¹ A luyökie se ko luŋasirik lo yubbo kulo lo gwon Yudaya kulu iŋge yiŋ adi ŋutu logon ’bayin a kase koti aje wuju kulyaet lo Ŋun. ² A nagon Petero aje tu Yerusalema nu, a Yudayaki logon a kayupok logon kulya adi Lwaka logon a kayupök agu ködyö tatawero kulo iŋge yuyuk lepeŋ adi, ³ Do a si ’da a kömutöt i midijik ti Lwaka logon a ko tawero, a iŋge nyesu ko se i pirit na geleŋ. ⁴ A Petero suluje nyönyokökiŋdyo lepeŋat Ŋo liŋ nagon aje kona, adi, ⁵ Nan aje gwon i köji na Yaŋo i kwakwaddu, a nan gwe gwoso ŋuto lo rurudwe, a nan meddi nene ŋo a nagalaŋ gwoso boŋgo muket ’duruun kak ki yu. Ŋina boŋgo a leleyo goŋesi kanyit iŋwan a kölwene kak köyö nyona. ⁶ A nan diŋe lukata nanyit ’bura, a iŋge meddya kijakwa logon ko mokosi iŋwan, ko gwuruŋin, ko ŋo lo gwögwöŋtu kak se ko kwen ti ki. ⁷ A kirut nan yiŋge gworo luŋgu nan adi, Petero, ŋine ki, ’duŋge ko nyesi. ⁸ Ama a nan waddi adi, Ti gwon sona pon Matat; kogwon nan a ko soŋro nene ŋo nagon abur kode a lut i kulya ti keri köyö i kutuk kwöŋ. ⁹ A gworo köti iŋge kulya dao tomurek ki yu, adi, Do ti bulö luŋgu ŋo nagon Ŋun aje toke ’ya na adi nye a ŋo nagon abur. ¹⁰ A kine kulya iŋge kona daŋin musala, a i ’dutet a ŋina ŋo liŋ köti nyököjine ki i ’diko. ¹¹ A i ŋinu diŋit gwak, a ŋutu musala logon sunyue Kaisaria yu kulo lo ’duröki i mede na mönuŋdye nan kata nu. ¹² A Mulökötyo Loke takiŋdye nan anyen nan moraddu ko lepeŋat ’bak renya. Kilo luoasirik buker köti a nyömöddu nan Kaisaria yu, a yi iŋge luŋö ko ŋilu ŋuto kadi. ¹³ A lepeŋ nyönyökökiŋdye yi adi nye a meddya malaikatat gwogwo ’dan kanyit kadi logon takiŋdya nye adi, Soŋdi ŋutu Yaŋo i luŋgu na Simona logon köti luou a Petero. ¹⁴ Nye mo jajamakin do kulyaesi logon mo lwöggu do se ko mede inot liŋ. ¹⁵ A na suluje nan jambu ko se nu, a Mulökötyo Loke ’duki kase loki gwoso na ’dukiŋdye nye kayaŋ loki i suluet nu. ¹⁶ A kirut a nan iŋge yeye kulyaet lo Matat logon nye a kulyari adi, Yoane köju batiddya ŋutu ko pioŋ, ama ta mo batisa ko Mulökötyo Loke. ¹⁷ A ko ködyö Ŋun a ’dogga se jojo gwoso na ’doggi nye yi i diŋit na yubbi yi Yesu Kristo nu, nyena nan ködyö a ŋa logon bubulö teŋgu Ŋun? ¹⁸ A na yiŋge momoret na kayupök lo gwon Yerusalema kulu kine kulya nu, a se gwe ’bak kulya na jajama, a pupurje Ŋun adi, Ko sona, Ŋun köti aje tiŋdu ŋutu logon ’bayin a Yudayaki kulo i löpuggö na töilyet anyen se gwon ko ru. ¹⁹ Nyena a ŋutu logon a rekin i kulya ti sasanya nagon a ŋien i kulya ti Setepano kulo iŋge jölö tojo Poinike, ko Kuprio, se ko Antlokia, a se tine jamakiŋdya kulye ŋutu ŋilo kulyaet ake jamaki Yudayaki ka ’de. ²⁰ Ama kulye kase kata logon a ŋutu ti Kuprio ko ti Kurene logon a tu Antlokia a köti jamakiŋdye ŋutu logon ’bayin a Yudayaki kulo ŋilo kulyaet, a iŋge tokujö Loŋe Lo ’but lo Matat Yesu. ²¹ A riŋit na Matat gwe ko lepeŋat, a ŋutu jore iŋge yubbö, a löpukuŋdye ko Matat ni. ²² A kanisa na gwon Yerusalema na iŋge yiŋ kine kulya; a se soŋdi Barnaba Antlokia yu. ²³ a na ’durökiŋdye nye a meddi ’busan na Ŋun nu, a nye iŋge lyöŋön; a nye jujukiŋdye se liŋ anyen ’depakiŋdya go i yubbö na Matat ko töilyet kase liŋ. ²⁴ A Barnaba gwe a ŋuto lo ’but, lepeŋ a jore ko Mulökötyo Loke se ko yupet. A ŋutu jore iŋge morakiŋdya ko Matat. ²⁵ A kirut Barnaba iti Taruseu i ga ’yu na Saula. ²⁶ A na ryeji nye lepeŋ nu, a nye joŋgi lepeŋ Antlokia. A i kiŋa ’bukuluŋ a se liŋ murek iŋge tojulin ko kayupök lo momora i ŋinu pirit kulu, a iŋge todiŋdyö ŋutu jore parik. A ŋutu suluje luŋgu kajujumuk ti Yesu a Kristianijin Antlokia yu. ²⁷ A i ŋinu diŋit a kulye nebijin poŋdi Yerusalema yu tojo Antlokia. ²⁸ A lele lose karin kanyit a Agabo ŋine ki a keŋ keju ko riŋit na Mulökötyo Loke adi dyaŋ duma mo kata i kak ’bukuluŋ, a kine kulya ’diri iŋge kona i diŋit na gwoŋdi Kalaudio a kasaranit nu. ²⁹ Nyena a kajujumuk iŋge ruk gwegwe ’ya lwökisi, gwoso nagon ŋutu liŋ geleŋ geleŋ bubulöri na, anyen ko tu paraki ’e luŋasirik kase lo yubbo kulo lo gwon Yudaya yu kulu. ³⁰ a lepeŋat iŋge koŋdya sona, a sunyukiŋdye temejik ti kayupok kine lwökisi i könin lo Barnaba se ko Saula.