¹ Anbiya al kadabin ja le nas, wa mualimin al kadabin kaman bi ja le itakum. be teriga tabsir umon bi jibu ma umon talim al galat, wa umon bi anguru said al biu umon. Umon gi jibu damar gowam le badun tomon. ² Ketirin biruwa wara uslub tomon, wa be wasat umon sika ta hag bi wuduru. ³ Be shukul tamma umon biligu maksab bi kelimat tomon ta kabasa. Hukum tomon ma bi akir ketir; damar tomon ma gi num. ⁴ Kan Allah ma sibu malaikat al amulu katiya bidun uguba. Lakin uwo selimu umon murbutin be genzir fi makan ta duluma lahadi yom ta hukum. ⁵ oKaman,uwo ma sibu nas ta alam al gedim. Lakin, uwo hafisu Noah, al gi wunuso bir, ma saba nas tanin, wokit uwo jibu tofan fi dunia al ma deru Allah. ⁶ Allah bardu aragu itnin medina ta Sodoma wa Gomora le rumad wa hukumu umon be damar, ashan bi kun misal le haja al gi ruwa hasil le nas al bi rudu Allah. ⁷ Lakin ze le Loto al adil, al kan assuro ma aklak ta nas al gi kasuru ganun, Allah ankiso uwo. ⁸ Asahan zol al adil de, al kan gi ish fi nus tumon yom bat yom, kan gi tabu demir tou al adil ashan haja al uwo asuma wa ayinu. ⁹ Allah arufu kef bi ankiso nas tou min tajarib, wa kef bi amsuku nas al ma adil le yom ta hukum. ¹⁰ De hagiga kasatan le delin al bi istemir fi niyat ta fasad ta gisim wa bi alisu sulta. Umon ma gi kafu ashan amulu irada tomon. Umon ma gi kafu ashan bi wonosu galat an al mumajidin. ¹¹ Malaikat indu guwa wa gudura azim, lakin umon ma jibu le Rabuna hukum ta sitima dit umon. ¹² Lakin delin al ze haiwanat al ma indu muk kalagu umon ashan bi gubudu wa demiru. Umon ma aruf umon gi sitimu shunu. Gi ruwa demiru umon. ¹³ Umon bi akudu ujura ta amulu galat tomon. umun fekir gali amulu niyat bi nahar uwo haja kwes. umun waskanin wa indu uyub. Umon gi itmata shukul kabasa tumon ligu umon gi ihtefil ma itakum. ¹⁴ Umon indu uyun al maliyan be nuswan ta zinna; umon ma gi saban bi katiya. Umon gi kabasu nefus al ma sabit le amulu batal, wa glub tomon deribu fi shukul tamma. Umon Eyal ta laana. ¹⁵ Umon sibu sika al sah. Umon wuduru, wa umon ruwa wara sika ta Balaam Jena ta Bior, al hibu shilu Rushwa min nas al ma baar. ¹⁶ Lakin uwo ligu tawbik le galat tou. Humar al aterisa wonusu be sot ta insan wa wegifu shukul belit ta Nebi. ¹⁷ Nas del ze keran al ma indu moyo. Umon ze sihab al gi shilu ma hawa. Duluma shedid hafiso le umon. ¹⁸ Umon gi wonusu kalamat farik be dala. Umun gi juru nas be wasat shahwat ta gisim. Umon gi juru nas al gi hawil jere min delin al gi ish fi galat. ¹⁹ umon gi waidu le umon huriya lakin umon zato abid ta fasad.Ashan insan uwo abid ta ayi haja al gi gilibu uwo. ²⁰ Ayi zol al gi tefes min najasa ta dunia be marifa ta Rabuna wa Mukalis Yesua al Messih, wa rija le najasa tani mara, mostawa al akir de biga akir min al awel. ²¹ Kan bikun kwes le umon kankan umon ma arufu sika ta bir bital bi arufu wa bi rija wara min wesiya al mukadas al wedi le umon. ²² Masal de hagiga le umon: Kelib rija le turash tou. Kuduruk al kasulu rija le tiin.