¹ Zaman huwo ja fi Urselim, umon gerib min Bethphage wa Bethany fi jebel ta Zeton, wa Yesua rasulu itniin min talamiz tou, ² Wa kelim le umon, " ruwa takum fi beled al gerib de. Kan intum wosulu hinak, intum bi ligo humar al lesa ma sugu. Fiku takum huwo wa jebu takum le ana. ³ Iza kan ai zol asalu itakum gali, ' lee intum shilu humar de?' Keli intum kelim, ' Rabuna yau deiru wa tuwali bi rasulu hini.'" ⁴ Umon ruwa wa ligo humar de robutu bara fi kasma bab, wa umon fiku humar de. ⁵ Fi nas tanin bi wogif hinak wa kelimu le umon, " Intum gi amulu shunu? Malu intum gi fiku humar de?" ⁶ Umon kelimu le nas de ze ma yesua kelim le umon, wa nas de sibu umon ashan b ruwa. ⁷ Umon jibu humar de le Yesua wa umon kutu malabis tomon fi ras humar de, wa huwo geni fogo. ⁸ Nas ketir ferisu gumasat tomon fi sika, wa nas taniin ferisu awrak ta shejera fi sika. ⁹ Nas al ruwa gidam tomon wa nas al gi wara tou guna shedid, " Hosana! Baraka le zol al ja bi isim ta Rabuna. ¹⁰ Baraka le mamlaka ta Daud al gi ja! Hosana fi al ali!" ¹¹ Baad dak Yesua dakalu fi Urselim wa ruwa fi al haikal zaman huwo aiynu hawli hajat kulu. Kan wokit biga mutaakir, huwo ruwa fi Bethany ma talamiz tou al itnashar. ¹² Fi yom al tani zaman huwo gi tala bara min Bethany, huwo kan biga jeyan. ¹³ Huwo aiynu min beyid fii shejera ta teen al fogo auwrak, huwo ruwa aiynu kan huwo bi ligo fuaki fogo, wa zaman huwo ja gerib huwo ma ligo ai haja ila auwrak ta shejera, de yau kan ma zaman ta weleda shejera teen. ¹⁴ Huwo kelim le shejera de, " Mafi ai zol bi akulu min fuaki taki tani mara." Wa talamiz tou asuma. ¹⁵ Umon ja fi Urselim, wa zaman Yesua dakalu fi Haikal wa bada turudu nas al kan gi biyu wa gi ishteri fi Haikal. Huwo gelibu tarebizat ta nas al gi geiru gurush wa karasi ta tujar al gi biyu hamamat. ¹⁶ Huwo ma deiru ai zol min tujar del ashan bi tala min Haikal ma hajat tomon. ¹⁷ Huwo alimu umon wa kelim, " Ma katibu gal, 'Bet tai bi nadi bet ta salawat le nas kulu'? Lakin intum amulu huwo mahal ta haramiya." ¹⁸ Reis ta Khahana wa Kataba asuma kalam al huwo kelimu de, wa umon fetisu teriga ashan bi katulu huwo. Umon kan gi kafu huwo leanu nas kulu kan mustagarabiin min talim tou. ¹⁹ Zaman wata biga misah, umon tala min medina. ²⁰ Zaman umon gi dowru fi sabah, umon aiynu shejera teen de yabis lahadi irik tou. ²¹ Butrus zekiru wa kelim, " Mualim, Aiynu! Shejera ta teen al inta laanu de yabis.." ²² Yesua juwabu umon, " Keli intum indu imaan fi Allah. ²³ Ana bi kelimu le intum hagiga inu iza kan ai zol kelimu le jebel de, 'gum wa ruwa jada nefsak fi juwa bahar; wa iza kan huwo ma indu shak fi gelba tou lakin huwo amin inu hajat huwo kelim de bi hasil, de yau haja al Allah bi amulu. ²⁴ Ashan keda ana kelim le intum: Ai haja al intum seli wa asalu, amin takum inu intum bi ligo, wa bi kun takum. ²⁵ Kan intum wogif wa gi seli intum lazim keli afi ai zol al intum amulu batal le umon, ashan Abu takum al fi sama kaman bi afi katiya takum." ^{26 27} Umon ja fi Urselim tanimara, Ze ma Yesua gi dowru fi Haikal, reis al khahana, wa al kataba, wa al shiyuk ja le huwo. ²⁸ Umon kelim le huwo, " Inta gi amulu hajat de be yatu sulta, wa munu yau wodi le inta sulta de?" ²⁹ Yesua kelim le umon, " Ana bi asalu intum wahid su-al. juwabu takun ana wa ana bi wori le intum be yatu sulta ana bi amulu hajat del. ³⁰ Hal mamudiya ta Yuhana kan, min samah wala min nas? Juwabu takum ana." ³¹ Umon nakishu fi bein tomon wa umon fekiru wa kelim, " Kan nina kelimu, Min samah,' Huwo bi kelim gal, ' Teib lee intum ma amin?' ³² Lakin iza kan nina kelimu gali min nas,'...." Umon kan gi kafu nas, leanu ai zol kan arufu inu Yuhana kan nebi. ³³ Biga umon juwabu Yesua gali, " nina ma arufu." Yala ".Yesua kelimu le umon " kaman ana ma bi wori le intum be yatu sulta ana gi amulu hajat del