¹ A i ŋinu diŋit a mor Erode suluje konakiŋdya kulye ŋutu ti kanisa arabat. ² A lepeŋ tiŋdi Yakobo luŋaser Yoane i tatua ko baŋdu. ³ A na meddi nye adi kine kulya aje tulyöŋ Yudayaki nu, a nye köti morgi Petero. Kine kulya kona i diŋit na rorwe lo Ambata nagon ’bak Kape. ⁴ A na morgi Erode Petero nu, a nye tiŋdi lepeŋ i kadi rereket tiyu ko teŋon iŋwan ti aseker iŋwan iŋwan. Lepeŋ yeyeju joŋdya nye ko ŋutu i komor i mukök na Pasaka. ⁵ Nyena a Petero tiyuni i kadi rereket, ama a kanisa lo momora kulo iŋge kwakwaddu Ŋun ko pusök kogwon kulya ti lepeŋ. ⁶ A nagon Erode ’deke joŋdya lepeŋ kaŋo ko ŋutu i komor nu, a i ŋilu tukwaje lo geleŋ lu, a Petero dotoni i kiden na aseker murek a rereka ko topot murek, a katiyuk gwe i tiju i kötumit na kadi rereket. ⁷ Mete, a malaikatat lo Matat gwo ’de kanyit nyona, a parara pararakiŋdye i kadi na kiniki ’e nye kata nu. A malaikatat naŋgi Petero i merete a topuruŋdye lepeŋ, a kulyani adi, ŋine ki ’de ’de. A topot ’do ’done kak kanyit i könisi. ⁸ A malaikatat takiŋdye lepeŋ adi, Kukune kukuŋ mugun, ko sukiŋdye kamuka. A lepeŋ iŋge koŋdya sona. A malaikatat takiŋdye lepeŋ adi, Kalapakiŋdye boŋgo inot ko kipuŋdye nan. ⁹ A Petero kepoddi lepeŋ kaŋo, a ko den ko po na kon malaikatat kune a gwak, ama yeyeju adi nye ŋona rurudwe. ¹⁰ A lepeŋat laŋgi katiyuk togeleŋ ko tomurek, a ’dure i kötumit nagon a witi nagon tirikin köji kata, ama a paji mugun geleŋ, a se luŋöni kaŋo a tiri lele kiko geleŋ; ’de ’de a malaikatat kölökiŋdye lepeŋ. ¹¹ A kirut Petero ko timuŋdye i mukok, a kulyani adi, Nan soŋinana a den adi kine kulya a gwak adi Matat a sunyuŋdyö malaikatat lonyit ko aje Iwoggu nan i riŋit na Erode se ko po liŋ nagon Yudayaki yeyen kune. ¹² A na kuruŋdye nye kine kulya nu, a lepeŋ iti ko Maria kadi. (Maria a ŋote Yoane logon köti luŋu a Marako.) A ŋutu jore iŋge momorakiŋdya nyu i kwakwaddu. ¹³ A Petero totoggi kötumit na mariŋ, a nene ŋuro ’diet nagon kita i ’baŋ karin kanyit a Roda poŋdi i meddya. ¹⁴ A lepeŋ iŋge kurun gworo lo Petero, a iŋge lyöpön parik, ama a tine paju kötumit, kölumbö a nye wöki bot lukata a tuŋge tuggö adi Petero lu gwogwo ’dan kaŋo i kötumit. ¹⁵ Ama a lepeŋat kulyani ko lepeŋ adi, Do a mamala; ama a ŋina ŋuro tiddye adi a gwak. A kirut lepeŋat kulyani adi kode ŋona a malaikatat lonyit. ¹⁶ Ama a Petero yeŋe totoggu kötumit, a na paji se kötumit nu, a se meddi lepeŋ, a se söŋi söŋu. ¹⁷ Ama a nye nanakiŋdye se könin adi ti se yiŋani taliŋ, a nyönyökökiŋdye lepeŋat ko Matat a jon nye kaŋo ada i kadi rereket. A lepeŋ kulyani adi, Taki ta Yakobo se ko luŋasirik lo yubbö kulo kine kulya. A kirut lepeŋ pine ŋien a iti i nene pirit. ¹⁸ A i waran na kak a dyadyapet gwe a duma i kiden na aseker pipija ’börik adi ko ŋona Petero a tu da. ¹⁹ A Erode tiŋdi saret anyen lepeŋ gagala, ama a se gwe a ko ryö lepeŋ, a nye pipije katiyuk kulo a tiŋdi saret anyen lepeŋat tatatua. A i mukök na kine kulya a Erode kö ’yi Yudaya a iti Kaisaria, a si ’dani nyu. ²⁰ A Erode iŋge woran parik ko ŋutu ti Turo se ko ti Sidona. A se iti a teŋ geleŋ i meddya na lepeŋ. A lepeŋat tojuline ko Balasito duma lo mede na mor, a kirut lepeŋat iti ko Erode yu i teteŋdya na taliŋ, kogwon jur lose ryeju kinyo ko mor i jur. ²¹ A i lor lo wulwe lu a Erode jupukiŋdye boŋgwat ti tumatyan a si ’dakine kanyit i si ’daet na tumatyan, a jamakiŋdye kilo ŋutu kulya. ²² A kilo ŋutu woŋoro ki adi, Ŋilo ’bayin a ŋuto lo jambu, ama a lele ŋun lo jambu. ²³ ’De ’de a malaikatat lo Matat gwuddye Erode ko twanti kogwon lepeŋ a ko bu ’ya Ŋun. A lepeŋ iŋge nyei ko kuru, a twane twan. ²⁴ Ama a kulyaet lo Ŋun yeŋe ’duŋö a ŋdine ŋdi. ²⁵ A Barnaba se ko Saula tutuŋge kita nase Yerusalema yu, a yitöni bot baruŋdya Yoane logon köti luŋu a Marako.