1
Atta inyia ellilloŋu heyiyanak tomon harik anobotie atta hisio to hosie hilotihitok ho dwaran na agalihini miniaŋa ojio hidofe etilibori iŋweti.
2
Atta Yesu efahak isia etiyanari hiyyo obie no Hollum ojio hidofe etilibori haŋwak.
3
Elimak ifa inyia to hosie hijo, "Baŋa eyari innak hirro a mai nyie efuye itai, ladahat, kullo, imune, arobia ho boŋojin arik.
4
Itolojo ta haŋ nyie etolojori itai man ebusahini itai mai nyie. 5Ituturok tuduha tara hejek innahatai te illia ille lebo itai hatara a
5
Ituturok tuduha tara hejek innahatai te illia ille lebo itai hatara a hituhuti to hosie lebusak itai doŋe nyia."
6
Atta isia efie to hiji ho misihi, ilimak saye inno olibo ojo isia daŋ etilibo hiyyo ta masik aria.
7
Iyyania, etiru ifa Erode Mamur lo Tetraka hirro daŋ innafa lowuon, atta inyia ŋuŋusia binno, nyo ojo illamuk hijo aŋebuhu Yoani Batista to ye,
8
Atta hilak hijo aliew Elija, ojo hilak arrasa hijo, "Enyiak hekilak illafa ho beren ŋebuhu.
9
Eijo Erode, “Aŋutu ifa naŋ hoo no Yoani, ŋai hidofe lia enyiak naŋ hititira hirro innohonyie?” Atta Erode siaha hikoi hijo awak inyie ŋegonyu Yesu.
10
Ifa aciohini heyiyanak atta isa elimak to Yesu hirro innafa legiem isia, atta inyia eyari he inyia isia abore gala no Bettesaida.
11
Ati ifa etiru iluluŋ no hiyyo atta ejufari inyia, ojo inyia atta efwotu isia ero to hosie hirro inno Obie no Hollum, etilibo illafa lawak libe.
12
Ifa laswori holoŋ afanu heyiyanak tomon harik hijo to honyie, “Ifuhak iluluŋ nia amasik innohosie anyar lofwo arrumu ijotiti innohosie ho nobo daha, nyo ewuon iyyohooi inni te iciela.”
13
Ati ojo inyia to hosie, “Isiara to hosie innamuk hirro hatadahai.” Ojo isia atta hijo, "Ewoun iyyohooi he imuniaha miet ojo ham arik ija.” Eremik mahu iso iyyohooi enyiaŋu ŋiria te iluluŋ nia daŋ.
14
Ara ifa hiyyo daŋ alif miet. Atta inyia hijo to heyiyanak illohonyie, “Isiara hiyyo hotohunyie ta fau, hotowuana iluluŋ ho tomwana miet hame.”
15
Ifa ehum heyiyanak inia daŋ, ohitole hiyyo daŋ ta fau.
16
Atta inyia ŋadumu imuniaha miet ho ham arik liya atta hiwolo ahide ido atta hijok isia, atta hiwur isia atta hisio to heyiyanak illohonyie hataharak te iluluŋ.
17
Enya ifa isia man ofoŋi atta eduduhak innafa lofitini man enyiak etufutak gufahien tomon harik.
18
To nobo far ifa, eno Yesu lomojori hame, owuon ifa heyiyanak illohonyie atta inyia hifi isia hijo, “Hojo hiyyo ŋai nayya?”
19
Atta isia hijo, “Iyye Yoani Batista, atta ilak hijo iyye Elija, ojo ilak atta hijo iyye lia lobo hekilani illafa ho beren enyiak ebuhu.”
20
Atta ati inyia hijo to hosie “Ati ejio itai nayya ŋai?” Atta Peturu hijo, “Iyye Kristo lo ottu tara Hollum.”
21
Ati ojio Yesu hisor isia hijo hotobiaŋa elimak lobo tuŋani, atta hijo,
22
“Orrumu iso Lonyi Tuŋani hitigema hirro aria, ebo iso hiyyo illo hittaha, fadirihien iko hegiorok inyia, atta attohe inyia, atta ebuhu
to holoŋ hitahunihi no holoŋ.
23
Atta inyia hijo daŋ to hosie, “Lawak lobo tuŋani ejufuni naŋ, isiara inyia hotogwe wan nohonyie. Hotolororoi Kuruce nohonyie holoŋitek daŋ atta ejufari nayya.
24
Lawak lobo tuŋani hiciem hetulwahu manya nohonyie etilitek iso inyia. Ati leletilitek manya nohonyie to hiram nanaŋ, etuluahini iso inyia.
25
Holibo ati inyie jai to tuŋani arumu inyia hirro daŋ hunna ta fau, ati atta etilitek wan nohonyie.
26
Leloriri tuŋani nayya iko hiram nanaŋ, eloriri iso Lonyi Tuŋani inyia laciohini iso inyia to lohwo nohonyie, ho lohwo no Monye iko anjilohien illo Olibo.
27
Ati elimak naŋ itai dede, owuon ilak illahatai illo loweta inni, illo obe eremik hinniŋ ye man egonyu obie no Hollum.”
28
Ta halu ho holoŋitek hotohunik ta nafa erarari Yesu hirro niyya, atta inyia eyari daŋ he inyia Peturu, Yoani ojo Yakobo, atta ŋeno a doŋe lomojori.
29
Eloito ifa homom nohonyie, ojo boŋojin innohonyie obwor no opipiak.
30
Atta illak hiyyo lohorik hidoŋ ille lero he inyia! Ara ifa isia Musa he Elija,
31
oleyhini ifa isia to kwatan. Ero ifa isia heno nohonyie aliew to Yerusalem, ho hiram nolohu inyia ŋatubak to Yerusalem.
32
Ojiotori ifa Peturu binno iko illafa owuon he inyia. Ati nafa acieŋu isia, atta isia egonyu kwatan nohonyie ojo hiyyo lohorik oweta he inyie.
33
Ifa efie isia ade tara Yesu, atta Peturu hijo to honyie, “Ettok olibo te iyyohoi ha awuanari inni ko hoi. Eduhok iso iyyohooi ticio hunik, nobotie to hoi, nobotie to Musa ojo nobotie te Elija.” Obe ifa inyia oyyen hirro inne lero inyie.
34
Ta nafa harrasa inyia hiro hirro hunna, atta itiran ŋawoŋ atta eburuhak isia; abaŋi ifa isia nafa eburuhak itiran isia.
35
Ottu ifa hiram tara itiran no lojo, “Lonyi hanaŋ Lonyimoti illeŋ. Itira to honyie.”
36
Ifa esaha hiro, atta Yesu wuana hame. Odwari ifa isia hirro inne to holoŋitek niyya obe elimak to lobo tuŋani hirro innafa egonyu isia.
37
To motie to nohonyie, ifa aciohini isia to doŋe aŋolon, atta inyia hiboŋ he iluluŋ no hiyyo.
38
Niyya, atta lobo tuŋani hilulwo to hiji he iluluŋ hijo; “Hetiyanani, attana nayya iyye, towolo lonyi hanaŋ, ara inyia hiito hanaŋ lobotie ija.
39
Ewolo iyye, eniefita oyiri no lorru inyia, kwak man afanini habunak to hutuk nohonyie. Obe lebusuta inya to holoŋi, ebusak inyia to golon, atta hidofe eriafu inyia no lorru lebusak inyia.
40
Attana nayya heyiyanak illohoi hefuhai ade tara honyie, ati obe oremik.”
41
Atta Yesu hitiraŋ hijo, “Itai hullo obe huruk, hilahaji no hemumunak, hadulei iso naŋ manya ikatai man anu? Iyyani lonyi hoi lia inni.”
42
Ta nafa ottuni hiito, atta miniaŋa abwarak inyia ta fau atta hefufudok inyia no lorru. Attati Yesu hiriŋ oyiri nafa nebot atta hitilibo oŋeyye atta hisio inyia to monye honyie.
43
Eliliha ifa isia binno to duaran no Hollum. Ojo isia harrasa daŋ hillilliha to hirro innafa egiem inyia atta inyia hijo to heyiyanak illohonyie,
44
“Isiara hirro inia daŋ hotojiŋak to yohe innahatai, nyo esiarahini iso Lonyi Tuŋani ta has ho hiyyo.”
45
Ati obe ifa isia oyyen hirro inne ero inyia.
Nyo eŋofo ifa tara hosie. Abaŋi ifa isia hifi inyia hirro inne ero inyia.
46
Niyya atta isia arijahini to wati innohosie hijo ŋai iso ara ettok to hiji hosie.
47
Nafa aheru Yesu higigilita inno tajia innohosie, atta inyia ŋadumu lobo iŋeyye, atta ehumak inyia to oko ŋati nohonyie,
48
Atta hijo to hosie, "Lefwotu lobo tuŋani iŋeye ille hitiŋ iyya inna to fure nanaŋ, efotu iso inyia nayya, lefotu lobo tuŋani nayya, efwotu iso inyia lia lefahu nayya. Nyo tuŋani lara halu tara hatai daŋ ara iso inyia lettok ta hatai.”
49
Atta Yoani hitiraŋ hijo, “Ettok ewolo iyyohooi lobo tuŋa efuhita miniaŋa to fure nohoi, atta iyyohoi hitiwet inyia nyo obe inyia ejufuti he iyyohoi.”
50
Ati atta Yesu hijo to honyie, “Baŋa etiwet inyia, nyo tuŋani lobe ebo itai ara lahatai.”
51
Nafa eliaha holoŋitek inno lohuye eyari inyia eno ido, atta inyia etiyitek homom nohonyie a Yerusalem.
52
Atta inyiaa efahak efahat illohonyie to hosiere honyie, ofwo isia ajiŋak to doŋe nobo no Samaria anyar efwotu inyia.
53
Ati ebo ifa hiyyo efwotu inyia nyo awak ifa inyia eno a Yersulaem.
54
Ifa ewolo heyiyanak illohonyie, Yoani ho Yakobo, atta isia hijo to honyie, “Habu, ibe iyye ewak iyyohoi hellilloŋo hima te ido hetihara isia?”
55
Ati oyito Yesu atta hiriŋ isia.
56
Atta isia efie a nobo doŋe.
57
Nafa efie isia te ikoi nohosie ejio lobo tuŋani to honyie, “Ejufari iso nayya iyye amai nyie ehu iyye.”
58
Atta Yesu hijo to honyie, “Owuon lobeyohi he iwudoho innohosie, ojo cieŋ inno hide owuon ha hajik innohosie, ati obe LOnyi Tuŋani owuon ha mai no oremik hetifierihini hoo nohonyie.“
59
Atta inyia hijo to lobo tuŋani, “Ijufuni nayya.” Ojo tuŋani lia to honyie, “Habu ibusak do a hu naŋ anuhak monye hanaŋ.”
60
Ati atta Yesu elimak inyia, “Ibusak hayoni hotonuhak hayok illohosie, ati ino ilimak ta masik daŋ obie no Hollum.”
61
Atta lobo tuŋani hidofe hijo, “Ejufari iso nayya iyye, Habu, ati isiara nayya ahu efonyini isia niyya inno owuon ta haŋ hohoi.”
62
Atta Yesu hijo, “Obe lobo ehumak hani nohonyie to kebu atta hiwolo ahalu, obe inyia osiru to obie no Hollum.”