1
Nafa atuhu inya mojo to nobo mai, ata lobo hejufutani lohonye hijo, “Habu, itiyana iyohoi mojo anyar eyen iyohoi iya nafa etiyanari Yoani efahat ilo honye.”
2
ojo Yesu to hosie, “le mojo itai, itijo 'Monye, isiara fure nohoi hotolibe. Tojo obie nohoi awoŋ.
3
Isiara toohoi ena ŋiria nohooi ina to holoŋi.
4
Ibusak hiyata inohoi iya ina ebusahini iyohoi hiyo ilo horosi ino hohoi. Heyari iyohoi to hisusuta.'”
5
Ata Yesu hijo to hosie, “Lari lia tara hatai owon iso ho mote, ata eno to honye ta harie, ''Ila tolwahak naya ilak imuniaha ohunik,
6
Lia lobo motte hanaŋ eba bi Iyania ojo ilak hiro obe ile aremik naya hisio to honye.'
7
Ojo lia to hotwai haji ata hitiraŋ hijo, ‘Baŋa etigiama naya, esiono ikat, ojo dure inanaŋ daŋ owuana ta masik iko iferiti. Abe naya aremik diote hesiarari imuniaha tohoi.'
8
Ajo naŋ ta hatai, ojo ida hido inya abe inya adioto hesiarari to hoi. Iyania lera iye amotte honye, ati iyania anyar itai ewuanari horiri, hadule, odioto iso inya ata hisio to hoi imuniaha ariai man ino oremik to hoi.
9
Ajo naŋ daŋ ta hatai, ifia, ata iso hisio ta hatai, itufai, ejo iso itai erumu, ikukuŋo, ojo iso ikat aŋa ta hatai.
10
To tuŋani elefia, esiarahini ojo to tuŋani eletufa orumu iso inya; ojo to tuŋani elekukuŋo aŋa iso ikat to honye.
11
ŋai lia tara hatai lefi onyi honye monye imune, ojo monye ata hisio to honye morwo ta mai he imune. Kuya hami ata hisio munu?
12
Kuya efia inya hateli, ata hisio to honye hito?
13
Ta mai nia, era itai hegiamak ho hipalita anyar eyen hijo inari olibo esio to dure ina hatai, hara iso jai ino esio Monye hatai te ido Oyiri olibo to hulo efia inya?”
14
Ta halu, ata Yesu efuhai miniaŋa ade tara lobo tuŋani lafa obe ero. Nafa erwat miniaŋa ade ata tuŋani lafa odwa hiro. Eliliha ifa iluluŋ!
15
Ati ata ilak hijo, “Hilohitok no Belsebul etok lo miniaŋa ne efuhari inya miniaŋa.”
16
Ecem ilak inya hijo ewak isie hitimijani to honye te ido.”
17
Ati oyen Yesu higigilita inohosie ata hijo to hosie, “ahabwe daŋ nolobwanya to wan, oturo iso hame, ojo haji nolobwanya to hiji ohuye iso.
18
Ebwany Sitan wan nohonye hame, howeta iso obie nohonye jai. Ojo itai hijo efuhuta naya miniaŋa to hilohitok no Belsebul.
19
Le efuhai naŋ miniaŋa to hilohitok no Belsebul, ta ŋai efuhita hejufutak ilahatai isia ade? Ara iso isia haŋotok ilahatai.
20
Ati efuhai naya miniaŋa to hafialai no Hollum, otu iso obie no Hollum ta hatai.
21
Owon lobo tuŋani logol he iremiti inohonye heririari haji no honye, otuba iso hiro inohonye dia,
22
Ati awoŋ lobo tuŋani ile ogol amire inya, tuŋani lia ogol eyari iriemiti tara tuŋani lie ojo orujori ibariti ino honye.
23
Lie lobe owon ikanaŋ ara amereni lalaŋ. Ojo obe otubahini ikanaŋ esarik iso.
24
Le no oyiri no oru ade tara tuŋani, ojiŋe to masik ino lobe hifioŋ hetufari mai iwetit. obe orumu, ojo inya hijo, 'Awu naŋ iso acahari ahaji nara attuni naŋ.'
25
To hiba nohonye, orumu haji nya ofia ojo ehuhumahini nalanyar.
26
Niya, ata awoŋ iko inak oyirihien hatarik ino oru no agalik inya hamanyari dia. Ati to hucuŋi orun fa manya no tuŋani lia no agalik nafa to hitieri.”
27
Nafa Esahak inya hiro nohonye, ata nobo hito oŋorwo hihaf hutuk nohonye ahide to hiji he iluluŋ ata hijo to honye, “Hotowuana jaha to hosehe nafa esiu iye ojo hinai nafa etidasu iye.”
28
Ata ati Yesu hijo “Hotowuana jaha to hosie ilia ile etiru hiro ino Hollum ata attunak.”
29
Iya nafa ebibolori iluluŋ no hiyo man ariai, ata inya hitira hiro, “Hilahaji ina amurie hilahaji ina. Osiaha iheriti ati obe iso nobo ne esiarahini to hose arace ihierit no Yona.
30
Iya nafa arace Yona ahutuhuti to hilahaji ina.
31
Odioto iso Habu hito oŋorwo no Seba to ŋolon to ŋoto no hiram. Ata etisiahak hiyo hullo iyania nyo otu inya ta fau honye na alama hetirini ofioroho ino Habu Solomone. Elimak naya itai, owon lobo tuŋani ini lagalik Solomone.
32
Oweta iso hiyo ilo Nineva to holoŋ no ŋoto ho hiram, ata etisiahak hiyo ilo ena, nyo ebusak ifa isia hiyata inohosie nafa etirini isia hitito no Yoani. Elimak naya itai owon lobo tuŋani ini lalagalik Yoani.
33
Obe lobo tuŋani etuwulek hima to lomo honye Ata eŋofok ta mai noloriok ata emuhok to hotwai ho gufa, atati ahasak to filili anyar ilo ojiŋai, egonyu icala.
34
Ati ara honyek allomo to wan hoi. Olibe honyek no hoi, acala wan no hoi bi daŋ. Ati obe honyek hoi olibo, ata wan no hoi hufut he idumele.
35
Ihuma riŋa hijo hotobiaŋa calai nia owon to hotwai hatai ara idumele.
36
Owuana ania, efut wan nohoi daŋ ho calai obe lobo mai owon he idumele, ara iso wan nohoi iya lomo nia eticala iye.”
37
Nafa atohu inya hiro, efia ifa lobo lo Farisei inya heno he inya ahaŋ honye adahari, ati Ata Yesu ajiŋe ahotwai ata afirie ta fau.
38
Ojo lo Farisei lia ata hililiha hijo adaha Yesu obe ellila has.
39
Ata ati Habu hijo to honye, “Iyani ta hatai Farisei, ellila itai horwoŋitek ino kubayat he fedito ati ojo hotwajin inahatai efut he hiŋaru ojo run.
40
Hulo obe higigilita hulloŋ obe ara hayani ho horwoŋ oyieu hotwai?
41
Isiara to locaŋak ino owon ta hatai, ojo hiro daŋ ta ati libe ta hatai.
42
Ati oru iso ta hatai Farisei nyo esiara itai arobiya ina hatai huna tomon man to hoyiek ino mana, ejo itai eguwe ibisiti he mune no Hollum. Osiru hehumari no obis ojo emunori Hollum hotobiaŋa eguwe, ebe egiem hiro niya inak daŋ.
43
Oru iso ta hatai Farisei, nyo emuno itai hitolojita ino hosiere to Sinagogi ho hifonya ta baŋi ta masik ino Suk.
44
Oru iso ta hatai, ewuon itai iya ilumioho ino obe hituhuta huna etirio hiyo obe ŋai oyen.”
45
Ata lobo hetiyanani lo hifahita lo Yudei hitiraŋ inya hijo, “Hetiyanani, ejo iye omoro iyohoi daŋ.”
46
Ata Yesu hijo, “Oru iso ta hatai hejufutak ilo ifahita! Emiatak itai hiyo hiro ino ogol heyuhitai, ati ibe itai eremik hittir ta hafiala inahatai.
47
Oru iso ta hatai, nyo iduhok itai ilumioho to hekilak, ati hohonyok ilahatai ifa ottohe isia.
48
Era itai a suti, te igiem no hohonyok ilahatai, nyo ottohe ifa isia hekilak, Ilafa eduhok itai ilumioho to hosie.
49
To hiram to nia, ejo ofioroho ino Hollum, 'Efahak iso naŋ hekilani iko efahat to hosie ilo ofwo hitigiem ata atohe ilak ilohosie.’
50
Ara iso hilahaji ina hatohok ho hekilak Ilafa ho beren to hitieri na fa, ojo hoto nohosie ehiana ekumohini to hosie.
51
Teya hoto no Abel man to hoto no Sakariya, lafa otohok hiyo to hiji ha altari he ta haji imojit no odua. Ee, ajo naŋ ta hatai, ara hilahaji inaŋ hilahaji no otu weta ta far no ŋoto.
52
Oru iso ta hatai hejufutak ilo hifahita ilo Yudei nyo adumu itai iŋanyit lo ofioroho; ebe itai ejiŋak to wati inahatai, ejo itai etihita ilia ilo ojiŋita.”
53
Ta halu eno Yesu ade, ata egiorok ilo Farisei hitirija inya to hiro ariai,
54
Awak etilohu inya to hiroita inohonye.