¹ Wa bi nisba le intum, intum meitiin fi shar wa katiya takum. ² Intum kan gi ish fi shar wa katiya hasab terigat ta alam. intum kan gi ish hasab hukum ta sultat ta alam, roho al gi istakal fi iyal ma indum taa. ³ Ze ma nina kulu kan ish fi wasat ta nas del, ashan bi kemilu shahwat ta tebiya ta nina al ta katiya, wa bi amulu shahwat ta jisim wa fikra. Bi tebiya nina iyal ta zalan min Allah, ze bagi nas taniin kaman. ⁴ Lakin Allah ganiyan fi rahma ashan muhaba tou al azim al huwo hibu nina. ⁵ Fi zaman al nina meitiin fi katiya, huwo kutu nina hayiin ma baad fi al Mesih- intum kudusiin bi niema. ⁶ Allah gumu nina sawa ma al Mesih, wa Allah kutu nina geni ma baad fi samawat fi al Mesih Yesua. ⁷ Ashan fi aukat al jai huwo bi wori le nina niema tou al ganiyn al kebir al ma indu hodud al huwo wori kwes tou le nina fi Yesua al Mesih. ⁸ Bi neima intum kudusiin bi wasat iman, wa de ma min intum, de hadiya ta Allah. ⁹ Neima de ma min amail ashan keli zol ma dala. ¹⁰ Nina amal ta ida ta Allah, kalagu fi Yesua al Mesih ashan bi amulu amail al kwes al katitu le nina min zaman towil, ashan nina bi amulu. ¹¹ Ashan kida zekir takum inu kan intum umamiin fi al jisim. nadi intum nas al ma " Taharu" mana ta " Tuhura" al amulu fi jisim bi ediin ta insan, ¹² Fi zaman dak intum kan munfesiliin min al Mesih. intum kan ajanib le nas ta Israel. intum kan ajanib le itefagiyat ta waad. intum ma indu raja an al mustagbal. intum kan bidun Allah fi al alam. ¹³ Lakin hasa fi al Mesih Mesua intum al kan beid min Allah jebu intum gerib bi doom al Mesih. ¹⁴ al huwo yau salam ta nina. huwo amulu al itniin wahid. bi jisim tou huwo demiru heta ta addawa al kan gesimu nina. ¹⁵ De yau, huwo wogifu ganun ta wasaya wa nizam ashan huwo bi kalagu wahid insan le nefsa tou, wa gi amulu salam. ¹⁶ Al Mesih amulu musalaha bein yahudiin wa umamiin fi jisim wahid le Allah bi wasat al selib, huwo wogifu al addawa. ¹⁷ Yesua ja wa bashir salam al kan beidin wa salam le nas al kan geribiin. ¹⁸ Bi wasat Yesua nina kulu wosulu fi Roho wahid le Allah Al ab. ¹⁹ Biga, hasa intum yaa umamiin ma biga ghuraba wa ajanib. lakin intum biga muateniin sawa ma nas ta Allah al kudusiin wa adaa ta bet Allah. ²⁰ Biga abinu intum fi asas ta rusul wa anbiya, wa al Mesih Yesua nefsu yau hajer al zawiya. ²¹ Al fi huwo al bet kulu gi wogifu sawa wa bi raba ze haikal fi Rabuna. ²² Kaman bardu abinu intum fi huwo ma baad ze mahal ta guwad ta Allah fi Rohu.