¹ Luŋasirik kwe, töili liŋ gwon ko pusök ko ŋutu kwe ti jur, a nan momo ’yi Ŋun parik anyen se lwölwökö. ² Nan a den adi se gwon ko pusök ’diri i twöju na Ŋun, ama se ’bak denesi na ’but. ³ Kogwon se ti den kiko logon Ŋun tiŋdu ŋutu i gwon rigwo kanyit i komor lo, a se gwe a ko tokoyokuŋdya ’börik kak ko lepeŋ i komor i kiko logon nye teteŋdi ŋutu i gwon rigwo lo, ama a se möŋi teteŋdya kiko lose anyen se gwon rigwo. ⁴ Kogwon Kristo a tutuŋgö saresi liŋ, anyen ŋutu liŋ logon gwon ko yupet boŋo tetenaki rigwo ko Ŋun i komor. ⁵ Kogwon Mose a wuŋö adi ŋuto logon jujumbu gwon rigwo ko Ŋun i komor kogwon ’debba na saresi lo, ŋilo ŋuto mo gwon jörun kogwon kilo saresi. ⁶ Ama i kulya ti tetenaki na ŋutu i gwon rigwo ko Ŋun i komor kogwon yupet na, Mose a kulya adi, An ta ko jambu ta kasu i töilyet adi, Ŋa de lo kikiŋdya yi ŋiua ’diko? (ŋina kweja adi i joŋdya na Kristo kak ni); ⁷ Kode, i jambu adi, Ŋa de lo tu kak i dili nagon ’bak ’dutet? (kweja adi, i joŋdya na Kristo kaŋo i twan). ⁸ Ama lepeŋ a kulya ada? Lepeŋ a kulya adi, Ŋilo kulyaet gwon kasu nyona parik, nye gwon kasu i kutusen ko kasu i töilyet. (Kweja adi, ŋilo a kulyaet lo yupet logon yi tokujö nye lo). ⁹ Kogwon ko do a tuggö ko kutuk inot adi, Yesu a Matat, a do iŋge yuŋ konut i töili adi Ŋun a toŋiju lepeŋ i twan, a do mo lwököni lwökö. ¹⁰ Iŋkoi, ŋuto yuyuŋ kanyit i töili a Ŋun tetenakiŋdye lepeŋ i gwon rigwo kanyit i komor, a ŋilo ŋuto tuköddi yupet nanyit kaŋo ko kutuk nanyit a lwököni lwökö. ¹¹ Kowon kulya ti Ŋun na wurö kune a jambu adi, Ŋutu liŋ logon a yubbö lepeŋ kilo mo ti toyuö kusik. ¹² Kogwon tuka ’de ’bayin i kiden na Yudayaki se ko na ŋutu ti kulye jurön, kogwon Matat lo geleŋ lo, lepeŋ a Matat lo ŋutu liŋ, a nye gwe a kwörinit i ŋutu liŋ lo luŋgu ŋariet ko lepeŋ kulo. ¹³ Kogwon ŋutu liŋ logon a luŋgu karin ti Matat kilo mo lwölwökö. ¹⁴ Ama a se mo luŋgi lepeŋ ada ko se a ko yubbö? A se mo yubbe lepeŋ ada ko se a ko yiŋ kulya kanyit? A se yiŋge kulya kanyit ada ko katokuönit ’bayin? ¹⁵ A ŋutu tokuöddi ada ko se a ko sonyo? Sekine kulya nagon a wurö kune adi, Mokosi ti ŋutu lo joŋdya lore lo ’but kulo kwekwelen adi rio!'' ¹⁶ Ama a ŋutu liŋ gwe a ko tiŋdu tirikwet nase i yiŋga na lore lo ’but. Kogwon Yisaya köju a kulya adi, Pon Matat, ŋa logon a yuŋ lore logon yi a tuk lo? ¹⁷ Nyenagon yupet po kogwon yiŋga, a kulya na yiŋa kune poŋdi kogwon tokujö na kulya ti Kristo. ¹⁸ Ama nan ŋilo pija adi, ŋutu a ko yiŋ kilo kulyaesi le? Iŋkoi, lepeŋat ’diri a yiŋ, kogwon adi, Gworolo kase a kuörö i kak ’bukuluŋ, kulyaesi kase aje yeŋga i ’dutesi ti kak. ¹⁹ Nan ŋilo köti pija adi, ŋutu ti Yisaraele ŋona a ko kurun kilo kulyaesi le? A kokwe na nyönyöggu kulya na jam Ŋun i buk na Mose köju kunu adi, Nan Ŋun mo tiŋdu ta i yulön ko ŋutu logon ’bayin a jur gwak kulo, a nan mo tiŋdi ta i woran ko jur lo ŋutu lu ’böŋ. ²⁰ Ama a Yisaya gwe a purutat parik na kulyari nye nu adi, Nan Matat aje rye ko ŋutu logon a ko ga ’yu nan, a nan iŋge kwekin mugun i ŋutu logon a ko pija nan kulo. ²¹ Ama nye a jambu i kulya ti Yisaraele adi, Nan Matat a mama nya dduko könisi kwe tuparan liŋ i ŋutu karenyak logon rerenya ko nan kulo.