¹ Fi ayam dak, Herodos Antipas asuma kabar an Yesua. ² Huwo kelim le kudam tou, ''De yau Yuhana moamadan; huwo gam min al mut. Ashan kida huwo sahal be guwa de.'' ³ Herodos gabadu Yuhana, wa kutu huwo fi sijin be sabab ta Herodias, mara ta aku tou Philip. ⁴ Yuhana kelim le huwo, ''huwo ma ganuni ashan inta bi shilu hiya ze mara taki. ⁵ Herodos kan bi katulu huwo , lakin huwo kafu nas, le-anu nas arufu huwo nebi. ⁶ Lakin zaman id milad ta Herodos ja, Biniya ta Herodias alabu fi nus wa Herod tala farhan. ⁷ Fi rad, Huwo waad ashan bi wodi le hiya ai haja al hiya asalu. ⁸ Baad ma hiya asuma le tojihad ta umu, hiya gali ' Wodi le ana, hina fi sahan kebir, ras ta Yuhana Moamadan.'' ⁹ Melik kan ma murta be talab ta hiya, lakin ashan waad wa ashan kulu nas al kan ma huwo fi gada, huwo amiru be inu keli amulu. ¹⁰ Huwo rasulu nas ashan gatau ras ta Yuhana fi dakil sijin. ¹¹ Baad dak ras tou kan jibu fi sahan wa wodi le hiya wa hiya shilu le uma tou. ¹² Baad dak talamiz ja, shalu jusha, wa dofunu. Baad de, umon ruwa wori le Yesua. ¹³ Hasa zaman Yesua asuma kalam de, huwo tala min hinak be murkab le mahal al ma bi aiynu huwo. Zaman asuma kalam de, umon ruwa wara tou min kulu medina. ¹⁴ Baad dak Yesua ja gidam umon wa aiynu nas al limu. Huwo hin le umon wa aliju nas tomon al kan ayanin. ¹⁵ Zaman ta misa, talamiz ja le huwo wa gali, mahal sahara, yom de intaha. nas al limu de keli ruwa, ashan umon bi ruwa le beled ashan isteri le umon akil ¹⁶ Lakin Yesua kelimu le umon. ''Ma mohim ashan umon bi futu. Wodi le umon haja ashan umon bi akulu. ¹⁷ ''Umo kelim le huwo, ''Nina indu kamsa esh wa itnin samak.'' ¹⁸ Yesua kelimu jibu takum le ana.'' ¹⁹ Baad dak Yesua wori le nas al limu de keli geni tehet fi ras ges. Huwo shilu kamsa esh wa itnin samak. huwo aiynu fok le samah, huwo bariku wa kasuru esh de wa wodi le talamiz wa talamiz wodi le nas al limu. ²⁰ Umon kulu akulu wa tala sabanin. Baad dak umon limu itnasar gufa min akil al fadulu. ²¹ Del al akalu kan ze kamsa alf rujal, bara min nasawin wa iyal. ²² Tawali huwo kelim le talamiz keli dakal fi murkab wa ruwa gidamu le tija a tani ta bahar, wa huwo bi wori le nas allimu kede ruwa fi mahalat tomon. ²³ Baad huwo wori le nas al limu de kede ruwa, huwo ruwa fi ras jebel be nefsu ashan bi seli. Zaman ta misah, huwo kan hinak barau. ²⁴ Lakin murkab kan biga beid, hawa kan bi hizu shedid, hawa kan bi hizu murkab shedid. ²⁵ Fi saat al araba gerib sabah Yesua ja le umon, bi douru fi ras bahar. ²⁶ Zaman talamiz aiynu huwo fi ras bahar, umon kafu wa gal, ''de roho ta zol meit,'' umon kafu wa kore shidid. ²⁷ Lakin Yesua kelim le umon fi nefsu zaman gal,'' kunu shuja! de ana! matakun kafu.'' ²⁸ Butrus juwabu huwo wa kelimu, 'Rabuna, kan de inta, nadi ana ashan bi ja le inta fi ras moyo.'' ²⁹ Yesua kelimu, ''taali.'' Butrus gam min murkab wa douru fi ras moya ashan ruwa le Yesua. ³⁰ Lakin zaman butrus aiynu hawa, huwo kafu. zema huwo bi katis, huwo kore fok wa kelimu, ''Rabuna alagu ana!'' ³¹ Yesua bada midu ida tou, huwo gobudu butrus, wa kelimu le huwo, ''inta al iman taki suker, le inta indu sukuk?'' ³² Baad dak Yesua wa butrus ruwa le murkab, hawa de wagaf. ³³ Baad dak talamiz al kan fi juwa Murkab abidu Yesua wa gal, ''Hagiga inta ibin Allah. ³⁴ Zaman umon gata bahar, umon ja wa nazalu fi Gennesaret. ³⁵ Zaman nas al fi mahal dak zekiru Yesua, umon rasulu kabarat fi kulu mahal fi hawil hila, wa umon jabu le huwo ai zol al kan ayan. ³⁶ Umon asalu huwo ashan bes bi lemesu gumas tou, wa nas al kutar al kan lemesu ligo ilaj.