wöröni ta ’bura gwoso ŋutu lo wörö i tuparan, ’bayin i to ’betan, kode i meran, kode i toluŋ, kode i koŋdya na ŋo nagon a wuya kana, kode i mörö, kode i yulön. ¹⁴ Ama jupukiŋdye ta Matat Yesu Kristo a tito kasu möriesi; an ta ko yeyeju ta i toyimönöju na ’dekesi ti mugunya kasu ti na kak.