¹ Lele ŋuto kata Kaisaria yu karin kanyit a Kornelio. Lepeŋ a duma lo teŋ na kamörök mia geleŋ. Ŋina teŋ luŋu a teŋ na Italia. ² Lepeŋ a katwöyönit lo Ŋun, a lepeŋ se ko mede nanyit liŋ kuŋge Ŋun. Lepeŋ a ka ’dokanit parik lo Yudayaki logon a lomerika, a lepeŋ tine jaran kwakwaddu Ŋun. ³ A i lele lor ko saa musala na koriri, a lepeŋ meddi kulya kanyit i töili, lepeŋ a met malaikatat lo Ŋun ’bura i lupuŋdyö ko lepeŋ ni, i luŋgu na lepeŋ adi, Kornelio! ⁴ A lepeŋ diŋe ŋilo malaikatat go ko kujönö, a pije adi, Kulya a nyo pon duma lio? A malaikatat waddi lepeŋ adi, Ŋun aje ruk kwakwasesi kunök se ko ’dogga inot na ŋutu lomerika, a lepeŋ iŋge yeye do. ⁵ Nyena soŋinana soŋdi ŋutu Yaŋo i luŋgu na lele ŋuto karin kanyit a Simona, logon köti luŋu a Petero; ⁶ lepeŋ ŋilu gwon a kömutöt ko Simona kaŋinyanit lo gobero logon mede nanyit gwon nyona ko tör na ’balaŋ lo. ⁷ A nagon malaikatat lo jambu ko nye lo aje ŋiorö kaŋo nu, a nye luŋgi köliŋönök kanyit murek lo kita mede se ko lele kamörönit lo kilo logon kitakiŋdya lepeŋ perok liŋ. Ŋilo kamörönit a katwöyönit lo Ŋun. ⁸ A Kornelio nyönyökökiŋdye se ŋo liŋ, a soŋdi se Yaŋo yu. A kotumalu nanyit nagon se gwon i kiko nyona ko ’dur köji nu, a Petero kije i lo ’dek lo kadi nyona ko tuparan kiden i kwakwaddu. ⁹ A kotumalu nanyit nagon se gwon i kiko nyona ko ’dur köji nu, a Petero kije i lo ’dek lo kadi nyona ko tuparan kiden i kwakwaddu. ¹⁰ A nye iŋge moka magor a ’deke nyesu. A nagon kinyo nyuŋ tetena nu, a nye gwe gwoso ŋuto lo rurudwe, ¹¹ a nye meddi ki a ŋaju, a nene ŋo a nagalaŋ gwoso boŋgo muket ’duruu kak. Ŋina boŋgo a leleyo goŋesi kanyit iŋwan a kölwene tojo ko kak. ¹² a gweyarijin liŋ ti kijakwa ko ti ŋo lo gwögwöŋtu kak, se ko ti kwen ti ki gwe i lukata nanyit. ¹³ A gworo takiŋdye lepeŋ adi, Petero, ŋine ki, ’duŋge ko nyesi. ¹⁴ A Petero waddi adi, Ti gwon sona pon Matat; kogwon nan kwöŋ a ko nyesu ŋo nagon abur kode nagon jakiŋdya ŋutu lut i kulya ti keri. ¹⁵ A gworo köti kulyani ko lepeŋ daŋ tomurek adi, Do ti bulo luŋgu ŋo nagon Ŋun aje toke ’ya na adi nye a ŋo nagon abur. ¹⁶ A kine kulya iŋge kona daŋin musala. A ’de ’de ŋina ŋo nyököjine ki yu i ’diko. ¹⁷ A nagon Petero nyuŋ gwon i dwadwa ’yu kanyit i töili ko ŋo na met nye kine kweja nyo nu, mete, a ŋutu logon Kornelio a son kulo aje pija ko kadi na Simona gwon ya, a lepeŋat gwe nyu gwogwo ’dan i kötumit. ¹⁸ A se luŋgi luŋgu a pije pija ko ŋona lele kömutöt kata nyu, karin kanyit a Simona logon köti luŋu a Petero. ¹⁹ A nagon Petero nyuŋ yeyeju po na met nye na, a Mulökötyo Loke takiŋdye lepeŋ adi, Mete, ŋutu musala kulu ga ’yu do. ²⁰ Nyena pine ki, kiyaddi kak. An do ko kujönö moraddu ko lepeŋat, kogwon nan lo sunyuŋdyö se. ²¹ A Petero kiyuŋdye kak ko ŋutu kulo ni, a kulyani ko se adi, Nan nyelo logon ta gaga lo. Kulya a ti nyo na pöri ta kine? ²² A se waddi adi, Kornelio duma lo kamörök lo sunyuŋdyö yi. Lepeŋ a ŋuto lo rigwo ko kukuk Ŋun. a ŋutu liŋ ti jur lo Yudayaki luŋgi lepeŋ a lo ’but. A malaikatat loke takiŋdye lepeŋ anyen luŋgu do kanyit midi anyen nye ko yiŋga kulya nagon do jajam kine. ²³ Nyena a Petero luŋuddi lepeŋat kadi anyen gwon a kömu kanyit. Ko ’bure a lepeŋ pine ŋien a moraddi ko se, nyömöji ko kulye luŋasirik lo yubbö kulo lo gwon Yaŋo yu kulu. ²⁴ A i kotumalu nanyit a lepeŋat ’dure Kaisaria, a Kornelio gwe i mömöŋdu na lepeŋat. Lepeŋ a lupuŋdya karu kanyit se ko julin kanyit lo nyanyara kulo i pirit na geleŋ. ²⁵ a na ’durökiŋdye Petero nu, a Kornelio wuyuŋdye lepeŋ a gubakiŋdye mugun kak kanyit i mokosi i twöju na lepeŋ. ²⁶ Ama a Petero ’biluŋdye lepeŋ ki, a kulyani adi, Ŋine ki, nan ko mugun nio a ŋuto kana. ²⁷ a nagon se nyuŋ jajamaddu nu, a lepeŋ luŋöni kadi a ryeji ŋutu jore a momora. ²⁸ a nye kulyani ko se adi, Ta ko ’börik köti deden adi saret a ko rukökin Yudayaki i mora ko ŋutu ti lele gweyari kode i ’yö ’yu na se; ama Ŋun a kwekin nan adi ti nan gwe ti luŋgu lele ŋuto adi lepeŋ gwon abur kode a lut i kulya ti keri. ²⁹ Nyena na sonyoddi ta ŋutu i luŋgu na nan nu, nan a ko renya po. Nyena nan ’dek pija ta adi ko nyo nagon ta luluŋ nan? ³⁰ A Kornelio waddi adi, I perok iŋwan lo lwöŋgu, gwoso i na diŋit na, nan gwon köyö kadi i kwakwaddu i saa musala na koriri, a nan iŋge meddya lele ŋuto a jupu boŋgwat na kokobbu gwo ’dan köyö i komor. ³¹ A lepeŋ luŋgi nan adi, Kornelio, Ŋun aje ruk kwakwasesi kunök ko aje yeye ’dogga inot na lomerika. ³² Soŋdi ŋutu Yaŋo yu i luŋgu na Simona logon köti luŋu a Petero.Lepeŋ lu a kömutöt ko Simona kaŋinyanit lo gobero midi, logon si ’da nyona ko tör na ’balaŋ. ³³ Nyena a nan soŋdi ŋutu ’de ’de i luŋgu na do. Do a koŋdya ’bura kogwon do a po. Nyena yi liŋ kulo ni ko Ŋun i komor anyen yiŋga kulya liŋ nagon Matat a sarakin do i jambu kune. ³⁴ A Petero suluje jambu adi, ’Diri nan a met adi Ŋun ti gwon a kanyunyumönit lo ŋutu; ³⁵ ama lepeŋ ruruk ŋutu ti jurön liŋ logon kukuk lepeŋ ko logon koŋdya po nagon a na ’but kulo. ³⁶ Ta deden adi lepeŋ a sunyukiŋdyö ŋutu ti Yisaraele kulyaet a tuŋge Loŋe Lo ’but lo taliŋ kogwon Yesu Kristo, logon a Matat lo ŋutu liŋ. ³⁷ Ta deden po nagon a pokin i jur lo Yudaya ’bukuluŋ, suluja Galilaya i mukök nagon Yoane a tokujö i kulya ti batisimo. ³⁸ Ta a den kulya ti Yesu lo Najareta, gwoso nagon Ŋun a we ’ya lepeŋ ko welet nagon a Mulökötyo Loke se ko riŋit anyen koŋdya kita. A lepeŋ iŋge wöröji i piritön liŋ koŋdya po na ’but se ko i toligga na ŋutu liŋ logon gwon ko ŋilo kaŋöönit i riŋit kulo; kogwon Ŋun gwon ko lepeŋ. ³⁹ Yi aje met kulya liŋ nagon nye a kon i jur lo Yudayaki se ko i Yerusalema. A ŋutu iŋge tatu lepeŋ i ’bikikindyö na lepeŋ i ködini ki. ⁴⁰ Ama i lor tomusala lonyit Ŋun a topi lepeŋ i twan, a iŋge tikin lepeŋ i meta. ⁴¹ Ti gwon a ŋutu liŋ lo meddya lepeŋ, ama ka ’de yi logon Ŋun a wulun a kokwe a katökorok kulo. A yi iŋge nyesu ko a möju ko lepeŋ i pirit na geleŋ i mukök nagon nye aje ŋien i twan nu. ⁴² a lepeŋ iŋge sarakin yi anyen tokukiŋdyö kine kulya i ŋutu, ko anyen tokurukiŋdyö adi Ŋun a wulun nye a ka ’dupönit lo kulya ti ŋutu lo gwon jörun se ko logon a twatwa kulo. ⁴³ Ŋilo a nye logon nebijin liŋ köju a jambu i kulya kanyit adi ŋutu liŋ logon a yubbö lepeŋ kilo mo pipitöki i toronjin kase kogwon karin kanyit. ⁴⁴ A nagon Petero nyuŋ jajambu nu, a Mulökötyo Loke ’duki i ŋutu liŋ lo yiŋga ŋilo kulyaet kulo. ⁴⁵ a Yudayaki logon a kayupök lo moraddu ko Petero kulo iŋge söŋu kogwon Ŋun a ’bukö kiŋdyo ’doket na Mulokotyo Loke ma ’di i ŋutu logon ’bayin a kase köti. ⁴⁶ Kogwon lepeŋat a yiŋ se i jambu na kutusen ka ’de ka ’de se ko i pupurja adi Ŋun a duma. A kirut Petero pije pija adi, ⁴⁷ Kilo ŋutu aje wuju Mulokötyo Loke gwoso na wuji yi köju nu. Lele ŋuto ŋona bubulo teŋgu se i batisa ko pioŋ le? ⁴⁸ a kirut lepeŋ saŋi saŋu anyen kilo ŋutu babatisa i karin ti Yesu Kristo. Nyena a kilo ŋutu pije Petero anyen monuŋdyö ko se ko kulye perok.