¹ Ashan kida ana bi asalu intum ya akwana, be rahma ta Allah, ashan kede intum gedimu jisim takum ze zebiha al hai, mukadas, mogbul le Allah, de kedima takum al kwes. ² Mata kum lakabatu ma alam al ta hasa, lakin kede intum geiru be fekira al jedid. Ashan kede intum arufu irada ta Allah al kwes, mogbul, al kamil. ³ Fa ana bi kelim ashan neima al wodi le ana, gali ai zol fi beina takum ma fekiri an umon be teriga al fok shedid, lakin kede umon fekiru be teriga ta hikma, ze ma ta godur ta iman al Allah wodi le kulu wahid min nina. ⁴ Ashan ze ma fi jisim wahid fi ada ketir, wa lakin ma kulu ada bi istakal shokol wahid. ⁵ Be nefsa teriga nina al ketirin de, jisim wahid fi Yesua, wa ada baad ta nina le baad wa le tanin. ⁶ Nina indu mowahib barau barau, hasab neima al wodi le nina, kan wodi le inta ta nobuwa, kede amulu hasab godur iman. ⁷ Kan wodi taki ta khidma, kede huwo akhdim, kan wodi le zol hadiya ta taalim, kede huwo alimu. ⁸ wa kan wodi le zol hadiya ta teshji, kede huwo sheja. wa kan wodi le zol hadiya ta wodi, kede huwo amulu be geliba al kuwes. Kan wodi le zol hadiya ta kiyada, kede huwo amulu be teriga al kwes. Kan wodi le zol hadiya ta amulu rahma, kede huwo amulu be farah. ⁹ Kede muhaba kun bidun kibriya, aba ai haja al batal, lesegu bes fi haja al kwes. ¹⁰ Fi kalam ta muhaba ta akwana, kede intum hibu baad takum ma baad. Fi kalam ta ihteram, ihterimu takum baad takum ma baad. ¹¹ Fi kalam ta shokol, kede intum ma kun kasilan, wa fi kalam ta Roho, kede intum kun harisin wa sukunin. Wa fi kalam ta rahma akdim huwo. ¹² Afrah takum fi raja. ¹³ Limu takum sawa fi wodi hajat ta mominin, fadal takum fi biyut takum nas al ma takum be teriga al barau barau. ¹⁴ Bariku nas al bi azibu intum, bariku mata laanu umon. ¹⁵ Afrah ma nas al farhanin, kore ma nas al bi kore. ¹⁶ Kutu takum bala le baad takum ma baad, mata fekiru fi teriga ta dala, lakin gabilu nas al masakin mata kum geni negitin le nefsa takum. ¹⁷ Mata dafa batal ma batal, amulu hajat al kwes fi gidam ta nas kulu. ¹⁸ kan bi agder, lakin hasab guwa takum, kede intum geni fi salam ma nas kulu. ¹⁹ Mata kum dafa batal ma batal le nefsa takum, ya Ahiba, lakin wodi fursa le zalan ta Allah, leanu ze katibu, "Ana yau bi dafa, sibu takum dafa dafa de le ana, Rabuna bi kelim. ²⁰ Lakin kan adu taki jiyan, wodi le huwo akil. kan huwo atshan wodi le huwo moyo. Leanu kan inta bi amulu zede le huwo, de bi mana inta bi zidu jomur ta nar fi ras tou. ²¹ Kede katiya ma jada intum tehet, lakin gilibu takum katiya be amulu haja al kwes.