1
Ata Yesu hifut he Oyiri lo Olibo ata acohini ta hari no Yordano, ata Oyiri eyari inya a tim
2
To holoŋitek tomwana aŋwan, ata sitan hicem inya. To hucuŋi no holoŋitek niya, obe ifa inya anya inak hiro, ata inya wode.
3
Ata Sitan hijo to honye, "lera iye onyi Hollum, iloito moruo ina hata ra ŋiria."
4
Ojo Yesu ata hitiraŋ inya hijo, "Obe tuŋani amanya te imune hamai."
5
Ata Sitan eyari inya a hide doŋe, ata etuhutek inya obie daŋ ina fau to holoŋ inya.
6
Ata Sitan hijo to honye, "esio iso naŋ iye hilohitok iko hiniefita no obiehien huna, iko imanyiti ina fau daŋ. Aremik naŋ higiem hiram nia hijo esiarahini ifa saŋ ino ta hanaŋ anyar enefita naŋ, aremik naŋ hisio to tuŋani la awak naŋ.
7
Leremik iye rigoŋo ta fau to hosiere hanaŋ ata iye hitihabwo naya, ara huna daŋ inohoi."
8
Ata Yesu hitiraŋ inya hijo, "Egioro hijo, Etihabwo iso iye Habu Hollum lohoi, ata iye higiama to honye hamai.'"
9
Ta halu ata Sitan eyari Yesu a Yerusalem ata ehumak inya to sihidi haji Imojit netok, ata hijo to honye, "Lera iye onyi Hollum, ibire wan nohoi afau teni.
10
Egioro hijo, 'efahu iso Hollum anjilohien ilohonye anyar eriria iye.'
11
Enief iso isia iye ta has inohosie ibe iso iye eriafak hejek inohoi to moruo.'"
12
Ata Yesu hitiraŋ inya hijo, "baŋa ocem Hollum Habu lohoi.'"
13
Ifa atohu Sitan cama Yesu, eno inya ade ata inya ebusak Yesu maan to holoŋ nobo.
14
Ata Yesu acahari a Galilea to golon no Oyiri Lolibo, ata sayejin inohonye esarik ta masik ino fau daŋ.
15
Ata inya hitiara hitiyana to Sinagogi inohosie, ojo hiyo daŋ etihabuo inya.
16
Ifa far nobo awoŋ Yesu a Nasarita, bore gala nafa etibolori hiyo inya. Iya ara te imohiti nohonye, ojiŋak inya a Sinagog ta far na Sabato, Odioto inya ata hihien woŋwoŋ.
17
Ata amoju buk no Isaya ata hiŋa hegieri, ata arumu ŋati no egioro hijo,
18
"Owuon Oyiri na Habu ta hanaŋ, nyo onyimu inya naya anyar ero naŋ sayye ino olibo to locaŋak. Efahu inya naya anyar elimak naya sayye no oremik ahek ilia efita, ojo enyahak haŋodok hotoriŋai, ata ahek ilia etigiama hiyo,
19
Ata elimak hiŋa nolibori Habu."
20
Ata inya hibibin higieri, ata enyahak to hegiemak ilo Sinagog, ata ahunyai ta fau. Oriŋa honyehite daŋ ino hiyo Ilafa to Sinagog to honye.
21
Ata inya hitier hiro to hosie, "Ena otubai hiram no Hollum inaŋ to yohe hatai."
22
Hiyo ilafa bidaŋ teya ero libe no honye, ojo eliliha to hirorita ino osieru inafa afanu to hutok honye. Ata isia hifi, "obe ara onyi Yosefu ileŋ?"
23
Ata Yesu hijo to hosie, "Dede elimak iso itai ofioroho huna tara hanaŋ, 'diktor, itilibo wan nohoi. Igiema ini daŋ to bore gala nahatai rori inafa etiru iyohoi hijo ehuma iye to Kapernauma.'"
24
Ata inya hijo, "Dede ajo naŋ ta hatai, obe hiyo eruk hekilani to doŋe hosie.
25
Ati ajo naŋ ta hatai, dede owon ifa ŋoruo ihidahi ino obore te Israile to holoŋitek ino Elija, ifa ejo ido esiono, enya hai ŋasi hunik ho yafajin ile, ifa obolo hiŋa ta fau daŋ.
26
Obe ifa Elija efahahini to ihidahi daŋ, ati te ihidak nafa amanya to Sarefat to doŋe no Sidon.
27
Owuon hido hiyo ilo oŋwai ha talulu te Israile to holoŋitek ino Elisa hekilani, ati obe ifa etilibo lobo tara hosie daŋ arace Namana lo Siria."
28
Efut ifa hiyo Ilafa owon to Sinagog hojore nafa etiru isia hiro inia.
29
Odioto isia ata epihori inya ade to doŋe hosie, Ata isia eyari inya amai nomunya to doŋe no oduhori isia hajik inohosie, hijo anyar isia esule inya te imunya.
30
Ata inya ahisari to hiji hosie ata inya eno anobo mai hamai.
31
Ata Yesu eno Kapernauma, to bore gala na Galilea. Ata inya hitiyana hiyo to holoŋ no Sabato.
32
Ata isia hililiha to hitiyana nohonye, nyo ero inya to golon.
33
To Sinagog to holoŋ inya, owon ifa lobo tuŋani lo owon iko miniaŋa ata yio wuŋwuŋ,
34
" Ahi! Yesu lo Nasarit, hewak iye hihuma iyohoi jai? Itu iye etaturori iyohoi? Ayen naŋ iye ŋai! Era iye haliboni lo Hollum!"
35
Ata Yesu eburahini miniaŋa hijo, "Okwai, tojiŋu tara honye!" Ifa ejo miniaŋa obuarak tuŋani lia ta fau to hiji hosie, ata ajiŋu tara honye obe eriafu inya.
36
Eliliha ifa hiyo bi no, ata isia adule hiro to wati inohosie ata hifia, "ŋari hiro hunaŋ? Eburahini tuŋani lia oyirihien ino ebwot to hilohitok ojo to golon, ata oyiri ajiŋu ade?"
37
Nia ata sayye no honye esarik to misihi inafa nia bidaŋ.
38
Ata Yesu ebusak imojit inya ata eno a haŋ ho Simone. Teya oŋwai ifa homoni Simone ho nohon no wan nelefiriwa bi no, ata isia hifia Yesu anyar etilibo inya.
39
Oweta ifa Yesu to oger ata efuhai nohon ade, ata inya eno. Teya ata homoni Simone diote ata hifo to hosie ŋiria.
40
Nafa aswori holoŋ, ata hiyo eyyani to Yesu hiyo daŋ ino oŋwai iko iŋweti ino olufa. Ojo Yesu ata atanyak has inohonye to hiyo ino oŋwai daŋ ata isia libe.
41
Ata miniaŋa ajiŋu tara hiyo ariai, oyo hijo, "Era iye onyi Hollum!" ata Yesu eburahini miniaŋa man obe enyak hiro to hosie, hijo eyen isia hijo ara inya Masiya.
42
Ifa to motie beren, ewan Yesu amai nolodua. Ata iluluŋ no hiyo afanu asiehini inya amai no owanari inya. Ecem isia hijo hotobiaŋa inya owu ade tara hosie.
43
Ati ojo inya to hosie hijo, "awak naya hitiyana sayye ino olibo ino obie no Hollum to borejin inak ino gala, ony hiram nafa nia efahini Hollum naya eni."
44
Nia, odule inya hitiyana to Sinagogi inafa owon ta fau ho Yudea.