¹ Tanafa otubai iluluŋ no hiyo alif nobotie, bi no man eririo hejek ino hosie, etiara inya hijo to hejufutak ilohonye to hitieri, “Ihuma riŋa bula ino Farisei, na ara hinyaba. ² Ati obe iso nobo sihin eŋofa, nolobe iso oremik aliew, obe iso lobo sihin leŋofahini, obe egonyuni. ³ Hiro ino ero itai te idumele etirini iso te icala, ojo hiro ino ohohoyik iye to yohe to hotwai haji, etiru iso hiyo to hide ha haji. ⁴ Ajo naya ta hatai motiarak hanaŋ, ibaŋa abaŋ ilo otohe wan, ojo ta halu enyei isia helenyak higiem inak hiro. ⁵ Ati asar iso naya itai to tuŋani leremik itai baŋi, itibaŋa lia otohoi, owon ho golon he ebirohini iye to hima, ajo naŋ ta hatai, itibaŋa inya. ⁶ Obe ati kibosien miet etinyaŋari ta arobiyaha hulo kai? Obe ati lobo hidonye tara hosie oremik aguori to hosiere ho Hollum. ⁷ Ehenuni hofir inia to hosi hatai. Baŋa abaŋ. Egalik itai kibosen ariai. ⁸ Ajo naŋ ta hatai, tuŋani loremik eruhok naya to hosiere ho hiyo, eruhok iso onyi Tuŋani inya to hosiere ha anjilohien ilo Hollum, ⁹ ati lia orisa naya to hosiere ho hiyo arisa iso naya inya to hosiere ha anjilohien ilo Hollum. ¹⁰ Tuŋani le ero hiro ino oru to onyi Tuŋani, ebusahini iso inya, ati to lia ero no oru to Oyiri Olibo, obe iso inya ebusahini. ¹¹ Eyani isia itai ahosiere ho Sinagogi, ta haŋotok, he te ettaha, ibaŋa elafuho hijo efie iso itai hiro jai to wati inahatai, kuya hijo iso itai jai, ¹² Etiyenik iso Oyiri lo Olibo hiro ino efwo itai hiro ta sa inya.” ¹³ Niya ejo lobo tuŋani to hiji he iluluŋ to honye, “Hetiyanani, ilimak ilasi hanaŋ hotobwany ika naŋ lorutat.” ¹⁴ Ata Yesu hijo to honye, “Ileŋ, ŋai ojo ara naŋ haŋotoni he ohe la hatai?” ¹⁵ Ata inya hijo to hosie daŋ, “Ihuma riŋa hotobiaŋa hiŋaru ojiŋak ta tajia inahatai. Nyo obe manya no tuŋani ara himuinya ne ibariti inohonye.” ¹⁶ Ata Yesu elimak to hosie hitiriamita hijo, “Odon ifa mana no lobo tuŋani hasamani bi no, ¹⁷ Ata inya higigil to wan to no honye hijo, ‘Ehum iso naŋ jai nyo abe naŋ awuon ha mai na atunari ŋama?’ ¹⁸ Ojo inya, ‘awu naŋ higiem tiji. Awu iso naŋ anitok ahafu ibatiha ina hanaŋ a fau ata hiinyak aduhok hatara ino hittaha, ajo naŋ Teya attunahini ŋama inanaŋ daŋ ha saŋ. ¹⁹ Ajo iso naŋ to oholio nanaŋ, “Oholio, iwuon iye ho hiro iluluŋ ino otuna ŋasi ariai. Toyiria bolioŋ, tadahai, tamatai, tomune.”' ²⁰ Ati ojo Hollum to honye, 'Lobolit ileŋ, Awak oholio nohoi adumuni ade ta harie te ina. Hiro ino etunak iye, hara iso hiro inia ina ŋai?’ ²¹ Ara iso nia iya tuŋani lotunak to wan to no honye ibariti ino obe ara ibariti to Hollum.“ ²² Ejo Yesu to hejufutak ilo honye, “Ajo naŋ ta hatai, ibaŋa elafuho manya nahatai he hiro ino efu itai daha he wati inahatai - hijo hara iso hiro ino eciefo itai nyo. ²³ Agalik manya ŋiria, ojo wan agalik boŋojin. ²⁴ Itogil ohurrahi, huna obe oyek hinyomo obe odieŋu inak ŋama. Obe owon ho mugu ati etama Hollum isia. Elibo itai bi no egalik cieŋ! ²⁵ ŋai lobo lahatai lo oremik afonik far no honye no wuaran! ²⁶ Ati lobe itai eremik higiem ile hittiŋ no nyo elafuho itai to hiro ariai? ²⁷ Itogil furieni no yani ne elahaman, hobolo isia jai. Obe isia egiama, obe einyaŋa, ajo naŋ ta hatai ara hido Solomone ta amanyari honye daŋ obe ifa ecofo boŋojin iya inia. ²⁸ Iya eticofo Hollum miyaŋ nya to hotwai ha mana, ina owon ena, ojo motie ebirohini ta mai no oswahari haranyanya, hiticef iso inya itai, Itai huloŋ odico huruk! ²⁹ Ibaŋa osiaha hiro ino efwo itai daha iko ino efuo itai himat, baŋa elafuho. ³⁰ Osiaha hiyo ta fau daŋ hiro huna ojo Monye hatai oyen hijo ewak itai hiro huna. ³¹ Ati itisiahai obie no Hollum ojo iso hiro inia daŋ ofonihini ta hatai. ³² Ibaŋa ebaŋ, hiro hulo hitiŋi, nyo omuno Monye hatai hesiarari ta hatai obie. ³³ Itinyaŋak ibariti ina hatai ata itai hisio to locaŋak. Ihuhumak kulosien to wati hatai ino obe iso oremik gwuasa etunari ibariti ino ido ino obe oremik hiruat. ino obe hahalak afanu aŋati, ojo hido ino obe itoŋ oremik hituru. ³⁴ Mai nowanari ibariti inohoi, owon iso taji nohoi dia. ³⁵ Ititodok boŋojin inahatai te itodit ahotuai, isiara lomohien ina hatai hotodule wulei, ³⁶ Itiwuana iya hiyo ile etila etok lohosie, lacohini teya ho hiyama, ojo inya otu hikukuŋ ikat, anyar honye osony isia hiŋa ikat to honye. ³⁷ Hotomune hegiamak, hullo otu etok lohosie arumu oriŋa awoŋ inya. Dede elimak naŋ ta hatai hijo otodok iso inya boŋojin ino honye, ata elimak isia hotohunya ta fau, ata iso inya awoŋ hisio to hosie ŋiria hata dahai. ³⁸ Otu etok ta tari te iriŋit hitarihi, kuya hidofe te iriŋit hitahunihi, otu arumu isia oriŋa, hotowuana jaha to hegiamak ilia. ³⁹ Oyen monye haji saa no otuni ohoho, no obe inya ebusak haji no honye esiahari ohoho dia. ⁴⁰ Iririai hidofe itai, nyo obe itai eyen saa no otuni onyi tuŋani.“ ⁴¹ Ojo Peturu, Habu, ero iye hitiriamita inia te iyohoi hame he to hiyo daŋ?" ⁴² Ata Habu hijo, “ŋai iso ati lia eruk ojo ara a heririani lo otu Habu lohonye hihaf ahide tara liya ile egiama he inya hesiara to hosie ŋiria nohosie ta far ta awahari hosie?” ⁴³ Hotomune hegiemani lia, olodule higiama te etok man orumuni inya acohini etok. ⁴⁴ Dede, elimak naŋ itai hijo ehumak iso inya inya daŋ a hosiere hosie. ⁴⁵ Ati ejo hegiemani lia ta taji honye, ‘Etiliŋa habu lalaŋ acohini no honye,’ ata hitiara baha hegiemak liawa he ŋorwo niya, hijo adaha, amata man oruma, ⁴⁶ Otu iso habu lo hegiemani lia to nobo holoŋ ina emiŋari inya obe eriria, ojo to nobo sa no obiaŋari inya oyen, ata iso hiŋoŋot inya a ilo hitiŋi ata ahutak mai to honye he ilo obe eruk. ⁴⁷ Hegiamani lia, nafa eyen higiemita ina Habu, ojo to biaŋan hiriria kuya egiem to higiemita te ino honye, abaha iso te ibahiti iluluŋ. ⁴⁸ Ati lia obe oyen, ata higiem hiro ino olibo, abaha iso te ibahiti te ino odico. Ile emiata hini iluluŋ to hosie, emieta iso ino awak hiyo tara honye. Ojo lia le esio hiyo igiem netok, awak iso hido isia netok tara honye. ⁴⁹ Atu naŋ ebirok hima ta fau, ajo naya hijo aswahahini mahu hafa beren. ⁵⁰ Ati halawon naŋ ha batisimo ta hanaŋ iya awak naŋ hibatiso, ojo to hitaban ta hanaŋ man esahari. ⁵¹ Hegigilo itai hijo attu naya hisio himwara ta fau? Obe, elimak naŋ itai, eyyani naya bwanya. ⁵² Ena man ahosiere owon iso hibibwanya ta haji nobotie, man ena owon iso miyet ta haji, hiyo ohunik oliwari ohorik kuya ohorik oliwari hiyo ohunik. ⁵³ Obwanya iso isia, oliwari monye ho hito, ojo hito oliwari ho monye, oliwari hotonye ha ŋani, ojo ŋani oliwari ho hotonye; oliwari homoni ho homoni.” ⁵⁴ Ero ifa Yesu te iluluŋ,” ejo itai ewolo itiran to aswori ho holoŋ, kokwak ijio itai 'awoŋ hai.' kuya ohu hai san. ⁵⁵ Ojo egonyu itai oyami ohutuni takal ho ŋolon, ata itai hijo 'Eno holoŋ nohon ata hidoŋ. ⁵⁶ Etimiyahak, eyen itai hahieru hiro ino edoŋ ta fau ojo te ido, jai ati ebe itai eremik hiloit hiro ina ena? ⁵⁷ Nyo ebe itai eŋotok hiro ino olibo ta hatai? ⁵⁸ Ejo itai efwo iko hebalahani lohoi ahosiere ha haŋotoni, to hikoi, itibisak honye hiram nia, hotobiaŋa inya eyari iye ahosiere ho lokiko hijo hotobiaŋa ofuo ehumak iye a hotuai Babus. ⁵⁹ Ajo naŋ ta hatai , ibe iso itai eremik afanu ade man edumari itai arobiya ilo eduhuco.”