¹ Fi zaman Yesua ruwa yom sebit abri zira-at ta dura. Talamiz tou biga jiyanin wa bada amurugu dura wa bi akulu. ² Lakin zaman pharisiyi aiynu, Umon kelimu le Yesua, 'Aiynu, Talamiz taki bi amulu kalam al ma ganuni al afrut ma bi amulu fi yom Sebit.'' ³ Lakin Yesua kelim le umon, ''Intum ma agara kulu kulu haja al Daud amulu, zaman huwo jiyan, wa nas al kan ma huwo? ⁴ Huwo ruwa fi bet ta Allah wa akal esh al kan fi, al ma ganuni le huwo wa ma ganuni le del al kan ma huwo, lakin ganuni bes le khahana. ⁵ Hal intum ma agara fi ganun, be-inu yom Sebit khahana fi haikal bi amulu hajat al afrud ma bi amulu yom Sebit lakin umon ma indum zam? ⁶ Lakin Ana bi kelim le intum be-inu al kebir min haikal fi hina. ⁷ Kan intum arufu mana ta kalam de, 'Indi niya le rahma wa ma zebiha,' intum kan ma bi hakimu nas al ma indum zam. ⁸ Fa ibin al insan huwo Rabuna ta Yom Sebit.'' ⁹ Baad dak Yesua sibu mahal dak wa ruwa le bet ta salawat. ¹⁰ Kan fi zol al ida tou shalal. Al Pharisiiyin asalu Yesua, gal, ''hal huwo ganuni ashan bi aliju fi yom Sebit?'' ashan umon bi tahamu be-inu huwo amulu katiya. ¹¹ Yesua kelimu le umon, ''zol yatu yau bikun fi wasat takum, bi kun munu, Kan huwo indu wahid koruf fakat, wa kan koruf de waga fi hufra towil fi yom Sebit, yau ma bi gobudu wa bi juru bara? ¹² Keima tou godur sunu, ta insan min ta koruf! Ashan kida huwo ganuni ashan bi amulu haja kwes fi yom Sebit.'' ¹³ Baad dak Yesua kelim le zol de, ''midu ida taki dukri.'' Huwo midu dukri, wa ligo ilaj, ze ta ida tani de. ¹⁴ Lakin Pharisiiyin ruwa bara wa khatit did huwo. Umon kan bi fetisu teriga al umon bi katulu huwo. ¹⁵ Zema yesua arufu kalam de, huwo tala min hinak. Nas kutar kan ruwa warau, wa huwo aliju umon kulu. ¹⁶ Huwo amiru umon kede nas tanin ma arufu huwo. ¹⁷ ashan kalam de bikun hagiga, Kalam al kan wonusu be wasat nebi Isaiah, bi gul, ¹⁸ ufAinyu, kadam tai al Ana azilu; al mahbub, fi huwo ana moksut. Ana bi kutu Roho tai le huwo, wa huwo bi alinu hukum le nas al geir yahudiiyin. ^{21 19} Huwo ma bi zalan wele kore shedid; wele mafi ai wahid bi asuma sot tou fi shawari. ²⁰ Huwo ma bi kasuru ai shejera; huwo ma bi batulu ai kheit al bi tala dukhan, lahadi huwo bi kutu adala le intishar 21 wa fi isim tou nas al geir yahudiyin bi indu raja kamil.'' ²² Baad dak zol tani amiyan wa tamtam, moskun be aruwah sherir, jabu le Yesua. Huwo aliju zol de, be netija de zol al tamtam de bi wonusu wa bi shuf. ²³ Kulu nas al limu kan mustagrabin wa gal, ''hal zol de bikun ibin Daud?' ²⁴ Lakin zaman Pharisiiyin asuma an mujiza de, umon kelimu, ''Zol de ma bi turudu aruwah sherir bara ile be Belzebul, Amir ta aruwah sherir.'' ²⁵ Lakin Yesua arufu afkar tomon wa kelimu le umon, ''Ai molokut mugasm did nefsu ma bi kun sabit, wa ai medina au bet mugasam did nefsu ma bi wogif. ²⁶ Iza kan Sitan bi turudu Sitan bara, huwo gesimu did nefsu. Momlaka de biga bi wogif kef? ²⁷ Wa iza ana bi turudu bara aruwah sherir be Beelzebul, iyal takum bi turudu umon bara be isim munu? Fa le sabab de umon bikun guda takum. ²⁸ Lakin iza ana bi turudu aruwah sherir bara be Roho ta Allah, molokut ta Allah biga nezil le intum. ²⁹ Ai zol bi dakalu kef fi bet ta zol al indu guwa wa bi seregu hajat tou bidun huwo ma robutu zol al indu guwa de awel? Baad dak huwo bi seregu hajat min bet tou. ³⁰ Zol al ma ma ana huwo did ana, wa zol al ma bi limu ma ana bi shetet. ³¹ Ashan kida Ana bi kelim le intum, Kulu katiya wa kulu kalamat shar bi afi, lakin kalamat shar did Roho ma bi afi. ³² AI zol bi kelim kalam batal did Ibin al insan, bi afi. Lakin ai zol al kelim batal did Roho Al kudus, ma bi afi huwo. wele fi ardi de, wele fi dak al bi ja. ³³ Amulu shejer kwes wa shamar tou kwes, au amul shejer batal wa shamar tou batal, Shejer bi arufu be shamar tou. ³⁴ Intum iyal ta dabaib, intum sheririn, intum bi kelim kalam kwes kef? kalam al batal al fi dakil gelib yau kasuma bi gul. ³⁵ Zol al kwes min hajat kwes al fi geliba tou bi kelim hajat al kwes, wa zol al sherir min hajat al sherir al fi geliba tou bi kelim hajat sherir. ³⁶ Ana bi kelim le intum be-inu fi zaman ta hukum nas bi wori kulu kilma al batal al umon kelimu. ³⁷ Fa be kilmat taki inta bikun beri, wa be kilmat taki bi hakimu inta.'' ³⁸ Bad dak kataba wa Farisiyin tanin juwabu Yesua wa gal, '''Mualim, Nina kan deirin ashan bi suf alama min inta.'' ³⁹ Lakin Yesua juwabu wa kelimu le umon, ''sherir wa jil ta zina bi fetis alama. Lakin mafi alama bi wodi le huwo ile alama ta nebi Yonah. ⁴⁰ Yonah kan indu talata ayam nahar wa bilel fi batun ta samak kebir, Ibin al Insan kaman bi indu talata ayam nahar wa bilel fi gelib ta ard. ⁴¹ Muatinin ta Niniweh bi wogif fok fi zaman ta hukum be jil ta hasa wa bi hakimu. umon tuubu fi bushara ta Yonah, wa suf, zol tani akbar min Yonah fi hina. ⁴² Melka ta Junub bi gum fok fi zaman ta hukum ma nas ta jil de wa bi hakimu. hiya ja min akir duniya ashan bi asuma hikma ta Solomon, wa suf, Zol al akbar min suliman fi hina. ⁴³ Izakan roho al nijis tala bara min insan, huwo bi yemsi fi tija al ma indu moya wa bi fetis mahal ta raha, lakin ma bi ligo. ⁴⁴ Huwo bi kelim, ' Ana bi rija le bet tai al ana ja min fogo.' Bat huwo raja, huwo bi ligo bet dak nedifu bara wa kutu fi nizam. ⁴⁵ Wa huwo bi ruwa ashan bi shilu ma huwo sabah arua tanin aktar minu, wa umon kulu bi ja ashan bi ish hinak. Wa hala al akir ta zol dak bikun batal min al awel. Huwo bikun bes ze dak ma jil al sherir de.'' ⁴⁶ Zaman Yesua lisa bi kelim le jamahir, Uma tou wa akwan tou wagaf bara, deir ashan bi kelim ma huwo. ⁴⁷ Zol tani kelim le huwo, ''suf, uma taki wa akwana taki wagifin bara, deir ashan bi kelim ma inta.'' ⁴⁸ Lakin Yesua juwabu wa kelimu le huwo munu kelim le huwo, ''Munu yau uma tai wa munu yau akwana tai?'' ⁴⁹ Huwo biga midu ida le talamiz wa gal, ''aiynu Yau uma tai wa akwana tai! ⁵⁰ Ai zol al bi amulu irada ta Abu tai al fi samah, Zol dak yau aku tai, wa ukut, wa uma.''