¹ Biga ana bi kelimu, sei Allah aba nas tou? Ibrahim min gebila ta Benjamin. ² Allah ma aba nas tou, al huwo arufu min bediri. Sei intum ma arufu shunu al kitab bi kelimbe kalam ta Elia, kef huwo asalu Allah did Israel? ³ Ya Rabuna umon katulu anbiya taki, umon kasuru mazbah taki tehet, ana barau yau fadulu, umon bi fetisu haya tai. ⁴ Lakin juwab ta Allah kan le umon shunu? ana hafisu le ana Saba Alf rujal al umon kutu rukuba le baal. ⁵ Ashan kida hata fi zaman ta hasa kaman umon yau al fadulu ashan ikhtiyar ta nina. ⁶ Lakin kan be neima, ma bi kun be amail. wa ile neima ma bi kun neima, wa lakin kan be amail, biga neima ma bi kun fi, wa ile amail ma bi kun amail. ⁷ Biga shunu? al hajat al israel bi fetisu, umon ma ligo. lakin al mukhtarin ligo. wa al bagiya gulub tomon gowi. ⁸ Huwo bes ze ma huwo moktub: "Allah wodi le umon Roho ta balada ashan uyun tomon kede ma aiynu, wa adana tomon ashan kede ma asuma, le yom ta alela." ⁹ Biga Daud bi kelim: "kede tarbiza tomon kun shabaka wa sherek wa gofulu wa akaab le umon. ¹⁰ Kede uyun tomon tala duluma ashan kede umon ma aiynu, wa umon bi meilu dahar tomon kulu yom." ¹¹ Wa ana bi kelim, sei umon gofulu ashan kede umon waga? La, de ma bi hasil. Lakin bi fashal tomon kulasa ja le umam, ashan bi amulu gera wa fadiya. ¹² Teib kan fashal tomon ganiyan le alam, wa kan kasara tomon ganiyan le umam, biga shokol kamil tomon bi kun kef? ¹³ Lakin hasa ana bi kelimu le intum umam, wa ze ma ana rosul le umam, ana bi dala ma kidma tai. ¹⁴ Ana bi hagiru le hasada nas al tabi le ana, bi kun nina bi kalisu baad min umon. ¹⁵ Leanu kan aba tomon yau musalaha ta alam, biga rudu tomon bi kun shunu, kan haya ta nina mutu? ¹⁶ Kan awel simar mahjuz, wa kaman kutla ta ajin. kan juzur mahjuz, wa kaman al furuh. ¹⁷ Lakin kan baad min furu de gatau, wa kan inta yau fereta zeitun ta sahara, limu inta sawa ma umon, wa kan inta sharig ma fi taam ta shajera zeitun al asil. ¹⁸ Fa mata dala le furu, lakin kan inta dala, de ma inta yau bi saudu juzur al asil, lakin juzur al asil de yau bi saudu inta. ¹⁹ Biga inum bi kelim gal, gatau furu ashan bi taaimu ma ana. ²⁰ De hagiga ashan adam iman tomon yau gatau umon bara, lakin intum wogifu gowi ashan iman takum, mata kum fekiri be teriga ta dala an nefsa takum, lakin kafu takum. ²¹ Leanu kan Allah ma bi zidu furu al tebiya, wa la bi zidu le inta. ²² Yala biga aiynu, le shokol kwes wa kutura ta Allah, kutura tou le Yahudin al umon waga, lakin shokol kwes ta Allah le inta, kan inta istemir fi shokol kwes tou, wa ile bi gatau inta bara. ²³ Wa kan umon ma sabitu ashan adam iman, bi teimu umon, leanu Allah bi agder ashan bi taimu umon tani mara. ²⁴ Leanu kan gatau inta min shegera zeitun ta sahara hasab al tebiya, wa biga teimu inta bidu tebiya fi shejera ta zeitun al kwes, godur shunu bi taimu nas al umon hasab tebiya fi shejera zeitnu tomon al khas? ²⁵ Ashan ana ma deiru intum ya akwana tai ashan bi jahilu sir de, ashan intum ma bi kun negitin fi nefsa takum, au fikra takum, al sir de inu geliba al gowi al nus ja le Israel, lahadi nas umam bi kun kamil. ²⁶ Inu Israel kulu bi ligo kulasa, bes ze ma katibu: mukalis bi ja min Sahyun. Huwo bi shilu katiya min Yakub. ²⁷ Wa de bi kun tifagiya tai ma umon fi zaman al kan ana shilu katiya tomon. ²⁸ Lakin ze ma min taraf ta Injil umon ada min ajil takum, lakin ze ma min taraf ta ikhtiyar umon mahbubin ashan abuhat tomon. ²⁹ Ashan hadiya wa nadi ta Allah ma bi geiru. ³⁰ Leanu intum kan ma bi ihterimu Allah, lakin hasa intum ligo rahma ashan adam ihteram tomon. ³¹ Be nefsa teriga kaman yahudin del ma bi ihterimu ashan kaman bi rahamu umon be rahma ma intum. ³² Ashan Allah gofulu nas kulu fi adam ihteram, ashan huwo bi agder rahamu umon kulu. ³³ Godur shunu gina wa hikma wa maarafa ta Allah amig, wa godur shunu ma bi agderu fetisu hukum tou, wa sika tou ma bi agder arufu. ³⁴ Leanu de munu yau arufu fikira ta Rabuna au de munu yau biga mustishat tou? ³⁵ Au de munu yau al nimira wahid wodi haja le Allah al inu Allah bi dafa huwo? ³⁶ Leanu min huwo wa be wasat huwo wa le huwo kulu hajat, mejid le huwo ile al abad. Amin.