¹ Zaman huwo reja min Capernaum baad ayam besit, asmau inu huwo kan fi bet. ² Nas ketir lemu hinak lahadi mahal biga mafi, hata fi kasma bab, wa Yesua wonusu kelima de le umon. ³ Baad dak rujal tanin jibu le huwo zol al moshlul: arba nas yau gi arfa huwo, ⁴ Zaman umon ma agder ja le huwo ashan nas kan kutar, umon agela zinki ta ras juwa al kan Yesua fogo, bad umon fata ras juwa de, umon nezilu feriz al zol moshlul de bi num fogo. ⁵ Zaman Yesua aiynu imaan tomon, Yesua kelimu le zol al moshlul, " Ya jena , afi katiya taki." ⁶ Yala kan fi kataba gi geni hinak, umon bada fekiru fi geliba tomon, ⁷ " Zol de bi wonusu zede kef? de tejdiif! munu yau bi afii katiya ile Allah bes ?" ⁸ Yesua tuwali arufu fi roho sunu yau nas de kan gi fekiru fi nufus tomon. huwo kelimu le umon, lee intum gi fekiru ze de fi gulub takum? ⁹ Sunu yau sahil ashan be kelimu le zol al moshlul de, " Inu katiya taki afi au be kelimu gum fok, silu feris taki wa douru? ¹⁰ Lakin ashan intum be aruf inu ibni insan indu sultan fi duniya ashan bi afii katiya, huwo kelimu le mushlul, ¹¹ "Ana kelim le inta, gum fok shilu feriz taki wa ruwa fi bet taki," ¹² huwo gum fok wa be sura shilu feris, wa ruwa fi bet fi gedam ai zo, biga umon kan istagrab, wa umon wodi majid le Rabuna, wa umon kelimu, "Nina kulu kulu ma aiynu ai haja ze de ¹³ Wa umon ja ruwa fi taraf bohira wa nas kulu ja le umon, wa huwo derisu. ¹⁴ Ze ma huwo gi ruwa, huwo aiynu Levi jena ta Alpheaus bi geni fi mahal ta daraib wa huwo kelimu le huwo, " taal wara tai." huwo gum fok wa ruwa wara tou. ¹⁵ Yesua kan gi akulu fi bet ta Levi wa kan nas ketiir ta daraib wa nas al katiyiin kan gi akulu ma huwo wa ma talamize bi tou, wa kan umon ketiir wa umon gi douru wara huwo. ¹⁶ Zaman kataba al kan umon pharisiin aiynu inu Yesua gi akulu ma nas ta daraib, umon kelim le talamiz bitou, " Lee huwo bi akulu ma nas ta daraib wa nas al katiyiin?" ¹⁷ Zaman Yesua asuma kalam de huwo kelim le umon, " Nas al ma ayaniin umon ma deir diktor, ile nas al ayaniin yau deir fakat. Ana ma ja ashan nadi nas al kwesin, lakin nas al katiyin." ¹⁸ Hasa talamiz ta Yesua wa Ferisiin gi saim. fi baad min nas ja le huwo a kelim le huwo, " lee talamiz ta Yuhana wa talamiz ta ferisiin gi saim lakin talamiz taki ma gi sum? " ¹⁹ Yesua kelim le umon, " Hal nas al fi iris be saim wa aris fii ma umon? ze ma aris lisa fii ma umon, umon ma be saim. ²⁰ Lakin ayam bi ja al bi shilu aris min umon, wa fi ayam de umon bi saim. ²¹ Mafi zol bi keitu geta ta gumas al jedid fi gumas al gedim. wa ile gumas al jedid de be seritu gumas al gedim de biga bi kun kusara kebiir. ²² Mafi zol bi kutu khamur al jedid fi buksa gedim, ile khamur de bi fagau buksa wa khamur ma buksa de kuku bi karabu, lakin, kutu khamur jedid bi kutu fi buksa al jedid. ²³ Fi yom sebit Yesua ruwa fi mahal zara ta dura, wa talamiz tou bada gata baad min ras ta dura. ²⁴ Biga ferisiin kelim le huwo, " Aiynu lee umon gi amulu hajat al ma ganuni fi yom sebit?" ²⁵ Huwo kelim le umon, " Hal intum ma agara an Daud zaman huwo ka muhtaj wa jeyan- huwo wa nas al ka n ma huwo- ²⁶ Kef huwo kan ruwa fi bet ta Rabuna zaman Abiatar kan khahan al kebiir, wa akulu esh al kan mojud, al kan huwo ma ganuni le ai zol ashan bi akulu ila khahan, wa huwo wodi le nas al kan ma huwo?" ²⁷ Yesua kelim, " Yom sebit de kan amulu le insaan, ma ".insaan le yom sebit. ²⁸ Ashan kida, ibin al insaan huwo Rabuna, wa hata le yom al sebit