¹ Nyena nan ŋilo pija adi, Ŋun ŋona a paju ŋutu kanyit le? ’Bayin sona kwöŋ! Nan ko mugun nio a Yisaraeletyo, nan a nyakwari lo Abarayama, ko a lo kötumit na Benyamina. ² Ŋun kwöŋ a ko paju ŋutu kanyit logon nye köju ’beron a den adi se a ŋutu kanyit kulo. Ta ŋona a ko den kulya na wurö i kulya ti Eliya ko nye tukokiŋdyö Ŋun ŋo narok nagon ŋutu ti Yisaraele a kon kunu le? ³ Adi, Matat, lepeŋat aje tatuja nebijin kulök, a iŋge turökin kak piritön kunök ’yuresi ti rubaŋgajin, a nan geleŋ tuŋ lo pituŋdye, a se ga ’yi tatuja nan. ⁴ Ama Ŋun a nyoŋ lepeŋ ada? Adi, Nan a kölökin mugun ŋutu aliŋan buryo logon a ko rugwuŋö ko Bala i komor i twöju na lepeŋ. ⁵ Nyena köti gwon sona i na diŋit na adi, pitönö ti ŋutu kata logon Ŋun a wulunko ’busan nanyit na nyaŋu. ⁶ Ama ko Ŋun a wulun se ko ’busan nanyit na nyaŋu, kweja adi nye a ko wulun se kogwon konesi kase; kogwon ko nye ködyö a wulun se kogwon konesi kase, a ’busan nanyit na nyaŋu ködyö tine gwon a ’busan köti. ⁷ A kirut gwe ada? Kötumit na Yisaraele a ko ryö ŋo nagon se gwon i ga ’yu na, ama ŋutu ku ’dik logon Ŋun a wulun kulo aje ryö, ama a lojore kase töilyet kase worani a Iŋgo. ⁸ Kulya ti Ŋun na wurö kune a tuggö adi, Ŋun a tiŋdu se mulökötyo logon tiŋdu se i doto adi mwön, a tiŋdi se konyen logon ti meddya, ko swö logon ti yiŋga tojo ko lo lor gwak. ⁹ Dawidi köju a kulya adi, Ti roriot kase worani a loket ko a riŋgwaŋ, ko a ridiket ko a riŋet nase. ¹⁰ Ti konyen kase tomuseni tomuse anyen se böŋö gwon ti meddya, anyen se juwara gu ’dula ŋupi. ¹¹ Nyenagon nan pija adi, Yudayaki köpukö anyen ’dororo asut le? ’Bayin sona kwöŋ! Ama lyaŋan nase tiŋdu ŋutu ti jurön i lwökö, anyen tiŋdu Yisaraele i yulön. ¹² Ama ko lyaŋan nase a tiŋdu na kak ’bulit, kweja adi ’yako ’yu nase a tiŋdu ŋutu ti jurön i ryeju na ’bulit, bia parik twöyit nase ’bukuluŋ mo joŋdya ’bulit a duma parik lwölwöŋgu. ¹³ Nan ŋilo soŋinana jambi ko ta logon ’bayin a Yudayaki. Nan a luyökielo ŋutu ti jurön a nan bu ’ye kita nio, ¹⁴ kode nan ŋona bubulö tiŋdu ŋutu ti jur likaŋ i yulön anyen kulye kase böŋö lwölwökö. ¹⁵ Kogwon ko ködyö paya nase a tiŋdu kak ’bukuluŋ i tomora ko Ŋun, a wuyu nase mo tiŋdi ŋutu lo twatwa kulo i gwon jörun! ¹⁶ A ko tupet togeleŋ na ambata na nunutu a wuki Ŋun anyen gwon a nake, a ambata ’bukuluŋ gwe a nanyit nake. A ko kokori a nake a kenia köti gwe a nake. ¹⁷ Ama ko kunie kenia ti ködini lo jeitun a gogonya kaŋo, a ta logon a kenia ti jeitun lo mu ’diŋ kulo to ’depakine nyin i ruddya na se, a ta iŋge ŋarundya kokori ko wilan na ködini lo jeitun. ¹⁸ Ama an ta ko bu ’ya ta ’börik ko kine kenia nagon a gogonya kaŋo kune, adi ta a lo ’but lwölwöŋ se. Ko ta ködyö ’dek bu ’ya ’börik, yeyene ta yeye adi kokori na tiŋdu ta i gwo ’dan go, ti gwon a ta lo togwi ’dikiŋdya kokori. ¹⁹ Ama ta de kulya adi, Iŋkoi, kenia köju a gogonya kaŋo anyen yi ködyö to ’depaki nyin. ²⁰ Kine kulya a gwak. Lepeŋat a gogonya kaŋo kogwon tu ’bakan nase na yupet, ama ta yeŋ go i ŋilo ködini kogwon ta a yubbö. Nyena an ta ko bu ’ya ta ’börik, kölumbö kujönöni ta kujönö. ²¹ Kogwon ko Ŋun a ko pitökin kenia gwak ti ŋilo ködini, a nye köti mo tine pitökin ta. ²² Meddi ta ko Ŋun gwon a lo ’but ko köti a kaŋa ada; lepeŋ a kaŋa i ŋutu logon a ’doro kulo, ama lepeŋ a lo ’but kasu ko ta ködyö yeŋon gwolor i ’busan nanyit. Ama ko ta ti koŋdya sona, a ta mo gogonyani kaŋo. ²³ iŋkoi, ma ’di Yudayaki, ko se ti yeŋon gwon ’bak yupet, a se mo nyököjine bot i to ’depaki i ködini, kogwon Ŋun gwon ko riŋit i to ’depakiŋdya na se bot köti. ²⁴ Kogwon ko ta a gonywe kaŋo i ködini losu lo jeitun lo mu ’diŋ, logon ta a kenia kanyit gwak lo, a ta iŋge to ’depaki i ködini lo jeitun lo ’yu ’yutu, logon ta ’bayin a gweyari ti kenia kanyit lo, nyena a bia parik a kenia gwak ti ködini lo jeitun lo ’yu ’yutu lo mo to ’depakine bot i ködini lo jeitun logon a gweyari lose. ²⁵ Luŋasirik kwe, lwönö kata nagon nan ’de ’dekan ta deden, anyen teŋgu ta i bu ’ya na ’börik. Kine lwönö kweja adi swöt lo kötumit na Yisaraele töilyet kase a togolo ti ’bön yiŋga, a se mo yeŋe gwon sonu tojo ko ŋutu ti jurön liŋ a lupe i teŋ kata. ²⁶ a kirut kötumit na Yisaraele liŋ mo lwököni lwökö; gwoso na wurörikin na adi, Kalwökönit mo pukun kaŋo Siona; a lepeŋ mo ’dumaddi kaŋo i kötumit na Yakobo konesi kase liŋ nagon ti twöyörikin Ŋun kine. ²⁷ A ŋina mo gwe a tomoret nio nagon nan a teten ko se i pirit na geleŋ i diŋit nagon nan joŋga toronjin kase kaŋo nu. ²⁸ Nyena kogwon se a renya Loŋe Lo ’but a Yudayaki gwe a merok ti Ŋun i kulya kasu ta ŋutu ti jurön, ama kogwon Ŋun a wulun lepeŋat, a se gwe a ŋutu kanyit lo nyanyara kogwon kulya ti merenyejin kase ti ’beron kulu. ²⁹ Kogwon Ŋun ti löpuggö yeyeesi kanyit ko lepeŋ a luŋgu ŋuto a iŋge ’dogga lepeŋ. ³⁰ Nyenagon gwoso nagon ŋutu ti jurön kulo köju a renya twöju Ŋun nu, ama soŋinana Ŋun aje won konyen ko ta kogwon Yudayaki a renya twöju. ³¹ Sona köti, kogwon ta a woŋorikin konyen, a lepeŋat iŋge renya twöju, anyen Ŋun köti won konyen ko se. ³² Kogwon Ŋun aje reregga ŋutu liŋ ko konesi kase nagon se a renyari twöju kune, anyen nye böŋö won konyen ko se liŋ. ³³ Wö, tukwörien na Ŋun, ko koŋon nanyit se ko deŋdya nanyit na kulya a nagululök ’bak ’dutet! Wö, ŋuto a ŋa logon bubulö tokoŋu ’duŋgö nanyit na putet? Ŋuto a ŋa logon bubulö ryeju kikolin lo tiri nye kulo? ³⁴ Kogwon ŋa logon kukurun yeyeesi ti Matat? ³⁵ Ŋa logon a gwon a kajujuwanit lonyit? Ŋa logon a tiŋdu lepeŋ ’doket, anyen Ŋun köti ’dogga lepeŋ ko nene ŋo? ³⁶ Kogwon lepeŋ lo gweja ŋo liŋ, ŋo liŋ yeŋon kogwon lepeŋ, köti ŋo liŋ tiriku lepeŋ. Ti bulet gwe ko lepeŋ ŋupi ŋupi. Amen.