¹ Ya akwana, niya ta geliba tai wa talab tai le Allah ashan umon, wa le kulasa tomon. ² Leanu ana bi shahidu le umon gali umon indu gira le Allah, lakin ma hasab al marafa. ³ Leanu umon ma arufu shokol adil ta Allah, wa umon bi asalu ashan bi amulu shokol adil tomon, ma bi ihterimu shokol adil ta Allah. ⁴ Ashan Yesua yau bi kamilu namus ta shokol adil le ai zol al amin. ⁵ Ashan Musa bi katibu an shokol adil al bi ja min namus, "Zol al bi amulu shokol adil ta namus bi hai ma shokol adil de." ⁶ Lakin shokol adil al ta iman bi kelimu zede, mata kelimu fi fi geliba, gali munu yau bi ruwa fi sama? (Ashan bi jibu Yesua al Mesih tehet); ⁷ wa ma bi kelim, munu bi ruwa fi hawiya? (ashan bi jibu Yesua al Mesi min mutu). ⁸ Lakin huwo kelimu shunu? "Al kelima gerib min inta, fi kasuma taki, wa fi geliba taki." De kelima ta iman al nina bi beshiru. ⁹ Ashan kan be kasuma taki inta kan iterifu be Yesua ze Rabuna, wa kan amin fi geliba taki gali Allah gumu huwo min mutu, inta bi ligo kulasa. ¹⁰ Ashan geliba bi amin le shokol adil, wa huwo bi iterifu be kasuma le kulasa. ¹¹ Leanu kitab bi kelim, kulu zol al amin fi huwo ma bi kun indu fadiya. ¹² Biga ma bi kun fi ferik beina Yahudi wa Yonani, leanu Rabuna al wahid de le nas kulu, wa huwo ganiyan le kulu nas al bi nadi huwo. ¹³ Leanu kulu zol al bi nadi isim ta Rabuna bi ligo kulasa. ¹⁴ Wa kef umon bi nadi zol al umon ma amin fogo? wa kef umon bi amin fi zol al umon ma asuma kabara tou? wa kef umon bi asuma bidun mubeshir? ¹⁵ Wa kef umon bi beshiru kan ma rasulu umon? Ze ma katibu, jemil godur shunu kurein ta mubeshirin be kelima al kwes!" ¹⁶ Lakin ma kulu nas asuma injil, leanu Isaiah bi kelimu, "Rabuna, de munu yau aminu fi kelima ta nina? ¹⁷ Ashan kida iman bi ja min asuma, wa be asuma kelima ta Yesua al Mesih. ¹⁸ Lakin ana bi kelimu, sei umon ma asuma? Nam wa, ana mutuakid. gali asuma tomon ruwa wa asuma le duniya. Kulu, wa kelimat tomon wosulu le akir duniya." ¹⁹ Lakin ana bi kelimu, sei Israel ma arufu? awel haja Musa bi kelimu, ana bi alisu intum be haja al ma nas. Be nas al belidin al ma fahimin ana bi sibu intum zalanin." ²⁰ Wa kan Isaiah kan ma bi kafu wokit huwo bi kelim, "Ana ligo nas al ma bi fetisu ana, ana beinu le nas al ma bi asalu ana." ²¹ Lakin le Israel huwo kelim, ana bi midu idan tai le nas al ma bi ihterimu ana, nas al giladabin."