¹ Nyenagon luŋasirik kwe, ko-gwon Ŋun a won konyen koyi, nan mo ’yu ta anyen ta wukiŋdya lepeŋ mugunya kasu gwoso rubaŋga loke, ti gwon i tatua, ama anyen gwon jörun i tulyöŋgu na lepeŋ.Ŋina a twöju gwak nagon ködyö lupuŋdyö kasu i töilyet. ² An ta ko kepoddu ta gwiliŋit lo na kak, ama ti yeyeosi kasu toluduköni toludukö anyen gwiliŋisi kasu leleuddya a ludukö asut; a kirut ta mo kuruŋdye adi ko ’doket na Ŋun a nyo, kweja adi ŋo nagon a na ’but, nagon tutulyöŋgu lepeŋ ko tetemakiŋdya kune. ³ Nyena kogwon ’busan nagon Ŋun a ’doggi nan na, nan takiŋdya ta adi, ti ta liŋ geleŋ geleŋ gwe ti yeyeju ’borik adi ta a ŋutu temejik lwölwöŋ nagon ta ködyö yeyeji na, ama ti ŋutu liŋ geleŋ geleŋ yeyeji ’börik ko töilyet lo lilik gwoso i temet na yupet nagon Ŋun a tiŋdu ta liŋ geleŋ geleŋ na. ⁴ Mugun na ŋuto gwon ko swötön jore, a kilo swötön gwe ko kitajin ka ’de ka ’de. ⁵ Nyena köti sona, ma ’di yi a ŋutu jore yi a mugun geleŋ ko Kristo i mugun, a yi tuparaki ko ’börik gwoso swötön ti mugun geleŋ. ⁶ Nyena yi a ’doka ko ’dokesi ka ’de ka ’de nagon Ŋun a gwelakin i ’busan nanyit kune, nyena ti yi kitari kitari se. A koyi ’doka ko tukujö na kulyaet lo Ŋun, a ti yi agu tokuje gwoso i temet na yupet nagon a tiki yi na. ⁷ A koyi ’doka ko kita, a ti yi agu kitani kita; a koyi ’doka ko todiŋdyö, a ti yi agu todiŋdye. ⁸ A koyi ’doka ko togo ’yu na kulye ŋutu, a ti yi agu togo ’yi togo ’yu. Ko ŋuto logon ŋaŋu ŋo kanyit ko kulye ŋutu, a ti nye tiŋdi abur. Ko ŋuto logon a tiki a lo ŋerot, a ti lepeŋ kitani ko pusök. Ko ŋuto logon parakiŋdya kulye ŋutu, a ti nye parakiŋdye ko lyöŋön. ⁹ Ti nyaŋu gwe a na to ’diri. Mane ta man ŋo narok, ’depakiŋdye ta go i morga na ŋo na ’but. ¹⁰ Tunyare ta tunyar ko ’börik gwoso luŋasirik, möŋi ta kugga kulye ŋutu lwölwöŋ nagon ta kugga ’börik. ¹¹ An ta ko gwon ta a yokia, kitani ta parik. Ti töilyet kasu gwe ko pusök i kitakiŋdya na Matat. ¹² Lyöŋi ta lyöŋön i yeŋdu na ŋo ti Ŋun na popo. Yeoe ta ŋoŋaddu i sasanya nasu. Kwakwaddi ta kwakwaddu perok liŋ. ¹³ Ŋaŋi ta ŋo kasu ko ŋutu ti Ŋun logon yöŋö ŋo kilo. Dinikine ta wuju na kömu kasu midijik. ¹⁴ Luŋgi ta ’boriet ko Ŋun i ŋutu logon sasaŋdu ta kilo; iŋkoi, luŋukiŋdye ta se ’boriet, an ta ko lombu ta se. ¹⁵ Morakiŋdye ta i lyöpön ko ŋutu logon lyölyöŋi kilo, köti morakiŋdye ta i delya ko ŋutu logon dedelya kilo. ¹⁶ Gwe ta ko yeyeet geleŋ kasu kiden. Ko bu ’ya ta ’börik adi ta a temejik ta ti bulö mora ko ŋutu kana. An ta ko yeyeju ta ’börik adi ta a lokoŋ. ¹⁷ Ko ropakiŋdya ta toron ko toron. Tirikuni ta ŋo na ’but nagon ŋutu liŋ pupur kune. ¹⁸ Ko bubulö, i ŋo liŋ nagon gwon kasu i swöt kine, gwolore ta taliŋ ko ŋutu liŋ. ¹⁹ Julin kwe lo nyanyara, an ta ko ropakiŋdya ta toron, kölumbö kölöki ta, ti Ŋun lo ropaki. Kogwon a wurö adi, Nan Matat a kulya adi, Kine a kulya kwe i ropakiŋdya, nan ’diri mo roropakin. ²⁰ Ama ko miriku ilot gwon ko magor, tiki lepeŋ kinyo ti nyesi, ko lepeŋ ko kure, tiki piŋo ti möji; kogwon ko do koŋdya sona a do mo tiŋdi kwe nanyit i yu gwoso ŋuto logon a yunaki kuk na nyonyoran kanyit i kwe. ²¹ Ko kölökin ta toron i te ’ya na ta, ama kitani ta ko ’busan anyen te ’ya toron.