¹ A Saula iŋge ruk tatua na Setepano. A i Ŋilu lor a kanisa na gwon Yerusalema na suluje sasanya parik; a ŋutu liŋ iŋge rekin i kak liŋ na Yudaya ko na Samaria, ake luyökie ka ’de logon a ko rekin. ² a ŋutu logon twoju Ŋun kulo nuŋge Setepano, a iŋge gwien lepeŋ parik. ³ A Saula yoyoŋgi kanisa parik anyen koŋu se; a wöröjine i midijiik liŋ lupö lukata i momokaddu na ŋutu lyan ko wate, a tiŋdi se i kadi rereket. ⁴ A ŋutu logon a rekin kulo wöröjine totokuöddu kulyaet lo Ŋun. ⁵ A Pilipo iti i köji na Samaria, a tokukiŋdye ŋutu kulya ti Masia. ⁶ A ŋutu Jore parik gwe ko töili geleŋ i tiŋdu na swö kase i yiŋga na kulya na jam Pilipo kune, na yiŋge se lepeŋ ko na meddi se kweyesi na kon nye kune. ⁷ Kogwon mulökö lorok a po kaŋo ko Ŋutu jore i mugunya lulujö ko gworolo lobot, a ŋutu jore logon a babatatu mugunya kase a twatwa, se ko ŋutu podeki iŋge tokela. ⁸ Nyena a lyöŋön gwe a duma i ŋinu köji. ⁹ A lele ŋuto gwe kata i ŋinu köji ko diŋit a najo, karin kanyit a Simona, logon aje tusöŋu ŋutu ti Samaria ko to ’bunun nanyit, kulya adi nye a ŋuto duma. ¹⁰ A ŋutu liŋ lo ’di ’dik ko temejik yiŋge lepeŋ, a kulyani adi, Lo ŋuto a riŋit na Ŋun nagon luŋu adi Riŋit Duma. ¹¹ A se yiŋge leperi kogwon lepeŋ a tusöŋu ŋutu diŋit a najo ko to ’bunun nanyit. ¹² Ama a na yubbe se kulyaesi ti Pilipo i tokujö na Loŋe Lo ’but lo Tumatyan na Ŋun se ko karin ti Yesu Kristo nu, a lepeŋat iŋge batisa lyan ko wate. ¹³ a ma ’di Simona ko mugun nanyit köti iŋge yubbö, a i mukök nagon nye aje batisa nu, a nye yeŋe gwon ko Pilipo i pirit na geleŋ, a nye iŋge soŋu i meddya na kweyesi se ko sörösi temejik na kona kune. ¹⁴ A luyökie lo gwon Yerusalema kulo ko yiŋge adi ŋutu ti Samaria aje wuju kulyaet lo Ŋun nu, a se sunyukiŋdye lepeŋat Petero se ko Yoane. ¹⁵ A na ’durökiŋdye se nu, a se kwakwaddi Ŋun kogwon lepeŋat anyen se böŋö wuju Mulökötyo Loke. ¹⁶ Kogwon Mulökötyo Loke a ko nyuŋ pokin ko lele lose, lepeŋat tuŋ batisa i karin ti Matat Yesu. ¹⁷ a kirut Petero se ko Yoane sopakiŋdye könisi kase ko lepeŋat loki, a se wuji Mulökötyo Loke. ¹⁸ Nyena a na meddi Simona adi ŋutu aje wuju Mulökötyo na sopakiŋdye luyökie könisi kase ko lepeŋat loki nu, a lepeŋ ’deke tiŋdu se gurut, ¹⁹ a kulyani adi, Tiki ta nan ŋina riŋit köti, anyen ko nan a sopakiŋdya könisi kwe ko lele ŋuto ki, a nye mo wuji Mulökötyo Loke. ²⁰ A Petero takiŋdye lepeŋ adi, Ti gurut kunök liki ko do liŋ, kogwon do a yeyeju gwöruŋdyö ’doket na Ŋun ko gurut! ²¹ Kulya kunök ’bayin asut i parundya na kine kulya, kogwon töili ilot ’bayin a lo ’but ko Ŋun i komor. ²² Nyena löpuŋge töili i ŋina toron inot, ko momo ’yi Matat kode ŋona nye mo pipitökin ŋo na yeye do konut i töili ŋina. ²³ Kogwon nan a met adi do gwon pötwör gwoso ’deŋgele ko a rereka ko toron. ²⁴ a Simona waddi adi, Kwakwasaki ta nan Matat, anyen nene na kine kulya na jam ta kine böŋö gwon ti pokin köyö loki. ²⁵ A nagon se aje tökoŋu ko aje jambu kulyaet lo Matat nu, a se yitwene Yerusalema, a i kiko a se iŋge tokujö Loŋe Lo ’but i turön jore ti Samaria. ²⁶ A kirut malaikatat lo Matat takiŋdye Pilipo adi, Ŋine ko iti i swöt lo loki i kiko logon po Yerusalema tojo Gaja. (Ŋilo a kiko logon tiri i yöbu na sese.) ²⁷ a lepeŋ ŋine ŋien a iti tu, a lepeŋ meddi Etiopiatyo logon a kona a ’baŋ, logon a ŋuto lokukwön ko a duma lo tukwörien na Kaŋöake mor na Etiopia. Ŋilo ŋuto a tu Yerusalema i kwakwaddu; ²⁸ a i yitö nanyit, a lepeŋ gwe i si ’da i arabia lonyit lo jijiko, keŋdya buk na nebi Yisaya. ²⁹ A Mulökötyo takiŋdye Pilipo adi, Iti ko morakiŋdye i ŋilu arabia. ³⁰ Nyena a Pilipo wöki ko lepeŋ yu, a nye yiŋge lepeŋ i keŋdya na buk na nebi Yisaya. A Pilipo pije lepeŋ adi, Do kukurun kulya nagon do keken kine le? ³¹ A lepeŋ waddi adi, Nan bubulö kuruŋdyö kine kulya ada? Kogwon ŋuto ’bayin logon nyönyökökiŋdyö nan. A nye luŋgi Pilipo anyen kiyaddu i arabia lukata i si ’da ko nye i pirit na geleŋ. ³² A kalesi nagon nye keken i kulya ti Ŋun na wurö kune gwe sona adi, Nye a jikö gwoso köbilityo nagon joŋa i tatua, ko gwoso kilolor lo gwon taliŋ ko ka ’barinunit i komor, a lepeŋ gwe a ko paju kutuk nanyit kwöŋ. ³³ Lepeŋ a lawe a ŋuto gwe ’bayin lo ’duŋgo putet lonyit gwogwo ŋa logon ŋona bubulö jambu i kulya ti nyakwariat kanyit? Kogwon ru nanyit aje toliki i na kak. ³⁴ A ŋuto lo waddi Pilipo adi, Böŋö taki nan ko nebi jambu kulya ti pa i kilo kalesi, lepeŋ jambu kulya kanyit kode ti lele ŋuto? ³⁵ a Pilipo poki i jambu suluja ko kilo kalesi, a nye takiŋdye lepeŋ Loŋe Lo ’but lo Yesu. ³⁶ A na tiri se i kiko nu, a se ’duröki i pirit nagon pioŋ gwon kata, a ŋilo ŋuto pije adi, Pioŋ makune! A nyo lo teŋgi nan i batisa? ³⁷ A Pilipo takiŋdye lepeŋ adi, Do bubulö batisa ko do a yubbo ko töili ilot liŋ. A lepeŋ waddi adi, Nan a yuŋ adi Yesu Kristo a ŋuro lo Ŋun. ³⁸ A lepeŋ saŋi saŋu anyen arabia totogwo ’da, a se liŋ murek Pilipo se ko ŋilo ŋuto iti i pioŋ kata, a Pilipo batiddye lepeŋ. ³⁹ a na poŋdi se kaŋo i pioŋ kata nu, a Mulokotyo lo Matat joŋgi Pilipo kaŋo ’de ’de, a ŋilo ŋuto tine met lepeŋ köti; a nye kölumbö iti i kiko lonyit ko lyöpön a duma. ⁴⁰ Ama a Pilipo puköki A joto, a wöröjine i köjino liŋ totokuöddu Loŋe Lo ’but tojo nye a ’durökin Kaisaria yu.